Kotlo e tlogo tlela Tiro
1Moeno moela Tiro. Gololang, lena maselawatle a kua Tarasisi, gobane o thubilwe, ga go sa na nywako, ga go sa na boyo. Ba di sebetšwe di etšwa Khithima. 2Homolang lena ba dihlakehlake, bašabi ba Sidone, lena baselawatle ba go ba humiša. 3Mabele a Sihoro a go tla ka tsela ya meetsemagolo, a go bunwa kua nokeng ya Nile, ba huma ka ona, ya ba boselelo bja ditšhaba.
4Hee Sidone, lewa ke dihlong! Lewatle le na le sebo sa lona le re: Ga ka ima, ga ka belega, ga ka aloša masogana, ga ka fepa banenyana.
5Ge Baegipita ba ka kwa taba ye, ba tlo tšhoga tša Tiro.
6Selelang Tarasisi! Lena ba dihlakehlake, gololang! 7A ke wona motse wo le bego le o hlalalela e sa le mola o thomega kgalekgale? Maoto a wona a tlo o iša madiilo kgole. 8Ke mang a reretšego Tiro tšeo, motse woo wa matsaka a bogoši, wa bašabi ba marena, wa babapatši ba go retwa dinageng? 9Di rerilwe ke Morena wa mašaba gore go nyatšege bonatla bjohle bja baipoti, gore go kokobetšwe baretwa ba lefase.
10Etša noka ya Nile, o tlatše naga ya gago; ga go sa na se se tlemago. 11Morena o akaladitše tsogo lagwe godimo ga lewatle, o šišinya mebušo; o laetše a re: Kanana go thubje metse ya gona ya dibo. 12O itše: O ka se hlwe o hlalala wene ngwanenyana e o katilwego, morwedi wa Sidoni. Tsoga o selele kua Khithima; le gona kua o ka se ke wa dula.
13Selele lefase la Bakaladea. Setšhaba seo se be se se gona. Baasuri, naga yeo ba gafetše diphukubje, ba aga dibo tša bona, ba rutla metse ya mošate, ba e dira ya marope.
14Gololang lena maselawatle a kua Tarasisi, gobane mo le bego le go bota go phušotšwe.
15Mehleng yeo Tiro go tlo dula go lebetšwe nywaga e masome a šupago, lebaka la pušo ya kgoši e tee. Fela, ge go fetile nywaga e masome a šupago, ke mo tša Tiro e tlogo ba tša sefela sa seotswa se se rego: 16Hee seotswaselebalwa, tšea lekope o šike le motse, o opele gamonate koša tše dintši, o tle o gopolwe.
17E tlo re ge go fetile nywaga e masome a šupago, ke mo Morena a tlogo lekola Tiro, wa tlo rekelana le mebušo yohle ya lefase mafaseng ka moka. 18Mme maruo a wona, le mahumo a mošabo, e tlo ba diila tša Morena; e ka se be tša go fo kgobja le go bitielwa. Mahumo ao e tlo ba dijo tša go horiša ba ba dulago ba lebane le Morena, gore ba apare tša botšhepi.
