JESAYA 21

₁Moelalešoka la lewatleng. Di tla di etšwa leboa boka sesesedi se kutologile. Di tla di etšwa šokeng, nageng e šiišago. ₂Ke bontšhitšwe pono ya tše thata: Mohlanogi o a hlanoga; mošwalalanyi o a šwalalanya.

Hee Elama! Tšwaa dira! Hee Meda! Rakelela motse, o khutšiše batho diphegelo.

₃Letheka la ka ge le hlokofala ke ka tšona; ke swerwe ke mašoko a etšago a mmelegi; ke kudupana, mme ga ke kwe; ke tšhogile, mme ga ke sa bona. ₄Pelo ya ka e timetše, e ribegetšwe ke tlalelo; leswiswana le ke bego ke le rata le mphetogetše la mmoifo.

₅Abang dijo! Alang magogwa le je le nwe. Lena bakgoma, tsogang le fokeleng dikotse!

₆Gobane Mong a bohle o mpoditše a re: Sepela o bee mohlapetši, a bolele se a se bonago. ₇Ge a bona makoloi a lokologane, le banamedi ba dipitsi le ba dipokolo le ba dikamela, a phafoge a hlapetše ruri.

₈Tau ya goelela ya re: Mong a bohle! Ke hlwa ke eme ke letile; le bošego ka moka ke lala ke emetše go hlapetša.

₉Bjale šebalaa go tla moloko wa banna, le banamedi ba dipitsi! A buša a re: O wile! Motse wa Babele; le diswantšho tša medimo ya gona o di robaganyeditše fase.

₁₀Hee lena ba gešo ba go folwa, le tšwago seboeng sa ka! Ke le botša tše ke di kwilego go Morena wa mašaba Modimo wa Isiraele.

₁₁Moeno moela-Duma. Ke goelela kua Seira, go thwe: Hee mohlapetši! Tša bošego di reng? Hee mohlapetši! Tša bošego di reng?

₁₂Mohlapetši o re: Bošego ke bja matlagosa; fela, e sa le bošego. Ge le le ba go botšiša, le boe le tle fa le botšiše.

₁₃Moeno molebaArabia. Le tlo lala sekgweng šokeng, lena makoko a Dedane. ₁₄Ba ba nyorilwego ba tleleng le meetse; ba naga ya Thema le ba tlele le bogobe bjo bo lekanego bafaladi. ₁₅Gobane ba tšhaba marumo le tšhoša ye e khwamotšwego, le bora bjo bo ngangilwego, le mathata a tlhabano.

₁₆Gobane Mong a bohle o mpoditše a re: Go sa šetše ngwaga o tee, o kago ngwaga wa mothwalwa; ke mo go tlogo fela letago la Kedara. ₁₇Mme palo ya babetši ba mesebe le bagale ba Kedara e tlo ba e sego nene; Gobane Morena Modimo wa Isiraele o realo.