JESAYA 20

₁Ka ngwaga wo Tharathani a tlilego ka wona motseng wa Asidodo a o thopa, a romilwe ke Saragone kgoši ya Asuri, ₂Ka lona lebaka leo Morena o laetša Jesaya morwa wa Amotsi a re: Yaa o tšole makgeretla a o a aperego; o role le dieta dinaong tša gago! Jesaya a ya a dira bjalo, a sepela a sa apara kobo, dinao di le fela. ₃Morena a tla a re: Mohlanka wa ka Jesaya ge a feditše nywaga e meraro a sepela a se ne kobo, nao di le fela, ke seka le tshwantšho ya tše di tlogo dirwa Egipita le Kuše. ₄Ke tša mohla kgoši ya Asuri e tlogo gapa mathopša a Egipita le batlengwa ba Kuše, ba bafsa le ba bagolo ba hlobotše, maoto a le fela, marago a le fela, a leša Baegipita dihlong. ₅Ke mo go tlogo tšhoga gwa lewa ke dihlong ba ba bego ba botile Kuše, ba ba bego ba itheta ka Egipita. ₆Gomme ba ba agilego mešikong yeno ya lewatle mehleng yeo ba tlo re: Ge bao ba re bego re ba holofela, ba re bego re tšhabela go bona ra hlakodišwa, ra phologa ge go fihla kgoši ya Asuri, ge bona ba diregelwa ke tše bjalo, rena re sa tlo phonyoka bjang?