JESAYA 1

₁Pono ya Jesaya morwa wa Amotsi, ye a e bonego e era Juda le Jerusalema mehleng ya Usia le Jothama le Ahasi le Hiskia dikgoši tša Juda.

₂Hee lena magodimo, kwang! Wena lefase, theetša! Gobane Morena o a bolela, o re: Ke fepile bana; ke ba godišitše, mme ba ntlhanogela. ₃Kgomo e tseba morui wa yona, pokolo e tseba legopo la mong wa yona. Ge e le Isiraele, yena ga a tsebe; setšhaba sa ka ga se lemoge.

₄Joo, setšhaba sa dibe! Setšhaba sa molato o mogolo! Peu ya basenyi! -- Ba lahla Morena, ba nyatša Mokgethwa wa Isiraele; ba boetše nthago! ₅Le sa otlega kae, ge le fela le hlanoga? Hleng hlogo ka moka e šetše e gobetše, le pelo e hlokofetše yohle! ₆Go tloga lwaong go fihla hlogong ga go mo go thabilego; e fo ba dintho le megogoma, le dintho tša bolehono di sešogo tša hlatswiwa mme tša tlemelelwa, tša thobiwa ka makhura.

₇Naga ya lena ke ya marope, metse ya lena e swile ka mollo; mašemo a lena a lewa ke bašele lena le lebeletše; ke tšhwalalanyo wa mašegerepe a ba ntle. ₈Lešalela ke ngwanenyana wa Tsione, o etša mokutwana serapeng sa morara, o etša mogophe wa tšhemong ya magapu, o etša motse wa go rakelelwa. ₉Ge Morena wa mašaba a ka be a se re šiele mašalela a sego nene, re ka be re etša Sodoma, re ka be re dirilwe tša Gomora.

₁₀Kwang lentšu la Morena, lena bakgoma ba Sodoma! Molao wa Morena o o kwele ruri, wena setšhaba sa Gomora! ₁₁Ke bjang boati bja didimo tša lena? Morena o re: Ke bile ke tennwe ke dihlabelo tša dikgapana tša lena, le tša makhura, le tše nonnego. Ga ke kgahlwe ke madi a dipowana le a nku le a phoko. ₁₂Ge le tla go bonala pele ga ka, ke mang e a le biditšego a re le di tliše, la tla la gatakanya malapa a ka? ₁₃Le se ke la hlwa le tliša dibego tša lefela; orelo tša lena ke bona e le tša makgapha; le menyanya ya lena ya kgwedi ge e dula, le disabatha, le diphuthego. Ga ke sa kgona go bona bobe bo hlakane le dithapelo. ₁₄Matšatši a lena a kgwedi ge e dula, le menyanya ya lena, ke di hloile, di a nkimela, mme di ntapišitše.

₁₅Ge le emiša, matsogo le mpitša, ke tla le gerula; le ge le ka atiša dithapelo, nka se ke ka le kwa; diatla tša lena di tletše madi. ₁₆Hlapang, le tšwe ditšhila; mediro ya lena e mebe le e tloše pele gaka, bobe le bo lahle. ₁₇Ithuteng go dira tše di botse; nyakang moahlolelo wa go loka, le hlakodiše ba hlakago, le namolele dišuana; bahlologadi le ba lwele.

₁₈Tlang ge, re sekišaneng! -- Go bolela Morena. -- Le ge dibe tša lena di hubetše bo-ka madi, di tlo šweufala wa leswela; le ge di hubetše wa letsoku, di tlo etša boya bja dinku. ₁₉Ge le rata, ge le ka kwa, le tlo ja menono ya lefase. ₂₀Fela, ge le gana, ge le nganga, le tlo lewa ke lerumo. Ruri, molomo wa Morena o boletše.

₂₁Joo, motse wo o bego o botega, bjalo ke seotswa! E be e le wa mekgwa e botse, go agile toko mo go wona, mme bjalo ke wa babolai. ₂₂Tshipitshehla ya wona bjale ke manyedi; dinwewa tša gona di tšhetšwe meetse. ₂₃Bagolo ba gago ke bahlanogi, ba sepela le mahodu; bohle ba rata bofora; ba lebeletše tsogolekobong; ga ba ahlolele sešuana; mme taba ya mohlologadi ga e fihle mo go bona.

₂₄Bjale go bolela yena Mong a bohle Morena wa mašaba Ramaatla wa Isiraele, o re: Agaa! Ke tlo thuba pelo ka go otla ba ntlhoyago, ka itefeletša go manaba a ka. ₂₅Tsogo la ka le tlo lwa le wena; manyedi a gago ke tlo a bušetša meubeng, ka ntšha morodu ka moka go wena. ₂₆Ke tlo buša ke go nea baahlodi bjalo ka mohlamonene. Ke mo o tlogo thwe motse wa toko, legae la ruri.

₂₇Tsione go tlo lopollwa ka go ya ka molao; ba ba boetšego gona ba tlo lopollwa ka toko. ₂₈Bahlanogi bona, le ba dibe, ba tlo pšhatlaganywa bohle, gwa tlo fedišwa bahlala Morena.

₂₉Ba tlo lewa ke dihlong ka baka la merula ye le bego le e kganyoga; le tlo šegama ka baka la mašemo a le bego le ithlaolela. ₃₀Gobane le tlo swana le morula wo o omilego matlakala, le tšhemo ye e se nago monola. ₃₁Wa lehumagadi o tlo etša letlala la matlakala, mme modiro wa lona o tlo etša hlasana ya mollo, a tlo swa ga mmogo le tša gagwe, gwa hlokwa wa go tima mollo.