HOSEA 4

₁Hee lena Baisiraele! Kwang lentšu la Morena! Gobane Morena o ne kgang le beng ba naga ye, ka go re nageng ye go se therešo, go se botho, go tseba Modimo. ₂Tše di lego gona ke maroga le maaka le polao le bohodu le go otswa. Ba thuba nywako, mme ba hlatlamanya melato ya madi. ₃Molato ke wona woo ge naga e lla, ge baagi ba notlega, ge go fela diphoofolo tša nageng le nonyana sebakeng, le dihlapi tša lewatle.

₄Go bjalo; go se be e a ganetšago, go se be le a kgopetšago; gobane setšhaba sa geno eke se ganetša baperisita. ₅Bjale o tlo kgopša e le mosegare; le mmoni o tlo kgopša nago e le bošego; mme mmago ke tlo mo fediša. ₆Tšhaba sa ka se feletše ka go hloka tsebo, ka gobane tsebo e nyaitšwe ke wena. Le nna ke tlo go nyatša, wa se hlwe o eba moperisita wa ka. Le bana bago ke tlo ba lebala, ka gobane o lebetše molao wa Modimo wa gago.

₇Mola ba fela ba ata, ba be ba atiša le dibe tša go ntshenya; bjalo letago la bona ke le fetola kgobogo. ₈Ba phela ka dibe tša setšhaba sa ka; ba rata ge batho ba oba molato. ₉Setšhaba le moperisita ba tlo swana ge ke latiša tsela tša bona, ke ba otla ke eya ka tiro tša bona. ₁₀Ba tlo ja mme ba se khore; ba tlo otswa ba se ate: gobane ba lahla Morena, ga ba mo re selo.

₁₁Dipelo di senywa ke bootswa le mabjalwa le sedila. ₁₂Tšhaba sa ka se rapela kwata ya sona; se laiwa ke diphatana tša sona; ke moya wa bootswa o se timetšago, ba hlanoga ba lahla Modimo wa bona. ₁₃Ba iša didimo dintlheng tša dithaba, ba tupiša diorelo godimo ga meboto, ba dira tšeo meruleng le merekureng le mo metholong, ka ge meriti ya gona e le e mebotse.

Ke tšona tše di otswišago barwedi ba lena le betši ba lena, ya ba dinonyana. ₁₄Barwedi bao ba lena le betši ba lena, nka se sole bona; ka gobane ke bolena le ngwegago le diotswa, le iša didimo le na le basadi ba dinonyana; mme setšhaba se hlokago mogopolo se wa ka tšona.

₁₅Ge wena Isiraele o šetše o le seotswa, a Juda a se tsene molatong! Le se ke la ya Giligala! Le se ke la rotogela Bethe-Abene! Le se ke la ena le re: Ka bophelo bja Morena! ₁₆Ge Isiraele a etša sethole se sešo sa thapa, a Morena o tlo ba fudiša boka dikwanyana molaleng? ₁₇Efuraimi o šetše a gwerane le medimo ya diswantšho; mo leseng. ₁₈Bohori bja bona bo šetše bo befile; ba ile le bootswa; thwadi mo go bona ke ba ratago tša dihlong. ₁₉Ledimo le tlo ba tšea ka diphego tša lona; mme didimo tša bona di tlo ba leša dihlong.