HOSEA 10

₁Isiraele ke morara; o ikatladitše mme wa enywa. Ya re ge bana ba wona ba ata, gwa ata le dialetare tša medimo. Ge go tšwelela botse bja naga, ba napa ba tšweletša le botse bja diswantšho tša medimo. ₂Pelo tša bona di gobedi; bjale ba tlo otlwa; aletare tša bona di tlo phušolwa, swantšho tša bona tša pšhatlaganywa.

₃Ba šetše ba re: Ga re na kgoši; le Morena ga re mmoife; kgoši e ka re hola kang? ₄Ba bolabola tša lefela, ba ena ka maaka; ba fela ba lakana. Bjale kotlo e tlo mela boka bore mašemong.

₅Basamaria ba tšhogile ka baka la namane ya Bethe-Abene: batho ba gona ba lla ka baka la yona: le bomphamodimo ba yona ba go hlakela letago la yona, ba re: Di a re tloga! ₆Namane yeo e tlo išwa Asuri; e yo ba sebego go kgoši Rantwa; Efuraimi o tlo šala a šaraketšwe. Isiraele o tlo lewa ke dihlong, ge maano a gagwe a padile. ₇Samaria go fedile; kgoši ya gona e tlo ba legong le le tšewago ke noka. ₈Meboto ya Abene ya dibe tša Isiraele, e tlo thubja; godimo ga dialetare tša go tlo mela meetlwa le ditshehlo. Ke mo ba tlogo re: Hee dithaba, re ribegetšeng! Hee meboto, re weleng!

₉Hee Isiraele, o dirile dibe! O thomile mehla yela ya Gibea, ba sa eme moo. A ntwa yela ya go tlela batho bala ba dihlola ga se ya ba fihlela moo Gibea? ₁₀Ke tlo ba otla ka mo ke ratago; ba tlo tšwelwa dira ke ditšhaba, mohla ke ba otlago ka baka la ge ba fela ba boeletša go senya.

₁₁Efuraimi e be e le namane e thapilego, e tlwaetšego go goga; nna ka e tlema molala o mobotse wa yona, ka e diriša, ka re Juda o tlo lema, mme Jakobo a phophotha makokota. ₁₂Gwa thwe: Ipšaleleng toko, le bune lerato; ikgatheleng lehwiti, e sa le lebaka la go nyaka Morena, gore a tle a le nešetše toko boka pula. ₁₃Mme lena la lema bosenyi la buna bohloko, la ja dienywa tša maaka; gobane le be le botile ditsela tša lena, le bontši bja bagale ba lena. ₁₄Ke tšona di tlogo tsoša mpherefere o mogolo dileteng tša gago. Dibo tša gago tšohle di tlo šwalalanywa boka Salemane ge a šwalalanywa Bethe-Arabele mohla wa tlhabano, mmagobana a phungwa le bana ba gagwe. ₁₅Di le tlela di etšwa Bethele ka baka la bobe bja lena bjo bošoro. Kgoši ya Isiraele e tlo tloga e fedišwa ya ba moka.