BAHEBERE 5

₁Moperisita e mogolo ofe le ofe e be e le wa go tšwa bathong gore a lake tša Modimo, gore a fihliše dibego le didimo ka baka la dibe, ₂e le motho e a kgonago go šokelwa bao ba sa tsebego le ba ba timeditšwego, ka ge le yena a rarilwe ke phokolo. ₃Ke ka baka leo go mo swanetšego ge a thoma go tliša sedimo sa go mo hlatswa dibe, a tsebo tliša sedimo sa setšhaba. ₄Le gona o be a sa ipee ka noši gore a godišwe; e be e le wa go bewa ke Modimo bjalo ka Arone.

₅Le yena Kriste ga a ka a ipea gore a godišwe ge a eba Moperisita e mogolo; o beilwe ke yo a boletšego le yena a re: O Morwa wa ka; lehono ke go tswetše. ₆Ke tšona tše a di boletšego mo gongwe a re: Moperisita wa neng le neng ke wena ka mokgwa wa Melekitsedeke.

₇Ke yena, yo mehleng a le motho a tlišitšego didimo tša dithapelo le ditopo le dillo tše thata le ka megokgo, a di fihliša go yo a kgonnego go mo phološa lehung; mme a kwewa a hlakodišwa poifong. ₈Le ge e be e le yena Morwa, o ithutile go kwa ka gona go tlaišega. ₉Gomme ge a fihletše bolo ka tlalo ka mokgwa woo, a ba thwadi ya go iša bohle ba ba mo kwago phološong ye e sa felego. ₁₀Ya ba yena yo Modimo a mmolelago a re: Moperisita wa neng le neng ke wena ka mokgwa wa Melekitsedeke.

₁₁Yena yo re na le ditaba tše ntši tša go mmolela le go le hlathollela; fela, le ba botšwa go theetšeng. ₁₂Gobane, le ge go swanetše le eba baruti ka go rutwa e le kgale, bjale go rata ge motho a boeletša go le ruta ditaba tša mathomo a thuto ya Modimo, ka ge le bile ba go fiwa lebese, e sego dijo tše di tiilego. ₁₃Gobane ge motho e sa le wa go fiwa lebese, gona ga a ešo a lemoga thuto ya toko, gobane o sa le lesea. ₁₄Ge e le dijo tše di tiilego ke tša ba ba godilego, ba ba ithutilego ba tlwaela go kgethologanya botse le bobe.