BAHEBERE 2

₁Bjale go rata gore re tiiše go hlokomela tše re di kwelego, gore di se tlo re timelela; ₂gobane mola go tlile Lentšu lela la go bolelwa ke barongwa, go le sela le go se kwe gohle ge go eba go oba kotlo ya gona. ₃Re tlo phonyokga bjang ge re ka nyatša phološo e kgolo ye, ye e thomilego ka go bolelwa ke Morena, ya tla ya tia mo go rena ka ba ba e kwelego, ₄mme Modimo a e hlatsela ka mehlolo, le ka matete, le ka ditiro tše maatla tša mehutahuta, le ka go abela batho Moya ka mo a ithatetšego ka gona?

₅Ge e le lefase le lefsa le re le bolelago, ga a ka a re le tlo bušwa ke Barongwa. ₆Hleng go na le bohlatse bja e a itšego: Motho ke eng ge o bile o sa mo lebale? Ngwana wa motho ke eng, ge o bile o mo ela hloko? ₇O mo hlaeditše ka gonyane a se be morongwa, wa mo hlama ka borena le letago, wa mmušiša mediro ya atla tša gago; tšohle wa di bea ka tlase ga nao tša gagwe. ₈Ge go thwe: o beile tšohle ka tlase ga nao tša gagwe, ke go re: ga a ka a šadiša se a sa kago a se bea gona; gomme ga re ešo ra bona motho ge a bušišwa tšohle. ₉E a feditšego lebakanyana a hlaeditšwe a se lekane le Morongwa, ke Jesu yo re mmonago a hlamilwe ke borena le letago ka tsela ya go tlaišwa le ya go hwa; gore ka kgaugelo ya Modimo a kwe lehu ka baka la bohle. ₁₀Gobane Modimo o bone ge go swanetše, ge yena eo legohle le lego gona ka baka la gagwe, mme la ba gona ka yena, ge yena wa go iša bana ba bantši letagong, a eba thwadi ya phološo, a tšea bolokatlalo ka go tlaišega.

₁₁Gomme ka ge yena Mokgethabatho, le bao a ba kgethago, ba na le Tatabo o tee, ga a itšimeletše go re batho ke bana babo, ₁₂a tla a re: A nke ke begele bana bešo ina la gago, ke go rete phuthegong. ₁₃A buša a re: Ke tlo dula ke mo lebeletše; a iša pele a re: Ke nna e, le bana ba Modimo a mphilego bona.

₁₄Bjale ka go itira selo se tee le bana bao, ka go ba nama e tee le madi a tee le bona, o fentše Diabolo e a bego a na le maatla a lehu; o mo fentše ka go hwa ga gagwe, ₁₅a golola bao e bego e le batlengwa ka go boifa lehu mehla yohle ge ba sa phela. ₁₆Tšeo ga se tše a di diretšego Barongwa; o di diretše bana ba Aborahama. ₁₇Gomme go be go swanetše ge a eba e a swanago le bana babo ka tšohle, gore a be wa go ba kwela bohloko, a be Moperisita e Mogolo e a botegetšego Modimo, a kgone go hlatswa setšhaba dibe. ₁₈Gobane ba ba lekwago o kgona go ba lwela, ka ge le yena a tlaišegile a lekwa.