BAHEBERE 1

₁Modimo kgale o boletše le botatawešo gantši le ka mekgwa e mentši ka Baporofeta; ₂Mehleng yeno ya bofelo a tla a bolela le rena ka Morwa yo a mmeilego mojabohwa wa tšohle, e le yo a dirilego legohle ka yena. ₃Gomme yena eo, e le yena seetša sa go tšwa letagong la Modimo, e lego yena sewantšho sa lebopo le Modimo a lego ka lona, e le yena e a rwalago legohle ka maatla a lentšu la gagwe, o itirile tlhatso ya go hlatswa dibe; a ya a dula ka letsogong le letona la bogoši bja magodimong.

₄A phala barongwa ka bogolo ka go tšea bohwa bja leina le le fetago a bona ka bogolo. ₅Gobane ke ofe morongwa yo a kilego a bolela nae a re: O Morwa wa ka; lehono ke go tswetše, a buša a re: Ke tlo ba tatagwe; mme yena e tlo ba Morwa wa ka! ₆A boeletša mola a sebela lefase go tla ga Morwa wa gagwe a re: Barongwa bohle ba Modimo ba tlo lotšha yena. ₇Barongwa bona ge a ba bolela o re: Meoya o e dira barongwa ba gagwe; bahlanka ba gagwe ke kgabo tša mollo. ₈Ge e le Morwa o mmolela a re: Sedulo sa gago, wena Modimo, ke sa neng le neng; lehlotlo la gago la bogoši ke lehlotlo la go loka. ₉O rata gona go loka; o hloya bokgopo. Ke ka baka leo, wena Modimo, Modimo wa gago a go beilego kgoši, a go tlotša makhura a lethabo, gwa hlokwa mokawena. ₁₀A buša a re: wena Morena, o wa mola o thea lefase; mme magodimo ke tiro tša atla tša gago. ₁₁Mme ona a tlo ba a loba, wena wa tlo šala o le gona; ona a tlo onala ohle boka kobo. ₁₂A tlo šatolwa boka seaparo a fetoga. Wena o tlo dula o le se o lego sona, mme nywaga ya gago e ka se ke ya ba ya fela. ₁₃Le gona ke ofe wa barongwa yo a mmoditšego a re: Dula ka letsogong laka le letona, ke be ke dire manaba a gago bogato bja nao tša gago?

₁₄Ka moka ga bona a ga se meoya ya go hlankela ba bangwe, meoya ya go rongwa ya yo direla bao ba go tlo ja bohwa bja phološo?