GENESI 46

₁Bjale Isiraele a khuduga le dilo tša gagwe ka moka. Ge a fihlile Beresaba, a hlabela Modimo wa Isaka tatagwe dihlabelo. ₂Gomme Modimo a bolela le Jakobo ka pono, bošego, a re: Jakobo! Jakobo!

Yena a re: Ke nna e!

₃Modimo a re: Ke nna Modimo, Modimo wa tatago. O se ke wa boifa go fologela kua Egipita, ka gobane gona kua ke tlo go dira setšhaba se segolo. ₄Nna ka noši ke tlo ya le wena kua Egipita; gomme e a tlogo go ntšha gona kua ke nna; gomme e a tlogo budulatša mahlo a gago ke Josefa.

₅Gomme Jakobo a tsoga Beresaba. Barwa ba Isiraele ba nametša Jakobo tatabo, le bana ba bona, le basadi ba bona, dikoloi tše Farao a di rometšego go ba nametša. ₆Ba tlogile le diruiwa tša bona, le dithoto tša bona, tše ba di bonego nageng ya Kanana, mme ba fihla Egipita, Jakobo gotee le bana ba gagwe; ₇e be e le barwa ba gagwe, le bana ba barwa ba gagwe, le barwedi ba gagwe, le barwedi ba barwa ba gagwe. Bana ba gagwe ka moka ba ile Egipita ba na nae.

₈Maina a barwa ba Isiraele ba ba ilego Egipita šea; ke a Jakobo le barwa ba gagwe: Ke Rubeni wa maitšibulo a Jakobo. ₉Barwa ba Rubeni ke Hanoge, le Palu, le Hetserone, le Karami. ₁₀Barwa ba Simeone ke Jemuele, le Jamini, le Ohada, le Jakine, le Tsohara, le Saulo morwa wa mosadi wa Mo-Kanana. ₁₁Barwa ba Lefi ke Gerisone, le Kehate, le Merari. ₁₂Barwa ba Juda ke Ere, le Onane, le Sela, le Pheretse. Ere le Onane ba hwetše nageng ya Kanana. Barwa ba Pheretse ke Hetserone le Hamulu. ₁₃Barwa ba Isashara ke Thola, le Pufa, le Jobo, le Simerone. ₁₄Barwa ba Sebulone ke Serede, le Elone, le Jahalele. ₁₅Ke bona barwa ba Lea, bao a ba belegetšego Jakobo kua Mesopotamia, le Dina morwedi wa gagwe. Meoya ka moka ya batho ba e bego e le barwa ba gagwe le barwedi ba gagwe, e be e le batho ba masome a mararo le metšo e meraro.

₁₆Barwa ba Gada ke Tsifone, le Hagi, le Suni, le Etsebone, le Eri, le Arodi, le Areli. ₁₇Barwa ba Asere ke Jimina, le Jisifa, le Jisifi, le Beria, le Sera kgaetšedi ya bona. Barwa ba Beria ke Hebere le Malakiele. ₁₈Ke bona barwa ba Silipa, yo Labane a mo neetšego Lea morwedi wa gagwe, a belegela Jakobo bana bao, batho ba lesome le metšo e selelago.

₁₉Barwa ba Rahele mosadi wa Jakobo ke Josefa le Benyamini. ₂₀Josefa o belegetšwe Manase le Efuraimi a le nageng ya Egipita; ke bona bana ba Asenatha morwedi wa Potifera moperisita wa Oni. ₂₁Barwa ba Benyamini ke Bela, le Bekere, le Asebele, le Gera, le Naamani, le Egi, le Rosi, le Mopimi, le Hupimi, le Arede. ₂₂Ke bona barwa, ba Rahele a ba belegetšego Jakobo; ka moka ke batho ba lesome le metšo e mene.

₂₃Barwa ba Dani ke Husimi. ₂₄Barwa ba Nafutali ke Jahasele, le Guni, le Jesere, le Sileme. ₂₅Ke bona barwa ba Biliha yo Labane a mo neetšego Rahele morwedi wa gagwe. Ke bona bao ba a ba belegetšego Jakobo; ka moka ke batho ba ba šupago.

₂₆Batho ka moka ba ba ilego Egipita le Jakobo, ba ba tswetšwego ke yena, e be e le masome a selelago le metšo e selelago. ₂₇Barwa ba Josefa ba ba mo tswaletšwego Egipita ke ba babedi. Batho ka moka ba lapa la Jakobo ba ba tlilego Egipita e be e le ba masome a šupago.

₂₈Jakobo o be a romile Juda a mo eta pele, gore a yo laetšwa la Gosene, ba sešo ba tla. Gomme ba fihla nageng ya Gosene. ₂₉Ya ba gona Josefa a tlemilego koloi ya gagwe, a tšwela go gahlanetša Isiraele tatagwe kua Gosene. Ge a tšwelela go yena, a mo gokarela a lla, a fetša lebaka a lla. ₃₀Ke mo Isiraele a boletšego le Josefa a re: Bjale gona nka no hwa, ka gobane ke bone sefahlogo sa gago, ka tseba gore o sa fela o phela!

₃₁Josefa a botša bana babo le ba lapa la tatagwe a re: Ke sa ya go begela Farao gore: Bana bešo le ba lapa la tate, ba ba bego ba le kua nageng ya Kanana, ba tlile go nna. ₃₂Ke tlo re: Batho bao ke badiši ba dihuswane, ka gobane tša bona ke mehlape; gomme ba tlile le dihuswane tša bona, le thoto ya bona ka moka. ₃₃Gomme ge Farao a ka le bitša, a le botšiša a re: Modiro wa lena ke eng? ₃₄Le fetole le re: Rena bahlanka ba gago, go tloga bonyenyaneng bja rena, le bjale, re barui ba mehlape, rena le botatawešo! Le realo gore le agišwe mo nageng ya Gosene; ka gobane Baegipita ba ila bohle ba ba dišago dihuswane.