GENESI 45

₁Ke mo Josefa a sa kago a hlwa a kgona go itiiša ge a lebane le bohle ba ba bego ba eme ba mo dikaneditše; a goeletša a re: A banna bohle ba tšwe, ba ntlogele fa. Gomme bjalo, ge Josefa a ikutolla go bana babo, go be go se motho e a bego a eme fao. ₂A hlatloša lentšu a lla; le Baegipita, ba ba ba di kwa; tša kwala le kua ntlong ya Farao. ₃Josefa a botša bana babo a re: Ke nna Josefa! A tate o sa phela? Mme bana babo ba šitwa go mo fetola; ba fo lebana nae ba gakanegile. ₄Josefa a buša a re: A nke le mpatameleng! Mme ba batamela. Yena a re: Ke nna Josefa ngwanabo lena, yo le mo rekišitšego a išwa Egipita. ₅Bjale le se ke la hlwa le belaela le setlega dipelo ka ge le nthekišitše ka tla mono. Ka gobane ge Modimo a ntlišitše fa, e be e le gore ke le ete pele; e be e le go phološa batho; ₆ka gobane bjale go fedile nywaga e mebedi ya tlala e wetšego lefase; gomme go setla nywaga e mehlano e se nago go lema le go buna. ₇Gomme nna Modimo o ntlišitše fa; ya ba go le eta pele, gore le se ke la fedišwa mo lefaseng, gore le phedišwe le be lešaba le legolo la baphološwa. ₈Bjale ga se lena; ke Modimo e a ntlišitšego fa; o mpeile gore ke be tata go Farao, ke be molaodi wa ngwako wa gagwe ka moka, le mmuši wa naga ka moka ya Egipita.

₉Akgofišang le ye go tate, le mmotše le re: Josefa morwa ga gago o re: Modimo o mpeile ka ba molaodi wa la Egipita ka moka; tlaa go nna, o se diege. ₁₀O tlo aga nageng ya Gosene, gore o be kgauswi le nna, wena le bana ba gago, le dihuswane tša gago, le dilo tšohle tša gago. ₁₁Ke tlo go babalela o le fa, ka gobane go se tla nywaga e mehlano ya tlala. Tlaa, gore o se tlo ba modiidi, o na le ba lapa la gago, le dilo tšohle tša gago.

₁₂Gomme bjale, le di bona ka mahlo, le Benyamini monnake o di bone ka mahlo, ge e le molomo wa ka o bolelago le lena. ₁₃Le laodišetše tate tša bogolo bja ka ka moka bja mono Egipita, le tšohle tše le di bonago; mme le akgofišeng le tle mono le na le tate.

₁₄Bjale a gokarela Benyamini monnagwe, mme a lla. Le Benyamini a lla a mo gokaretše. ₁₅Bana babo ka moka a ba atla, a llela go bona; gona le bana babo ba kgona go bolela le yena.

₁₆Gomme tumo ya gore, bana babo Josefa ba tlile, ya fihla le mo ngwakong wa Farao. Mme Farao le bahlanka ba gagwe ba di thabela. ₁₇Farao a bolela le Josefa a re: Botša bana beno o re: Dirang se: Belešang makaba a lena le ye nageng ya Kanana, ₁₈le tšee tata weno le ba lapa la geno, mme le tle go nna. Ke tlo le nea lona lešofo la naga ya Egipita; mme le tlo ja lehura la naga. ₁₉Le gona nna ke re ba botše o re: Dirang se: Tlogang le dikoloi tša mono Egipita tša go tlo rwala digotlane tša lena, le basadi ba lena; le nametše tata weno mme le tle. ₂₀Le se ke la belaela thoto ya lena, ka gobane tše botse tša naga ka moka ya Egipita e tlo ba tša lena.

₂₁Barwa ba Isiraele ba dira ka mokgwa woo. Josefa o ba file dikoloi ka taelo ya Farao, a ba fa le mefago ya tsela. ₂₂Bona ka moka a ba nea dikobo tša monyanya; ge e le Benyamini, yena o mo neile diripana tše makgolo a mararo tša silibera le kobo tše tlhano tša monyanya. ₂₃Tatagwe o mo rometše dipokolo tše lesome, tše di rwelego tše botše tša naga ya Egipita, le dipokolo tše lesome tše di rwelego mabele, le dinkgwa, le mefago ya tatagwe ya tsela. ₂₄A kgona a laelana le bana babo. Ge ba wela tsela, yena a re: Le se ke la tšama le tšere kgang!

₂₅Mme ba rotoga ba etšwa Egipita, ba fihla nageng ya Kanana go Jakobo tatabo. ₂₆Ba mo anegela ba re: Josefa o sa fela a phela! Ba re: Gomme mmuši yola wa naga ya Egipita ke yena! Eupša pelo ya gagwe e be e lapile, mme o be a sa ba dumele.

₂₇Bona ba mo laodišetša mantšu ka moka a a laetšwego ke Josefa; mme ya re ge a bona dikoloi tše Josefa a di rometšego go mo nametša, moya wa Jakobo tatabo wa hlabologa. ₂₈Gomme Isiraele a re: Go hwetše! Josefa ngwanake o sa phela. Ke tlo ya ke mmone ke sešo ka hwa.