GENESI 30

₁E itše ge Rahele a bona a sa belegele Jakobo bana, a tsebafela mogolwagwe, mme a bolela le Jakobo a re: Mphe bana! Ge ke se ne bana ke tlo hwa.

₂Jakobo a mo kgala a re: A o ntira Modimo, wa re ke nna ke go ganago le bana?

₃Rahele a re: Biliha šo, ke molata wa ka. Tsena go yena gore a mpelegele wa go tlo dula difarong tša ka, ke bone bana ka yena. ₄A mo fa Biliha molata wa gagwe, a ba mosadi wa gagwe; mme Jakobo a tsena go yena. ₅Biliha a ima, a belegela Jakobo ngwana wa lesogana. ₆Ke mo Rahele a itšego: Modimo o nkahloletše, o bile o kwele le lentšu la ka, a mpha morwa. Mme a mo reela la Dani (Moahloledi). ₇Biliha molata wa Rahele a ima gape, a belegela Jakobo ngwana e mongwe wa lesogana. ₈Ke mo Rahele a itšego: Katano ya Modimo! Ke katane le mogolwake ka ba ka fenya. Mme a mo reela leina la Nafutali (Katano ya ka).

₉Lea yena ge a bona a gomile, a tšea Silipa molata wa gagwe, a mo neela Jakobo ya ba mosadi wa gagwe. ₁₀Silipa molata wa Lea a belegela Jakobo ngwana wa lesogana. ₁₁Ke mo Lea a itšego: Ke lešego! Mme a mo reela la Gada (Lešego). ₁₂Silipa molata wa Lea a buša a belegela Jakobo ngwana wa lesogana. ₁₃Ke mo Lea a itšego: Ke wa mahlatse! Bjalo barwedi ba batho ba tlo re ke wa mahlatse. Mme a mo reela leina la Asere (Mahlatse).

₁₄Ka tšatši le lengwe la ge go bunwa Rubeni o tšwele a hwetša maropotlane nageng, a a tliša go Lea, go mmagwe. Rahele a kgopela Lea a re: Hlalla maropotlane a ngwana wa gago.

₁₅Lea a re: A o re ke taba e nyenyane ge o nkamogile monna wa ka? Bjale o re o nkamoge le maropotlane a ngwana wa ka!

Rahele a re: A a robale le wena bošego bja lehono; wena o mphe maropotlane a ngwana wa gago.

₁₆Ka mantšiboa ge Jakobo a boa a etšwa mašemong, Lea a tšwela go mo gahlanetša, a bolela le yena a re: Tlaa go nna; ke go rekile ka maropotlane a ngwanake. Bošego bjoo Jakobo a tsena go yena.

₁₇Gomme Modimo a dira se Lea a se kgopetšego; Lea a ima, a belegela Jokobo ngwana wa lesogana, wa bohlano. ₁₈Ke mo Lea a itšego: Modimo o mphile moputso wa ka, ka ge monna wa ka ke mo file molata wa ka. Mme a mo reela leina la Isashara (Wa moputso). ₁₉Lea a ima gape, a belegela Jokobo ngwana wa lesogana, wa go selela. ₂₀Ke mo Lea a itšego: Modimo o mphile neo e botse; bjale monna wa ka o tlo nkgodiša, ka ge ke mmelegetše barwa ba ba selelago. Mme a mo reela leina la Sebulone (Kgodišo). ₂₁A fetša ka go belega ngwana wa mosetsana, a mo reela la Dina (Kahlolelo).

₂₂Bjale Modimo a gopola Rahele, a mo dira se a se kgopetšego, a mo hunolla. ₂₃A ima, a belega ngwana wa lesogana a bolela a re: Modimo o nthotše nyatšego. ₂₄Ngwana eo a mo reela leina la Josefa (O tlo ekeletša); ka ge a itše: Modimo o tlo nkekeletša ka morwa e mongwe.

₂₅Bjale mehla yeo, Rahele a seno belega Josefa, Jakobo o boletše le Labane a re: Mphe tsela, ke boele gae nageng ya gešo. ₂₆Neele basadi ba ka le bana ba ka, bao ke go diretšego ka baka la bona, mme ke sepele: ka gobane bohlanka bjaka ge ke go hlankela le wena o a bo tseba.

₂₇Labane a fetola a re: A nke ke hwetše mahlo a gago a ntebeletše ka botho; ke lemogile gobane Morena o ntšhegofatša ka baka la gago. ₂₈A re: Mpeele moputso wa gago, mme ke tlo go neela.

₂₉Jakobo a re: O tseba ka mo ke go diretšego ka gona, le se mohlape wa gago o tlilego wa ba sona o na le nna. ₃₀Ke go hweditše o na le mohlatswana; bjalo ke bontši bjo bogolo: Morena o go šegofaditše mo go gatilego dinao tša ka. Bjalo nna ke tlo ikagela neng ngwako wa ka?

₃₁Labane a re: Ke tlo go neang?

Jakobo a re: O se ke wa mpha selo. Ke tlo buša ke diša dihuswane tša gago ge o ka ntumelela se: ₃₂Ge nna lehono nka sepela le dihuswane tša gago ka moka, ka kgetha dinku tšohle tše kgwana le tše tshegana le tšohle tše phifadu, le dipudi tšohle tše tshegana le tše kgwana; tšona tšeo ya ba moputso wa ka. ₃₃Mme ka moso bohlatse bja ge ke botega e tlo ba ge wena o ka tla wa bona tše e lego moputso wa ka; gomme ye o tlogo e hwetša e se e kgwana, le ge e se e tshegana, o tlo re ke e utswitše.

₃₄Labane a re: Go lokile; a go be bjalo ka ge o boletše. ₃₅Ka tšatši leo a kgetha diphokwana tše mebala le tše tshega, le dipudi ka moka tše nakgwana le tše nasegana, tšohle tše di nago le bošweu, le dikwana tšohle tše di naphifadu, mme a di gafela barwa ba gagwe. ₃₆Mme Labane a re, meraka ya Jakobo e be go šele, mo motho a fihlago a sepetše matšatši a mararo. Jakobo yena a šala a diša dihuswane tše di šetšego e le tša Labane.

₃₇Mme Jakobo a tšea diphata tša molokga, le tša moretlwa, le tša moduhlare, a sehla ditswata tše tšhweu; bošweu bja tšwelela diphateng tšeo. ₃₈Diphata tšeo a di bea megopong ya go nwela meetse, mo dihuswane di nwago gona tša di bona, mme tša goelana gona. ₃₉Tša goelana di bone diphata tšeo; bjale tša tswala tše mebala le tše kgwana le tše tshegana.

₄₀Tšona Jakobo a di hlaola, dikwana le diputšana; a fela a hlakanya dihuswane tšohle tša Labane le tše mebala, le tše phifadu. Ya gagwe mehlape a e kgethela go šele, a se ke a e hlakanya le dihuswane tša Labane.

₄₁Ka mehla ge go goelana tše di tsetetšego, Jakobo o beile diphata tšela megopong, tša di bona ge di goelana. ₄₂Eupša ge dihuswane di gwametšwe, a se ke a di bea. Ka mokgwa wo tša Labane ya ba tše di gwametšwego, tša Jakobo ya ba tše di tsetetšego. ₄₃Mme Jakobo a ba monna e a ruilego tše ntšintši, a ba le dihuswane tše ntši, le balata ba basadi le ba banna, le dikamela le dipokolo.