GENESI 14

₁Šedi tša mehla ya Amorafele kgoši ya Sineara, le Ariogo kgoši ya Elasara, le Kedorolaomere kgoši ya Elama, le Thidala kgoši ya ditšhaba. ₂Bona bao ba šwahletše Bera kgoši ya Sodoma, le Birisa kgoši ya Adema, le Semebere kgoši ya Tseboima, le kgoši ya Bela e lego motse wa Tsoare. ₃Bona ba ka moka ba phuthegela moeding wa Sidima, mo go lego lewatle la letswai. ₄Ba be ba feditše nywaga e lesome le nywaga e mebedi ba loba Kedorolaomere; mme ba mo hlanogela ka ngwaga wa lesome le metšo e meraro. ₅Bjale ka ngwaga wa lesome le metšô e mene Kedorolaomere a tla, a na le dikgoši tšela. Ba fenya Barefai motseng wa Asiterote-Karanaima; ba fenya le Balusi motseng wa Hama, le Baemi mo moeding wa Kiryataima; ₆ba fenya le Bahori dithabeng tša bona tša Seire, ba fihla Eiliparane go bapetšego le lešoka. ₇Ba boa ba tla sedibeng sa Misipata, ke gona Kadese, ba fenya naga ka moka ya Baamaleke, le ya Baamoro ba ba bego ba agile Hatsatsone-Thamara.

₈Ke mo kgoši ya Sodoma e tšwilego dira, le kgoši ya Gomora, le kgoši ya Tseboima, le kgoši ya Bela, e lego Tsoare; ba tla ba itlhamile ba ema moeding wa Sidima. ₉Ba hlabana le Kedorolaomere kgoši ya Elama, le Thidala kgoši ya ditšhaba, le Amorafele kgoši ya Sineara, le Ariogo kgoši ya Elasara; dikgoši tše nne tša lwa le dikgoši tše tlhano. ₁₀Gona fao moeding wa Sidima go be go na le madiba a motimmu; bjale kgoši ya Sodoma le kgoši ya Gomora ge di tšhaba tša wela madibeng ao, mašalela a tšhabela dithabeng. ₁₁Gomme ba thopa maruo ka moka a Sodoma le a Gomora, le dijo ka moka, mme ba tloga. ₁₂Ba thopa le Loto morwa wa ngwanabo Aborama, le maruo a gagwe; ka gobane o be a agile Sodoma; mme ba tloga.

₁₃Gwa tla motšhabi, a di tsebiša Aborama Mohebere. Yena o be a agile sethokgweng sa Mamure Moamoro, e a bego a le ngwanabo Esikolo, le ngwanabo Anere; bona bao e be e le bagwera ba Aborama. ₁₄Bjalo ge Aborama a ekwa gore ngwanabo o thopilwe, a ntšha bahlanka ba gagwe ba ba botegilego, ba ba tswaletšwego motseng wa gagwe, e le ba makgolo a mararo le lesome le metšo e seswai; a hlomarela bala a fihla Dane. ₁₅A kgetha bahlanka ba gagwe ya ba dihlopha, a ba šwahlela e le bošego, a ba fenya, a ba hlomarela a goma Hoba, go bapetšego le Damaseko ka thoko ya sa ntšhogošo. ₁₆A thopolla maruo ka moka; a thopolla le Loto ngwanabo, le maruo a gagwe le basadi, le balata.

₁₇Bjale ge a tšwa go boa a fentše Kedorolaomere le magoši a a bego a na le yena, kgoši ya Sodoma ya tšwa ya mo gahlanetša moeding wa Sabe, moeding wa kgoši. ₁₈Le Melekitsedeke kgoši ya Salema a tliša senkgwa le beine; yena e be e le moperisita wa Modimo yo godimodimo. ₁₉Yena o šegofaditše Aborama a re: Aborama o šegofaditšwe ke Modimo yo godimodimo, Mohlodi wa legodimo le lefase. ₂₀A go tumišwe Modimo yo godimodimo, e a gafetšego manaba a gago diatleng tša gago. Mme Aborama a mmegela ka sa lesome sa tšohle.

₂₁Bjale kgoši ya Sodoma ya bolela le Aborama ya re: Nna nneele batho; wena o tšee maruo.

₂₂Aborama a fetola a re: Ke ena ka Morena Modimo yo godimodimo, Mohlodi wa legodimo le lefase. ₂₃Nka se ke ka tšea le lenti, le ge e le lerala la seeta, le ge e le eng le eng se e lego sa gago; gore o se tlo re: Ke humišitše Aborama. ₂₄Ge e se tše di llwego ke masogana, le karolo ya banna bao ba ba ilego le nna, Anere le Esikolo le Mamure; bona a ba tšee karolo ya bona.