BAGALATIA 5

₁Kriste o re lokololetše tokologo. Emang ge le tie, gore le se boele ditlemong tša bohlanka.

₂Sedio! Nna Paulo ke le botša ke re: Ge le bolla, Kriste a ka se ke a le hola selo. ₃Ke buša ke hlatsela motho mang le mang e a bollago, ke re o swanetše go dira tšohle tše Molao o di bolelago. ₄Gomme ba le rego le lokafala ka Molao, le kgaogana le Kriste, le tlogile kgaugelo. ₅Ge e le rena, seholofelwa seo sa go re re lokafale, re se lebeletše ka Moya le ka tumelo. ₆Gobane mo go Kriste Jesu go bolla le go se bolle ga di kgone selo; go kgona tumelo e dirago ka lerato.

₇Le be le wetše tsela e botse. Le šiteletšwa ke mang ge le sa hlwe le ekwa therešo? ₈Wa go le thišiša ga se eo a le biditšego. ₉Komelwana e nyane e bediša bogobe ka moka. ₁₀Ge e le nna ke le botile Moreneng gore le ka se hlanoge; gomme e a le ferekanyago o tlo rwala molato, le ge e ka ba mang le mang.

₁₁Gomme nna, bana bešo, ge ba re ke sa ruta lebollo, ke tlaišetšwang? Ge go ka be go le bjalo, hleng kgopišo ya sefapano e ka be e fedišitšwe. ₁₂Bona bao ba go le ferekanya, ba leseng ba itshegake.

₁₃Gobane lena bana bešo, le bile ditšwe tokologo. Fela, a e se be tokologo ya go fa nama sebaka. Sa lena a e be go direlana ka lerato. ₁₄Gobane Molao ka moka o akaretšwa ka Lentšu le tee le le rego: Wa geno o mo rate ka mokgwa wo o ithatago ka wona. ₁₅Fela ge le lomana, le jana, le bone gore le se tlo fedišana.

₁₆Swarang tsela le išwa ke Moya, ke mo le tlogo lesa go phetha ditumo tša nama. ₁₇Tše nama e di dumago, di loša Moya; gomme tše Moya o di dumago, di loša nama. Dilo tšeo di a ganana; di le šitiša go dira se le se ratago. ₁₈Gomme ge le dumela go hlahliwa ke Moya, ga le sa bušwa ke Molao.

₁₉Mediro ya nama yona e pepeneneng; ke tlhalo, le bootswa, le ditšhila, le bohlotlolo. ₂₀Ke go hlankela medimo, le boloi, le tlhoyano, le dintwa, le pefelo, le bogale, le ditshele, le bogarigari. ₂₁Ke mona, le polao, le botagwa, le bohori, le tše di swanago le tšeo, tše ke felago ke le botša bjalo ka ge ke le boditše kgale ka re: Ba ba dirago tše bjalo ba ka se je bohwa mmušong wa Modimo.

₂₂Dienywa tša Moya, tšona ke lerato, le lethabo, le molao; ke go se fele pelo, le botho le bonolo, le potego le boleta, le boitshwaro. ₂₃Tše bjalo ga di ganwe ke Molao. ₂₄Gomme ba e lego ba Jesu Kriste ba kokotetše nama sefapanong gotee le ditumo le dikganyogo. ₂₅Ge re phela ka Moya, gona a re swareng tsela re išwa ke wona Moya. ₂₆Re se ke ra ba ba go kgantšha lefela, le ba go rumolana, le ba go tsebafelana.