BAGALATIA 3

₁Joo Bagalatia! Lena mašilo! Le loilwe ke mang ge le sa kwe therešo? Lena ba go swantšhetšwa mmapolwa Jesu Kriste la ka le mmona ka mahlo! ₂Se ke ratago ge le ka mpotša sese: A Moya o mokgethwa le o bone ka mediro ya Molao, goba le o bone ka go kwa tša tumelo? ₃A le mašilo a makaakaa? La re go thoma ka Moya, la yo feletša ka nama? ₄Go tlaišwa gakaakaa ga lena e be e le ga lefela? A e be e le ga lefela ruri? ₅E a le abetšego Moya, e a dirilego mehlolo mo go lena a o dirišitšwe mediro ya Molao, goba o dirišitšwe ka go kwa tša tumelo?

₆Bjalo ka ge Aborahama a dumetše Modimo, mme Modimo a mmalela tumelo yeo a re ke toko, ₇Tsebang ge! Ba e lego ba tumelo ke bona bana ba Aborahama. ₈Ke gore Mangwalo a be a dutše a bone gore Modimo o tlo lokafatša bantle ka tumelo, a napa a holofediša Aborahama, a re: Meloko ka moka ya lefase e tlo šegofatšwa ka wena. ₉Anthe go šegofatšwa ba e lego ba tumelo gotee le Aborahama e a dumetšego.

₁₀Gobane ba e lego ba mediro ya Molao, ba rogilwe ka ge gwa thwe: Morogwa ke e a sa tiišego go dira tšohle tše di ngwadilwego pukung ya Molao. ₁₁Gobane pele ga Modimo ga go e a lokafalago ka Molao. Moloki o tlo phela ka tumelo. ₁₂Molao ga o na taba le tumelo; gobane tša Molao di boletšwe gwa thwe: Ge motho a dira tša wona, o tlo phela ka tšona.

₁₃Kriste o re rekolotše thogong ye ya Molao ka go ba morogwa bakeng sa rena, ka gobane go ngwadilwe gwa thwe: E a fegilwego kwateng o rogilwe. ₁₄Go bile bjalo gore tšhegofatšo ya Aborahama e fihlele ditšhaba tšohle ka Jesu Kriste, gore tše di holofedišitšwego ke Moya, re di amogele ka tumelo.

₁₅Bana bešo! Ke bolela ka mokgwa wa batho, ke re: Ge kgwerano ya batho e tlemilwe, go ka se be le e a e fedišago le e a kago e ekeletša. ₁₆Tše Aborahama a di boditšwego e le kholofedišo, di lebane peu ya gagwe. Ga go thwe: Dipeu, eke ke tše ntši. Go bolelwa peu e tee, ge go thwe: Ka peu ya gago. Mme yona peu yeo ke Kriste. ₁₇Bjale nna ke re: Kgwerano ye Modimo a e tlemilego e šupa Kriste, e ka se re ge go fetile nywaga e makgolo a mane a nago le masome a mararo, ya tla ya fedišwa ke Molao, gwa senywa kholofedišo yela. ₁₈Ge bojabohwa bo ka be bo etšwa Molaong, gona bo ka be bo sa tšwe kholofedišong yeo. Ge e le Aborahama, Modimo o mo seditše ka yona kholofedišo.

₁₉Bjale Molao ke wa go reng? -- O beilwe wa hlatlama kholofedišo ka baka la dikarago, gore go be go fihle Peu ye e bolelwago ke kholofedišo. Gomme Molao wa laetšwa ka Barongwa ka seatla sa Khumedi. ₂₀Khumedi ga se ya go humela o tee fela; yo e lego o tee ke Modimo.

₂₁Bjale Molao, a o ganana le kholofedišo tša Modimo? Ga go bjalo! Gobane ge re ka be re neilwe Molao o nago le maatla a go phediša, gona go lokafala go ka be go etšwa go wona Molao. ₂₂Fela, Mangwalo a tlemile tšohle ka sebe, gore se se holofedišitšwego se tle se newe ba ba dumelago, ba se bone ka tumelo ya go dumela Jesu Kriste.

₂₃Mola tumelo e sešo ya tla, re be re sa etetšwa ka Molao, re sa tlemilwe ke wona, re letetše tumelo e bego e tlo utollwa. ₂₄Molao ya ba moetetši wa go re iša go Kriste, gore re tle re lokafatšwe ka tumelo. ₂₅Gomme bjale ge tumelo e tlile, ga re sa bušwa ke moetetši eo.

₂₆Gobane ka moka le bana ba Modimo ka tumelo ya go dumela Jesu Kriste. ₂₇Gobane ka moka ba le kolobeditšwego la ba ba Kriste, le apere yena Kriste. ₂₈Moo ga go hlaolwe Mojuda goba Mogerika; ga go mohlanka goba mohunologi; ga go monna goba mosadi; le batee ka moka ka Jesu Kriste. ₂₉Gomme ge le le ba Kriste, ke gona ge le le peu ya Aborahama le baji ba bohwa ka kholofedišo.