HESEKIELE 43

₁A buša a nkiša kgorong, kgorong e lebilego bohlabela. ₂Ka bona go etla letago la Modimo wa Isiraele le etšwa thoko ya bohlabela. Ka kwa modumo wa lona o etša modumo wa meetse a magolo; lefase la bonegelwa ke letago la gagwe. ₃Ka bona pono e etšago yela ye nkilego ka e bona mohla wola a tlile go senya motse, le yela ka go e bona nokeng ya Kebara mme ka khunama ka lotšha. ₄Letago la Morena la tla la tsena Ntlong le tlile ka tšela ya kgoro e lebilego bohlabela.

₅Moya wa nkuka wa nkiša lapeng la ka gare, ka bona Ntlo e tletše letago la Morena. ₆Ka kwa e mongwe a bolela le nna a le mo Ntlong, monna yola a sa eme hleng ga ka. ₇A bolela a re: Ngwana motho! Felo fa ke mo go lego sedulo sa ka sa bogoši; ke mo go gatago nao tša ka; ke mo ke tlogo dula gare ga Baisiraele go ya go ile. Mme ba moloko wa Isiraele le magoši a bona ba ka se hlwe ba goboša ina la ka le lekgethwa ka mabootswa a bona le ka ditoto tša magoši a bona mohla a hwago. ₈Ke tša mola ba sa bapeditše direpodi tša bona le direpodi tša ka, le dijakwana tša bona di sa batagane le dijakwana tša ka; re fatagane ka leboto fela. Ba sentše ina la ka le lekgethwa ka mabohlola a bona a ba bego ba a dira, ka ba ka ba ja ke befetšwe. ₉Bjale ba tlo lahla mabootswa a bona, le ditoto tša dikgoši tša bona ba tlo di iša kgole le nna, ka tlo kgona go dula gare ga bona go ya go ile.

₁₀Ge e le wene ngwana motho! Anegela ba moloko wa Isiraele tša Ntlo ye, gore ba itshole ba lahle makgopo a bona, ba ele ka hlokomelo. ₁₁Ge ba lewa ke dihlong ka molato wa tšohle tše ba di dirilego, gona o ba anegele tša Ntlo ye, le tša moagelo wa yona, le tša mejako ya yona, le tša mekgwa le melao; ba di bone o di ngwala, gore ba latiše moagelo wa yona le melao ya yona ba e dire. ₁₂Molao wa yona Ntlokgethwa šo: Felo ka moka mo e agilwego ntlheng ya thaba thoko tšohle ke felo mo go kgethwakgethwa. Ke wona molao wa Ntlo.

₁₃Meelo ya aletare še: Go elwe ka moelo wa batho wa oketšwa ka bophara bja seatla. Modutudu wa aletare e be moelo o tee boemo le bophara; o be le mariba a bophara bja seatla. E be wona motheo wa aletare. ₁₄Go tloga motheong wo go bewe modutudu wa bobedi, wo, ge o elwa go tloga lebatong, boemo ya ba meelo e mebedi, bophara moelo o tee. Go tloga lebatong la tlase go fihla go la godimo e be meelo e mene, le bophara bja moelo o tee. ₁₅Go kgono bewa sebešo sa aletare; boemo e be meelo e mene; ke mo go tlo go ema dinaka tše nne, di lemetše godimo. ₁₆Aletare e be le botelele bja meelo e lesome la metšo e mebedi, le bophara bja meelo e lesome la metšo e mebedi; mahlakore a mane a yona a lekane. ₁₇Modutudu wa tlase e be meelo e lesome la metšo e mene botelele le bophara thoko tšohle tše nne; mariba a wona e be seripa sa moelo; moseneke wa gona o dikologe e le moelo o tee; manamelo a aletare a be ka thoko ya bohlabela.

₁₈A bolela le nna a re: Ngwana motho! Morena Mong wa bohle o re: Melao ya aletare še ya mohla e agilwe, ke ya go fiša didimo, le ya go fokela madi. ₁₉Morena Mong wa bohle o re: Baperisita ba Balefi ba moloko wa Tsadoko, bona ba go batamela ba ntirela, o ba nee powana ya sedimo sa sebego. ₂₀O tšee madi a yona o fetše dinaka tše nne tša aletare, le dikhutlo tše nne tša modutudu, o fetše o dikologa le mariba a wona; e be go e hlatswa le go e direla poelano. ₂₁O tsebo tšea powana yeo ya sebego, wa e fiša felo ga yona ka ntle ga Ntlokgethwa. ₂₂Ka letšatši la bobedi o tliše phokwana e se nago bosodi, e be ya sebego. Aletare e hlatswiwe ka mokgwa o bjalo, bjalo ka ge e hlatswitšwe ka powana yela. ₂₃Ge o feditše go e hlatswa, o tliše powana e se nago bosodi, le kgapana ya mohlape e se nago bosodi, ₂₄O di batametše pele ga Morena; baperisita ba gaše letswai mo go tšona, ba di hlabele Morena, e be sehlabelo sa Morena, ₂₅O dire matšatši a šupago o tliša sehlabelo sa tebogo; go tlišwe powana le kgapana ya mohlape; di tle di se na bosodi. ₂₆Go fele matšatši a šupago ba direla aletare poelano, ba e hlatswa, ba e kgetha. ₂₇Ge go phetegile ona matšatši a šupago ao, ka la seswai ke mo baperisita ba tlo go kgona go tliša didimo tša lena aletareng. Ke mo le tlogo nkgahla. O realo Morena Mong wa bohle.