HESEKIELE 41

₁A nkiša Ntlongkgethwa, a ela dikokwane bophara bja thoko ye le thoko ye e be e le meelo e selelago. Ke bjona bophara bja Ntlokgethwa. ₂Go ahlama ga mejako e be e le meelo e lesome, leboto la ka thoko ye le ka thoko ye e be e le meelo e mehlano. Botelele bja Ngwako a ela ya ba meelo e masome a mane; bophara ya ba meelo e masome a mabedi.

₃A tsena a ela dikokwane tša dijakwana, ya ba meelo e mebedi, mojako ya ba meelo e selelago, mathoko a dijakwaneng ya ba meelo e šupago ka thoko ye le ka thoko ye. ₄A ela felo fao, botelele ya ba meelo masome a mebedi ka bophara bja yona Ntlo. Mme a mpotša a re: Ke sona Sekgethwakgethwa.

₅A ela leboto la Ngwako, ya ba meelo e selelago; a ela bophara bja diphapoši tša dihlakoreng tša Ntlo, ya ba meelo e mene e mene, di dikologa le Ntlo thoko tšhole. ₆Diphapoši e be e le tše masome a mararo; di be di hlatlagane di le tharo, di balwa gararo, e le diphapoši tše di kgotlanego le leboto, di eme ka lona, le ge di sa agelwa lebotong. ₇Diphapoši tša godimo di be di feta tša tlase ka bophara, ka go sesefala ga leboto la Ntlo ge le eya godimo. Diphapoši tša godimo, go be go iwa ka manamelo a tšwago go tša gare le go tša tlase. ₈Ka bona Ntlo e dikologilwe ke modutudu ka ntle, o thekgile diphapoši ka bophara bja lehlaka le meelo e selelago, o etša legetla. ₉Bokoto bja leboto le le bego le bapetšwe ke diphapoši, e be e le meelo e mehlano. Sebaka se se šadišitwego ke diphapoši tša Ntlo. ₁₀Go iša diphapošing tša ntle, e be e le lapa la meelo e masome a mabedi le le bego le dikologa le Ntlo thoko tšohle. ₁₁Mejako ya diphapoši e be e tšwela lapeng le, e mengwe e leba leboa, e mengwe e leba borwa; sebaka se se šaletšego sa ka gare e be e le sa meelo e mehlano thoko tšohle.

₁₂Moago wa ka ntle o bataganego le morako ka thoko ya bodikela, o be o na le meelo e masome a šupago. Leboto la moago woo bokoto e be e le meelo e mehlano thoko tšohle, botelele e be e le meelo e masome a senyane.

₁₃A ela yona Ntlo, ya ba meelo e lekgolo; a ela lapa, le maboto, le meago ya gona, ya ba meelo e lekgolo. ₁₄A ela lapa la mojakong wa Ntlo, le le dikologilwego ke morako wa thoko ya bohlabela, ya ba meelo e lekgolo. ₁₅A ela botelele bja moago wa ka ntle o bataganego le morako wa ka thoko ya bodikela, le mathudi a ka thoko ye le ye, ya ba meelo e lekgolo.

₁₆Maboto a Ntlokgethwa le a mathudi a yona a be a manegilwe ka mamati. Go be go na le mašoba a go tsena seetša se etšwa godimo. Maboto a be a manegilwe ka mamati go tloga fase go fihla mašobeng ao a bego a le mabotong a dihlakore. ₁₇Le lebotong la ka godimo ga mojako, ka ntle le ka gare, le mabotong ka moka ka thoko tšohle, go be go setilwe diswantšho. ₁₈Diswantšho e be e le tša Bakerubi le mehlare ya melala; molala o tee o le gare ga Bakerubi ba babedi, Mokerubi o be a na le difahlogo tše pedi. ₁₉Sefahlgo ka thoko e nngwe e be e le sa motho se lebane le molala; sa ka thoko e nngwe e be e le sa tau se lebane le molala. ₂₀Bakerubi le melala, di be di setilwe lebotong go tloga fase go ya godimo ga mojako mo lebotong la Ntlokgethwa. ₂₁Dijakwane tša Ntlokgethwa di be di setilwe thoko tše nne.

Mojakong wa Ntlokgethwa go be gobeilwe selo seka-aletare. ₂₂Boemo bja sona e be e le meelo e meraro; bophara bja sona e be e le meelo e mebedi, se dirilwe ka mamati, se na le dikhutlo tše nne, maoto a sona le mahlakore e be e le a phata. A mpotša a re: Ke sona sethala sa go bewa pele ga Morena.

₂₃Ntlongkgethwa le Sekgethweng go be go na le mejako e mebedi. ₂₄Mejako e be e na le dipati tše pedi tše pedi tše di bulegago; lemati le bulegela thoko ya lona. ₂₅Mo go dipati tšeo go be go setilwe Bakerubi le melala boka mabotong. Mathudi a ka ntle a be a ruletšwe ka mamati a magolo a diphata. ₂₆Ka dihlakoreng tša mathudi go be go na le mašoba, le diswantšho tša melala bjalo ka mabotong le mamating.