HESEKIELE 4

₁Wene ngwana motho, tšea lekokota la go aga, o le bee pele ga gago; o swantšhe motse wa Jerusalema ka lona. ₂O swantšhe motse wo o rakeletšwego, o tetilwego ka merako le ka dibo, o tietšwego gare ke madira, le ka dithulamerako thoko tšohle. ₃O tle o tšee legadiko la tshipi, wa swantšha morako wa tshipi ka lona o le beile makgatheng a gago le motse. O dule o lebiša sefahlogo go wona motse woo, bjalo ka eke o rakeleditšwe ke wena; e be go swantšhetša ba moloko wa Isiraele.

₄O tsebo lala ka lehlakore la la ntsogošo, o ithweše molato wa ba moloko wa Isiraele. O rwale molato wa bona, o lale o baletšwe matšatši a go lala ka mokgwa woo. ₅Ge e le nna ke tla tšea nywaga ya bosenyi bja bona, ka go balela yona ka matšatši a ke tlogo go rwadiša molato wa bona. E tlo ba matšatši a makgolo a mararo a nago le masome a senyane a o tlogo hlwa o rwele molato wa moloko wa Isiraele. ₆E tlo re ge o feditše ona matšatši ao, wa tlo lala ka lehlakore la le letona, o rwele molato wa moloko wa Juda ka matšatši a masome a mane, ke go beetše letšatši le tee bakeng sa ngwaga o tee.

₇O hlwe o lebišitše sefahlogo thakelelong ya Jerusalema, o o porofetele letsogo la gago le apogile. ₈O tsebe gore ke tlo ba ke go tlemile wa šitwa go lala ka le lengwe lehlakore, gwa tlo ba gwa fela matšatši a gago a go rakelela motse.

₉Wena bjale tšea mabele, le lehea, le dinawa, le dihlodi, le leotša, o di tšhele sefaleng setee, o itirele dijo tša ona matšatši ao a makgolo a mararo a nago le masome a senyane, a o tlo go lala ka lehlakore le tee ka ona. ₁₀Gomme dijo tša tšatši le tee o di ele, e be sekele tše masome a mabedi; o di je ka nako ya tšona. ₁₁Le meetse o a ele ka lefišwana, o a nwe ka nako ya ona. ₁₂Dijo o dire dinkgwanyana tša mabele, tše o di bešago ka tšhila ya batho; o dire ba di bona.

₁₃Ka gobane Morena o re: Ka mokgwa o bjalo Baisiraele ba tlo ja dijo tša bona di tšhilafetše ba le gare ga bantle, mo ke tlogo ba lelekela gona.

₁₄Mme nna ka re: Aowii Morena Mong aka! Hleng ga ke ešo ka itšhilafatša go tloga bofseng bja ka go fihla lehono; ga ke ešo ka ja phoofolo ya go begwa, le ye e bolailwego ke sebata; molomong wa ka ga go ešo gwa tsena seila.

₁₅Ke mo yena a itšego: Lebelela, ke go dumelela dišwana tša boloko bja kgomo bakeng sa tšhila ya batho, gore o beše dingwana ka tšona.

₁₆A buša a re: Ngwana motho! O tsebe gore motseng wa Jerusalema ke tlo thokga thito ya bogobe, gore ba bo je ba lekanyetšwa ka seelo. ₁₇Gobane ba tlo hloka dijo le meetse, ba tšhogana, ba felela mo dibeng tša bona.