Manaba a magolo a tlo fenywa ke Modimo
1Lentšu la Morena le ntletše la re: 2Ngwana motho! Lebišetša sefahlogo go Gogo wa naga ya Magogo, go yena mmuši e mogolo wa Meseke le Tubala, o mo porofetele, 3O re: Morena Mong wa bohle o re: Ke nna e! Ke lwa nago, wene Gogo, mmuši e mogolo wa Meseke le Tubala. 4Ke tlo go gomiša ke go tsentšhitše kgwega mohlagareng, ka go goga le madira a gago ka moka, le dipitsi le banamedi ba tšona ba ba itlhamilego serena ka moka ga bona, e le lešaba le lentši, ka moka ba enetše ka dikotse le diphemo le marumo. 5Ke Baperesia le Bakuše le Baphute; bohle ba na le dikotse le dikuane. 6Le Bagomere, le madira a bona ka moka, le ba leloko la Togarama ba kua magomong a leboa, le mašaba a bona ka moka; ke ditšhaba tše dintši tše di nago le wena. 7Loka, o eme o itlhamile, wena le madira a gago ka moka a o a epilego wa ba molaodi wa ona. 8Go tlo fela matšatši a mantši, wa tlo tsebo laiwa. Go tlo fela nywaga, wa tlo tsebo fihla nageng e khutšišitšwego marumo, go ba ba phuthilwego ditšhabeng tše ntši ba tla dithabeng tša Isiraele, tše di bego di dutše e le mašope; ba le moo, ba ntšhitšwe ditšhabeng, ba tla ba dula ba iketlile ka moka. 9Ke mo o tlogo fihla boka ledimo, boka leru ge le ribegetša naga, o na le mašaba a gago ka moka, le ditšhaba tše ntši tše di nago nago.
10Morena Mong wa bohle o re: Mohla woo mo pelong ya gago go tlo rotoga taba, wa tsenwa ke mogopolo o mobe. 11Wa tlo re: A nke ke šwahlele naga ye e ahlamego, wa re: Batho ba ba se nago ntwa, ba ba dutšego ba iketlile, a nke ke ba wele godimo; ba dutše ba se na merako, ba se na meswiko. 12O tlo realo o ela go thopa le go rebola; o re: Ke iša seatla go bao ba boetšego maropeng, ba etšwa ditšhabeng, ba rua, ba huma, ba agile gare ga ditšhaba. 13Baseba, le Badedane, le babapatši ba Tarasisi, le tšohle ditau tša gona, ba tlogo bolela ba re: Anthe o tlile go rebola dithebola? O epile madira a gago go thopa dithopa, go rwala tshipitshehla le tshipi e khubedu, le go tšea diruo le dithoto, go thopa lehumo le legolo?
14Bjale wene ngwana motho, porofetela Gogo o re: Morena Mong wa bohle o re: Mohla woo ge setšhaba sa ka sa Isiraele se dula se iketlile, o tlo di bona. 15O tlo tla o etšwa magaeng a gago a kua magomong a leboa, o na le ditšhaba tše ntši, banamedi ba dipitsi ka moka, mašaba a magolo le dira tše ntši; 16O tlo tla o etša leru le le ribegetšago naga gore o lwe le setšhaba sa ka sa Isiraele. Ke tše di tlogo direga mehleng e tlago; ke mo ke tlogo go neanya le naga ya ka, gore bantle ba ntsebe, ba bone ge Mokgethwa e le nna; ba di bone ka tše ke tlogo di dira wene Gogo. 17Morena Mong wa bohle o re: A ga se wene yo ke mmoletšego mehleng ya kgale ka bahlanka ba ka ba baporofeta ba Isiraele, ba ba porofetilego mehleng yela ya nywaga yela ba re: Ke tlo go tliša godimo ga bona?
18Ka kgonthe mohlang woo, mohla Gogo a tlogo tšwela naga ya Isiraele dira, ke mo bogale bja ka bo tlogo tuka. O realo Morena Mong wa bohle. 19Ke bolela ke tuka bogale wa mollo, ke re: Ruri mohla woo mo nageng ya Isiraele go tlo ba le tšhišinyego e kgolo. 20Ke mo pele ga ka go tlo go roromela hlapi tša lewatleng, le nonyana tša sebakeng, le phoofolo tša nageng, le tše di gagabago mmung, le batho ba dinageng. Dithaba di tlo ušwa, dikgaga di tlo theolelwa, le merako ka moka. 21Ke mo nna ke tlogo mo epela dira dithabeng tša ka ka moka. O realo Morena Mong wa bohle; mme ba gabo ba tlo bolayana seng sa bona. 22Ke tlo mo otla ka dinkhu le ka madi, ke tlo mo nešetša pula ya mafula le ya mabje a sefako, le mollo le tshebela; di tlo wela madira a gagwe le ditšhaba tše ntši tše di nago le yena. 23Ke tlo iponatša bogolo le bokgethwa ka go dira tšeo, ka tsebja ke ditšhaba tše ntši, tša tseba ge Morena e le nna.
