Lebaka le botse le le tlogo tla ka tshokologo
1Bjale wene ngwana motho, porofetela dithaba tša Isiraele, o re: Hee lena dithaba tša Isiraele! Kwang se Morena a se bolelago. 2Morena Mong wa bohle o re: Ke lefetša tša ge lenaba le bolela le era lena, la re: Kgonenee! Meboto ya bogologolo bjale e tlo ba ya rena!
3Ke gona porofeta o re: Morena Mong wa bohle o re: Ke a lefetša! Ke lefetša ge ba go thosantše, ba rata go go metša thoko tšohle gore o be bohwa bja go lewa ke mašalela a bantle gore o be wa mehlamo ya melomo, wa go nkgišwa ke batho. 4Bjale lena dithaba tša Isiraele, kwang lentšu la Morena Mong wa bohle. Morena Mong wa bohle o bolela a era dithaba le meboto le dinoka le meedi, le marope le metse ya matlawa ye e tšerwego ke mašalela a bantle ba mathoko, ya ba ya dikwero tša bona.
5Morena Mong wa bohle o re: Ona mašalela ao a bantle, le Edomo ka moka, bona bao ba go tšea naga ya ka ba thabile ka pelo ka moka, e le ba pelo ya lenyatšo, ruri bona ke ba bolela ke tuka bogale.
6Porofeta ge o bolele naga ya Isiraele, o bolele le dithaba le meboto le dinoka le meedi, o re: Morena Mong wa bohle o re: Ke nna e! Ke šetše ke boletše ke tuka bogale, ka re: Ke lefetša ge le gobošitšwe ke bantle. 7Molato ke wona woo ge Morena Mong wa bohle a re: Ke emiša letsogo la ka, ke ena ke re: Ditšhaba tšeo di le dikologilego, ke tšona di tlogo nyatšega. 8Ge e le lena dithaba tša Isiraele, le tlo hlogiša mahlogedi a lena, le tlo beela setšhaba sa ka sa Baisiraele dienywa tša lena, gobane go boa ga bona go kgauswi. 9Ka gobane ke nna e! Ke tla go lena; ke dula ke le lebeletše; le ba go tlo lengwa, le go bjalwa dipeu. 10Ke tlo ntšifatša batho mo go lena; bohle e tlo ba ba moloko wa Isiraele, ka moka ga bona; metse e tlo dulwa ke batho, marope a tlo tsošwa. 11Ke tlo atiša batho mo go lena, le dikgomo di tlo tswala tša ata mo go lena ke tlo agiša batho bjalo ka mehleng ya kgale; ke tlo le setša go fetiša peleng. Ke mo le tlo go tseba ge Morena e le nna. 12Ke tlo sepediša batho godimo ga lena; e tlo ba ba setšhaba sa ka sa Isiraele; ke bona ba tlogo dula go lena la ba magae a bona; mme le ka se boele le ba amoga bana.
13Morena Mong wa bohle o re: Ba le boletše, lena dithaba, ba re: Le ja batho; le amoga batho ba lena bana! 14Bjale le ka se hlwe le eja batho; le ka se hlwe le ba amoga bana. O realo Morena Mong wa bohle. 15Nka se hlwe ke dumela ge le gobošwa ke bantle. Le ka se hlwe le imelwa ke go nyatšwa ke ditšhaba; mme batho ba lena le ka se hlwe le ba amoga bana. O realo Morena Mong wa bohle.
16Lentšu la Morena le ntletše la re: 17Ngwana motho! Mola ba moloko wa Isiraele ba dutše nageng ya bona, ba itšhilafaditše ka ditsela tša bona le ka mediro ya bona. Ditšhila tša bona ke hweditše di etša tšhila tša mosadi wa ditšhila. 18Ka thenolela bogale bja ka godimo ga bona ka molato wa madi a ba a tšholletšego nageng yeno, le ka baka la medimo ye ba tšhilafaditšego naga ye ka yona. 19Ka ba tšitlanyetša ditšhabeng, ba gašana le dinaga ke ba ahloletše ka go latiša ditsela tša bona le mediro ya bona. 20Ya re ge ba fihla ditšhabeng tše ba ilego go tšona, ba goboša leina la ka le lekgethwa ge ba thwe: Ke sona setšhaba sa Morena se; ba khudugile nageng ya gagwe. 21Nna ka nyama ka baka la leina la ka le lekgethwa, ge ba moloko wa Isiraele ba le goboša go bantle bao ba ilego go bona.
22Bjale botša ba moloko wa Isiraele o re: Morena Mong wa bohle o re: Tše ke di dirago ga ke di dire ka baka la moloko wa Baisiraele; ke di dira ka baka la leina la ka le lekgethwa, leo le le gobošitšego mo go bantle ba le tlilego go bona. 23Leina la ka le legolo, le le gobošitšwego go bantle, le gobošitšwego ke bolena mo go bona, ke tla le dira le lekgethwa, gore bantle ba tsebe ge Morena e le nna. O realo Morena Mong wa bohle. Ke tlo dira tšeo, ba di bona ka mahlo ge ke le yo Mokgethwa, ba di bona ka tše ke tlogo di dira bolena. 24Ke tlo le ntšha mo gare ga bantle, ka le phutha le etšwa dinageng ka moka, ka le bušetša nageng ya geno. 25Ke tlo le fokela ka meetse a sekilego ka le hlatswa, la tšwa ditšhila tša lena ka moka, ka le tloša ditšhila tša medimo ya lena ka moka. 26Ke tlo le nea pelo e mpsha, ka bea moya o mofsa teng ga lena. Nameng ya lena ke tlo ntšha pelo ye ya leswika, ka le nea pelo ya nama. 27Ke tlo bea Moya wa ka teng ga lena, ka le dira batho ba ba latelago melao ya ka, ba ba hlokomelago mekgwa ya ka ba e dira. 28Le tlo dula mo nageng ye ke e neilego botataweno la ba setšhaba sa ka, nna ka ba Modimo wa lena. 29Ke tlo le ntšha ditšhileng tša lena ka moka; ya ba gona ke tlo go bitša mabele ka a atiša: ka se hlwe ke le tlišetša tlala. 30Ke tlo atiša le dienywa tša dihlare, le puno mašemong, gore le se hlwe le nyatšwa ke bantle ge le wetšwe ke tlala. 31Ke mo le tlogo gopola ditsela tša lena, le mediro ya lena ye e bego e se botse, la nyenywa ke makgopo le makgapha a lena. 32Ge ke dira tšeo, e tla ba e se ka baka la lena. O realo Morena Mong wa bohle. Le tsebe fao. Sa lena a e be go itshola le go inyatša ka baka la ditsela tša lena, lena ba moloko wa Isiraele.
33Morena Mong wa bohle o re: Mohla ke le hlatswa dibe tša lena ka moka, ke tlo buša ke agiša batho metseng yeno; le marope a tlo tsošwa. 34Naga ye e bego e le hlaga, e tlo buša e lengwa, yona yeo bafeti ba e hweditšego e le ya marope. 35Ba tlo re: Naga yela e bego e le ya marope, e fetogile tšhemo ya Edene; mme metse yela ya matlawa, bjale e ageletšwe ka merako, e na le batho. 36Ke mo mašalela a bantle ba lego tikologong ya lena, ba tlo go tseba ge e le nna Morena Mong wa bohle ke tsošago metse ye e phušutšwego, ke lemiša megola. Nna Morena ke boletše; ke tlo dira.
37Morena Mong wa bohle o re: Se sengwe sese, se ke tlogo dumela ge ke kgopelwa ke ba moloko wa Isiraele, mme ka ba direla sona: Ke tlo atiša batho ba gabo bjalo ka dinku. 38Metse ye e šwalalantšwego e tlo tlala mašaba a batho, bjalo ka mehlape yela e bego e etla Ntlong e kgethwa motseng wa Jerusalema menyanyeng ya gona. Ke mo ba tlogo tseba ge Morena e le nna.
