HESEKIELE 33

₁Lentšu la Morena le ntletše la re: ₂Ngwana motho, bolela le ba setšhaba sa geno, o re: Ge nka tliša lerumo nageng; mme setšhaba sa naga yeo sa hlaola monna wa gabo, mme sa mmea mohlapetši; ₃Mme yena mohlapetši e, ge a bona lerumo le tlela naga, o tlo letša phalafala ya go sebela batho manaba. ₄Bjalo ge go ka ba le motho e a kwago phalafala yeo, a e kweša mme a nyatša; bjalo ge lerumo le tla la mo tšea, yena eo, molato wa madi e tlo ba wa gagwe, ₅Ka gobane a kwele mollo wa phalafala, mme a nyatša. Molato wa madi o na nae; ge e ka be a se nyatše, a ka be a phologile. ₆Fela ge mohlapetši a ka bona lerumo le etla, a se letše phalafala, setšhaba se se sebelwe manaba, mme lerumo la tla la tšea e mongwe wa bona, yena yo, le ge a hwetše dibeng tša gagwe, madi a gagwe ke tlo a latiša go mohlapetši. ₇Bjale wene ngwana motho, ke go beile mohlapetši wa moloko wa Baisiraele, gore lentšu le o le kwago le etwa molomong wa ka, o ba botše lona o romilwe ke nna. ₈Ge nka bolela le yo mobe ka re: Wene motho mobe, o tlo hwela ruri! Mme wena wa lesa go bolela le go mo eletša gore a lahle tsela ya gagwe, yena mosenyi eo o tlo hwela molato wa gagwe; fela, madi a gagwe ke tlo a latiša go wene. ₉Bjale, ge mosenyi eo o mo eletša wa re a lahle tsela ya gagwe, mme yena a gana go e lahla, yena eo o tlo hwela molato wa gagwe, mme wena wa phologa.

₁₀Bjale wene ngwana motho, bolela le ba moloko wa Baisiraele, o re: Le bolela taba ge le re: Dikarogo tša rena, re felela ka tšona. Re tlo phologa bjang? ₁₁Ka bophelo bja ka -- go bolela Morena Modimo Mong wa bohle -- ruri ga ke kgahlwe ke lehu la modiradibe. Se se nkgahlago ke modiradibe a boa, a lahla tsela yeo ya gagwe, a phela. Boang! Boang! Le lahle ditsela tša lena tše mpe. Le hwelang, lena ba moloko wa Isiraele?

₁₂Bjale, wene ngwana motho! Bolela le ba setšhaba sa geno o re: Toko ya moloki ga e phološe mong mohla a hlanogile; bobe bja yo mobe bo ka se uše mong mohla a lahlile bobe bja gagwe. Moloki a ka se phologe ka toko ya gagwe, mohla a senyago. ₁₃Le ge moloki ke mmoditše ka re: O tlo phela! Mme yena, a holofetše toko ya gagwe, a dira bokgopo, gona toko ya gagwe ka moka e ka se gopolwe; o tlo hwela bokgopo bjo a bo dirilego. ₁₄Le ge yo mobe ke mmoditše ka re: O tlo hwa! Mme yena a lahla dibe tša gagwe, a dira ka molao le ka toko. ₁₅A bušetša tša tshwarelelo, a bušetša tše a di utswitšego, a ya ka molao wo o phedišago a se hlwe a dira tše bokgopo, yena eo o tlo phela; a ka se ke a hwa. ₁₆Dibe tša gagwe ka moka tše a sentšego ka tšona, a ka se hlwe a gopolwa ka tšona. O dirile ka molao le ka go loka; gomme o tlo phela.

₁₇Ge ba setšhaba sa geno ba re: Tsela ya Mong wa bohle ga e a loka; ye e sa lokago ke ya lena tsela. ₁₈Ge moloki a lahlile toko ya gagwe a dira bokgopo, o tlo hwa ka tšona tšeo. ₁₉Ge yo mobe a ka lahla bobe bja gagwe, a dira ka molao le ka go loka, o tlo phela ka tšonatšeo. ₂₀Ge le re: Tsela ya Mong wa bohle ga e a loka; gona lena ba moloko wa Isiraele, le tsebe gore mang le mang ke tlo mo ahlolela ka tsela tša gagwe.

₂₁Ka la bohlano la kgwedi ya lesome ya ngwaga wa lesome la metšo e mebedi re le bothopša, go tlile monna e phonyokgilego a etšwa Jerusalema, a re: Motse o thopilwe. ₂₂Ge e le nna, ka mantšiboa, mophonyokgi a sešo a fihla, ke ge seatla sa Morena se šetše se ntletše sa mpula molomo; ka moswana ge go fihla monna eo, sa mpula molomo, ka se hlwe ke le semuma.

₂₃Lentšu la Morena la ntlela la re: ₂₄Ngwana motho! Ba ba agilego maropeng ala a naga ya Isiraele, ba re: Aborahama e be e le motho o tee ge a newa naga ye ya ba ya gagwe; mme rena re ba bantši; re filwe naga ye ya ba ya rena.

₂₅Ba botše ge o re: Morena Mong wa bohle o re: E ka ba naga ya lena bjang, ge le ja dinama di na le madi, mahlo a lena ge a lebeletše medimo ya lena e šele, ge le thula madi? ₂₆Ge le ikokotlela ka marumo a lena, ge le dira tša makgapha, monna ge a senya mosadi wa wa gabo, a le re e ka ba naga ya lena?

₂₇Bolela le bona o re: Morena Mong wa bohle o re: Ka bophelo bja ka! Ba ba agilego kua maropeng ba tla fela ka lerumo; ba ba lego ntle molaleng, ba tlo gafelwa dibata ba lewa ke tšona; ba ba lego mo dibong le mo mefomeng ba tlo hwa ka dinkhu. ₂₈Naga yeo ke tlo e dira ya marope fela; go tlo fela maatla a ba bego ba ikogomoša ka ona; mme dithaba tša Isiraele e tlo ba hlaga e sa tsenwe ke motho. ₂₉Ke mo ba tlogo tseba ge Morena e le nna; ge naga yeo ke e dirile ya marope le ya hlaga e le go lefetša mabohlola ohle a ba e dirilego.

₃₀Wene ngwana motho! Ba setšhaba sa geno ba go bolela ba eme mabotong le mejakong ya nywako; ba botšana ba re: A re yeng hle, re kwe se lentšu la Morena le se bolelago! ₃₁Ba tla go wene ka mokgwa wa setšhaba, ba dula pele ga gago eke ke setšhaba sa ka, ba kwa tše o di bolelago; fela, ga ba di dire; ba ratega ka melomo; ge e le dipelo tša bona di ile le megabaru. ₃₂Tseba ge! Mo go bona o koša ya baratwa, o ka sereti le sebini; ba fo kwa mantšu a gago; fela ga ba dire tše o di bolelago. ₃₃Fela, mohla di tlago, -- gomme di etla, -- ke mo ba tlogo tseba gobane ba be ba na le moporofeta.