HESEKIELE 32

₁Ka la pele le kgwedi ya lesome la metšo e mebedi ya ngwaga wa lesome la metšo e mebedi, lentšhu la Modimo le ntletše la re: ₂Ngwana motho! Tsoša sello sa Farao kgoši ya Egipita, o re: Ba re o ka tau ya ledumaedi gare ga ditšhaba; fela, o ka kwenakgolo mawatleng: O gaša meetse ka dinko tša gago, o a biloša ka maoto ago, o kgotlela dinoka tša gago. ₃Morena Mong wa bohle o re: Ke tlo go tanya ka lokwa la ka, ka madira a ditšhaba tše dintši, ka go goga ka dithapo tša ka. ₄Ke tlo go lahlela mo go omilego, ka go rapalatša molaleng, wa hlorangwa ke manong ka moka a sebaka, ka go dira mojo wa dibata tša lefase lohle. ₅Nama yago ke tlo e lahlela dithabeng, ka tlatša meedi ka toto sa gago. ₆Naga ke tlo e nošetša ka motshotshomo wago, wa madi a gago, ge a goma ka dithaba, meela ya tlala wena. ₇Mohla o tlogo tima boka mollo, ke tlo šira legodimo, ka fifatša dinaledi ka apeša letšatši ka maru; le ngwedi o ka se hlwe o taga. ₈Ke tlo go fifaletša dietša tšohle tše di phadimago kua legodimong, ka ribegetša naga yago ka leswiswi. O realo Morena Mong wa bohle.

₉Ke tlo tlaletša pelo tša ditšhaba tše dintši, ge ke iša phoko ya thobego yago go bantle, dinageng tša ba sa e tsebego. ₁₀Ke tlo gakantšha tšhaba tše dintši tša gago; mme magoši a tšona a tlo rekologa ge a bona ge ke retha rumo la ka. Mohla go wago wena, ba tlo roromela ba boifa tše di kago wela bona.

₁₁Gobane Morena Mong wa bohle o re: Lerumo la kgoši ya Babele le a go tlela. ₁₂Mašaba a gago le tlo a tekola ka marumo a bagale, a bona ba e lego ba sehlogo ditšhabeng; ke bona ba tlogo senya boipoti bja Egipita, ba fetša mašaba a gona. ₁₃Le dikgomo tša gona ka moka ke tlo di fediša gona moo go lego meetse a mantši, a ka se kego a kgotlelwa ke lwao la motho le ka tlhako ya seruo. ₁₄Ke mo ke tlogo sekiša meetse a bona, ka ediša noka tša bona bjalo ka makhura. O realo Morena Mong wa bohle. ₁₅E tlo re, naga ya Egipita ke e dirile ya mašope, e senyegetšwe ke mahumo a yona, ke bolaile bohle ba ba agilego mo go yona, ke mo ba tlogo tseba ge Morena e le nna. ₁₆Ke sona sello se se tlogo llwa; e tlo ba sona sefela sa bana ba bantle, ge ba llela Egipita le mabotho a gona ka moka. O realo Morena Mong wa bohle.

₁₇Ka la lesome la metšo e mahlano la yona kgwedi yeo ya ngwaga wa lesome la metšo e mebedi, ke tletšwe le Lentšu la Morena la re: ₁₈Ngwana motho! Lla sello sa mabotho a Egipita. Bona le banana ba ditšhaba tše maatla, o ba fološetše kua nageng ya fasefase le ba go fologela moleteng. ₁₉O phala mang ka botse? Fologa, o yo alelwa le mašoboro.

₂₀Ba tlo rapalala gare ga ba fedilego ka marumo. Lerumo le swerwe; ba gogeng le mabotho ohle a bona. ₂₁Bagale ba dinatla, ba ba lego kua gare ga bodulabahu, ba tlo go bolela le Farao, le ba ba bego ba mo tlatša, ba re: Ologang, le rapalale, lena mašoboro a go bolawa ka lerumo.

₂₂Asuri, le mašaba a gagwe, o šetše a le gona moo; o dikologilwe ke mabitla a gabo, a bohle ba go fela ba tekotšwe ke lerumo. ₂₃Ke yena wa go fiwa mabitla a gabo gona kua fase moleteng. Lebitla la gagwe le dikologilwe ke madira a gagwe; a bolailwe ohle ke lerumo, bona bao ba bego ba šiiša mola ba sa le nageng ya ba phelago.

₂₄Elama le yena o gona kua le mašaba a gagwe; ka moka ga ona a dikologile lebitla la gagwe. Ba bolailwe ba tekolwa ke lerumo; ba fologetše kua nageng ya fasefase e le mašoboro, bonabao ba ba bego ba šiša mola ba sa le nageng ya ba phelago. Bjale ba rwele nyatšego ya bona le ba go fologela moleteng. ₂₅Ba mo aletše malao gare ga ba bolailwego, le mašaba a gagwe ka moka; o dikologilwe ke mabitla a bona. Ke mašoboro ka moka ga bona; ba bolailwe ke lerumo, ka gobane ba be ba šiiša mola ba sa le nageng ya ba phelago; bjale ba rwele nyatšego ya bona le ba go fologela moleteng, ba beilwe gare ga ba ba bolailwego.

₂₆Le Meseke le Tubala ba gona kua le mašaba a bona, ao mabitla a ona a ba dikologilego; ke mašoboro ka moka ga bona, ba bolailwe ke lerumo; bona bao ba bego ba šiiša mola ba sa le nageng ya ba phelago. ₂₇A ba se ke ba latšwa le bagale bao ba bolailwego; ba phalwa ke mašoboro ao a go fologela kua bodulabahu ba na le ditlhamo tša ntwa, ba samišitšwe hlogo ka marumo a bona. Molato wa bona o mo go marapo a bona, ka gobane bagale ba šiiša nageng ya ba phelago.

₂₈Le wena o tlo robaganywa gare ga mašoboro ao, wa tlo rapalala le ba ba bolailwego ke lerumo.

₂₉Le Edomo o gona kua, le magoši a gagwe; le bakgoma ba gagwe ka moka. Bona bao, le ge e le bagale, ba išitšwe go ba ba bolailwego ke lerumo; ba laditšwe le ona mašoboro, le ba go fologela moleteng.

₃₀Dikgoši tša leboa di gona kua ka moka ga tšona; le bohle ba Sidone, ba fologetše moo le ba ba bolailwego; ba lewa ke dihlong ka ge ba kile ba šiiša ka bogale bja bona. Ba rapaletše le ba ba bolailwego ke lerumo e le mašoboro; ba rwele nyatšego ya bona le ba go fologela moleteng.

₃₁Farao o tlo ba bona a wa pelo, a se hlwe a llela mašaba a gagwe ka moka. Farao le madira a gagwe ke ba go fela ka lerumo. O realo Morena Mong wa bohle.

₃₂Gobane ke be ke mmeile go šiiša a sa le nageng ya ba phelago; ke gona a tlo go latšwa le mašoboro ao a go bolawa ke lerumo, yena Farao le mašaba a gagwe ka moka. O realo Morena Mong wa bohle.