Egipita go tlo šwahlelwa ke Nebukadinetsara
1Lentšu la Morena le ntletše la re: 2Ngwana motho! Porofeta o re: Morena Mong wa bohle o re: Llang! Joo, tšatši leo, joo! 3Le kgauswi, tšatši la Morena, la maru, e tlogo ba lona tšatši la ditšhaba. 4Lerumo le tlo tlela Egipita; Kuše go tlo tlelwa ke tlalelo, ge Egipita go tlala ba ba hlabilwego, ge mahumo a gona a tšewa, go ušwa metheo ya gona.
5Bakuše, Baputhe, Baludi, ba mahlakanasela a batho, le Bakube, le ba naga ye e lakanego nabo, ba tlo tekolwa ka lerumo gotee le bona.
6Morena o re: Ba ba thekgetšago Egipita ba tlo rapalala fase: bokgantšhamaatla bja gona bo tlo kokobetšwa; ba tlo wa ka lerumo ba le moo, go tloga Migidolo go fihla kua Sebene. O realo Morena. 7Ba tlo ba mašope gare ga dinaga tša mašope; metse ya bona e tlo ba gare ga metse ya marako. 8Ke mo ba tlogo tseba ge Morena e le nna, mohla ke tšhuma mollo Egipita, mohla go robega ba go thekgetšago.
9Mohlang woo go tlo tšwa batseta ba ke ba romago ka maselawatle ba tšhoša Bakuše baiketli; ba tlalelwa mohla woo wa Egipita. Seleo, letšatši le etla.
10Morena Mong wa bohle o re: Mašaba a Egipita ke tlo a fetša ka letsogo la Nebukadinetsara kgoši ya Babele. 11Yena le batho ba gagwe, ba ba šiišago ditšhabeng, ba tlo tlišwa ba thosanya naga ye. Ba tlo khwamola tšhoša ba lwa le Egipita, ba tlatša naga ka ditoto. 12Ke tlo pšheša dinoka, ka gafela naga matsogong a ba babe, ka e dira ya marope; tše di tletšego mo go yona ke tlo di thosanya ka diatla tša ba šele. Ke realo, nna Morena.
13Morena Mong wa bohle o re: Le medimo ke tlo a fediša; le mafela a kua Nofe ke tlo a fediša; le mafela a kua Nofe ke tlo a široša. Mme kgoši ya gona e ka se hlwe e eba motho wa Egipita. Se ke tlogo se bea mo nageng ya Egipita ke tšhogo. 14Motse wa Patarose ke tlo o dira lešope; wa Tsoane ke tlo o tšhuma ka mollo; wa Noo ka o ahlolela ka molao. 15Sini ke tlo go thenolela gale bja ka, e lego sona sebo sa Egipita, ka fetša mašaba a Noo. 16Ke tlo tšhuma naga ya Egipita; Sini go tlo tlalelwa; Noo go tlo phušolwa; Nofe go tlo hulwa mosegare. 17Bagale ba Abena le ba Phibesethe ba tlo tekolwa ka lerumo, basadi ba išwa bothopša. 18Thagapenese go tlo ba le leswiswi mosegare, ge sefoka sa Egipita ke se robaganya moo, ge go kgantšha maatla go fedišwa moo. Leru le tlo ribegetša wona motse woo, basadi ba išwa bothopša. 19E tlo ba go ahlolela Egipita ka molao. Ke mo ba tlogo tseba ge Morena e le nna.
20Ka la go šupa la kgwedi ya pele ya ngwaga wa lesome la motšo o tee, ke tletšwe ke lentšu la Morena la re: 21Ngwana motho! Letsogo la Farao kgoši ya Egipita, ke le robile. Bjale tseba, le ka se ke la tlemelelwa la alafša; le ka se ke la fapša ka mašela; le ka se boele la tia la swara lerumo. 22Ke tšona tše Morena Mong wa bohle a di bolelago mola a re: Ke nna e! Ke lwa le Farao kgoši ya Egipita, ke roba matsogo a gagwe, le le tiilego le le le robegilego, gore ke lahliše atla sa gagwe lerumo. 23Baegipita ke ba gašanya le ditšhaba, ke ba rakela dinageng. 24Ke tlo tiiša matsogo a kgoši ya Babele, ka mo nea rumo la ka. A Farao matsogo, ona ke tlo a roba; o tlo rotla a le pele ga kgoši ya Babele boka kgobetši ge e hwa. 25Ke tlo tiiša matsogo a kgoši ya Babele, mme matsogo a Farao a tlo repha, gore a tsebe ge Morena e le nna, mola ke neela lerumo seatleng sa kgoši ya Babele, gore a le akalatše godima naga ya Egipita, 26Gore Baegipita ke ba tšitlanyetše ditšhabeng, ke ba gašanye le dinaga. Ke mo ba tlogo tseba ge Morena e le nna.
