Kotlo ya Egipita
1Ka ngwaga wa lesome, ka la lesome la metšo e mebedi la kgwedi ya lesome, ke tletšwe ke lentšu la Morena, la re: 2Ngwana motho! Lebišetša sefahlogo go Farao kgoši ya Egipita, o porofetele yena le naga ka moka ya Egipita. 3O bolele o re: Morena Mong wa bohle o re: Ke nna e! Ke lwa nago, wene Farao kgoši ya Egipita, wene kwenakgolo molalelabatho mo nokeng tša gago, o re: Noka ye ke noka ya ka; ke itiretše yona! 4Ke tlo go tsenya kgwega ka mohlagareng wa gago; dihlapi tša dinoka tšago ka di gomaretšwe matlagapi ago, ka go rotola mo nokeng tša gago o gomaretšwe matlagapi ke dilhapi tšohle tša dinoka tšago. 5Ke tlo go lahlela lešokeng o na le dihlapi tšohle tša dinoka tšago; o tlo rapalala moo ntle, go se be le e a go rwalago a go fihla, ka go dira mojo wa dibata le manong a sebakeng.
6Ke mo bohle ba dutšego Egipita ba tlogo lemoga ge Morena e le nna, ka gobane ba moloko wa Isiraele ba hweditše Egipita e la lehlotlo la lehlakanoka. 7Ge ba go swara ka seatla o pharoge wa ba hlaba; ge ba itlhotlela ka wena o robege wa ba thekgesediša. 8Bjalo Morena Mong wa bohle o re: Ke nna e! Ke go tlišetša lerumo, gore mo go wene ke fediše batho le dikgomo. 9Naga ya Egipita e tlo ba lešope le molala wa legwete. Ke mo ba tlogo tseba ge Morena e le nna.
Ke lefetša ge o itše: Noka ye ke ya ka; e dirilwe ka nna! 10Bjale ke nna e! Ke lwa nago, le dinoka tšago. Naga ya Egipita ke tlo e dira ya marope le molala wa legwete, go tloga Migidolo go goma ka Sebene, le go iša mellwaneng ya Kuše. 11Go ka se hlwe go gata lwao la motho le tlhako ya kgomo; go ka se dule motho gwa tlo ba gwa fela masome a mane a nywaga. 12Naga ya Egipita ke tlo e dira ya mašope gare ga dinaga tša mašope; metse ya gona e tlo ba ya marako gwa ba gwa fela masome a mane a nywaga. Baegipita ke tlo ba gašanya le ditšhaba, ka ba rakela dinageng.
13Gobane Morena Mong wa bohle o re: Ge go fedile masome a mane a nywaga, ke tlo kgobela Baegipita ba boa ditšhabeng tše ba faletšego go tšona. 14Mathopša a Egipita ke tlo a buša; ke tlo a bušetša mo nageng ya Patarose, ya setlogo sa bona; ba tlo ba mmušo o potlana moo. 15E tlo ba mmušo o potlana gare ga mebušo, o sa hlwego o ikgantšha ditšhabeng. Ke tlo ba lesa ba notlega, ba se hlwe ba buša ditšhaba. 16Mmušo wa bona o ka se hlwe o holofelwa ke moloko wa Baisiraele, o ka se hlwe o tsoša mogopolo wola wa karogo ge ba lebeletše gona. Ba tlo tseba ge Morena Mong wa bohle e le nna.
17Ka la pele la kgwedi ya pele ya ngwaga wa masome a mabedi a metšo e šupago ke tletšwe ke lentšu la Morena la re: 18Ngwana motho! Nebukadinetsara kgoši ya Babele o dirišitše madira a gagwe modiro o mogolo kua motseng wa Tiro. Dihlogo ka moka di hlobegile; magetla ka moka a phumogile; fela, yena le dira tša gagwe ga ba tšwa le selo moo Tiro ka modiro woo, ge ba elwa le motse woo. 19Bjale Morena Mong wa bohle o re: Ke nna e! Nebukadinetsara kgoši ya Babele, ke tlo mo neela naga ya Egipita, a tšee mahumo a yona, a thope a rebole, e be meputso ya dira tša gagwe. 20Ke mo nea naga ya Egipita, e be wona moputso wo a itiretšego wona; gobane o direla nna.
21Mohlang woo ba moloko wa Isiraele ke tlo ba medišetša lenaka, ka go bolediša gara batho, ba tlo tseba ge Morena e le nna.
