HESEKIELE 27

₁Lentšu la Morena la ntlela la re: ₂Wene ngwana motho! Hlatloša sello o llele Tiro. ₃O bolele le Tiro o dutšego matšibogo a lewatle, wa go rekelana le ditšhaba tše dintši tša dihlakehlake, o re: Morena Mong a bohle o re: Wena Tiro o re: Nna ke phethegile botseng bja ka! ₄Mellwane ya gago e gare ga lewatle. Baagi ba gago ba go thakgile o tletšego. ₅Mamati a gago ke a mogobogobo wa Senire; ba tšere morokwana wa kua Libanoni ba dira lefata la maselawatle. ₆Mahuduo ba a dira ka motholo wa Basani; didulo ba di dira ka moroto wa Khithima, ba di ruma ka naka la tlou. ₇Mafego a gago ke lešela la matsaka la Egipita, ke sona sefoka sa gago. Hlaka ya gago ke ya leokodi le letala le ya moretele wa Elisa. ₈Bahudui ba maselawatle ago ke ba Sidone le ba Arafadi; balaodi ba ona ke bona ba bohlale ba bageno, wene Tiro. ₉Bakgoma ba Gebale le bomakgone ba gona, ke ba go thiba mašoba a maselawatle. Maselawatle a go fela, le beng ba ona, ba tla mme ba rekelana nago.

₁₀Madira o a rapa go ba Peresia le ba Ludi le ba Phuthe, ba go hlabanela. Ba fega dikotse le dikuane ba na le wena, ya ba bokwala bja gago. ₁₁Merakong ya gago thoko tšohle go eme banna ba Arafadi le madira a gago le ba Gamadi ba mo dibong tša gago. Ba fega dikotse tša bona merakong ya gago thoko tšohle. Ke bona ba go tlaleletša botsoro bja gago.

₁₂Ba Tarasisi ba rekelana nago; ba bona boati bja mehuta ya dithoto; ba di šaba ka tšhipi e tshehla, le ka tshipi e tšhweu, le ka morodu. ₁₃Ba Jafani, le ba Tubala, le ba Meseke, ke ba go rekelana nago; ba rekiša batho le dilo tša mphiri. ₁₄Ba kua Togarama ba reka thoto ka dipitsi, le ka makaba, le ka dimeila. ₁₅Ba kua Dedane ke barekiši ba gago; letsogo la gago le fihlela hlakehlake tše dintši; ba go ntšhetša naka la tlou; ba ipega ka morekure. ₁₆Ba Siria ge ba rekelana nago ba bone boati bja mediro yago; ba reka ka talama, le ka purapura e khubedu, ka mašela a mebalabala, le ka leokodi le le sese, le ka pheta ya lewatle, le ka pheta e khubedu. ₁₇Le ba Juda, le ba naga ya Isiraele ba rekelana nago; ba reka ka mabele a tšwago Minithe, le ka dinkgwana, le ka dinose le makhura, le ka ditlolo. ₁₈Le ba Damaseko ge ba rekelana nago ba bona boati bja mediro yago, le dithoto tšago tša mehutahuta; ba tliša sedila sa Helibone, le boya bjo bošwana. ₁₉Ba Bedane le ba Jafane ba reka ka mašela a a logilwego; ba rekelana nago ka ditšhipi tše di batotšwego, le ka mere ya Kasia le Kalamo. ₂₀Ba Dedane ba tla go wene ba bapatša dikobjana tša go ikalela banamedi. ₂₁Ba Arabia le bakgoma ba Kedara bohle o ba buša papatšong, ge ba šaba ka dikwana le dipudi le diphoko, ge ba rekelana nago. ₂₂Babapatši ba Seba le ba Ragema, bona ba rekelana nago ka dinoko tše bohlokwa tša mehutahuta, le ka pheta le tshipi e khubedu; ba reka dithoto tša gago. ₂₃Ba Harane, le ba Kanne, le ba Edene, le babapatši ba Seba le ba Asuri le ba Kilimadi, ba rekelana nago. ₂₄Bona bao ba rekelana nago ka mašela a botšhepi, a purapura le go logwa ka matsaka, le ka magogwa a mebalabala, le manti a botsana. ₂₅Maselawatle a Tarasisi a tla a rwele matšo a papatšo tšago, wa huma, wa tuma gagolo mawatleng. ₂₆Balaodi bago ba maselwatle ba go išitše madibeng, gona kua gare ga mawatle o tlo robaganywa ke ledimo la bohlabatšatši. ₂₇Mahumo a gago, le phahlo tša gago, le thoto tša gago, basepediši ba maselawatle le balaodi ba ona, le babetli ba ona, le babapatši ba thoto tša gago, le bahlabani ba gago ka moka ba o bego o na nabo, ba tlo sobela lewatleng mohla o wago. ₂₈Maboto a lewatle a tlo šišinyega ka legoa la mokgoši wa basepediši ba maselawatle. ₂₉Ba go sepediša mahuduo, le balaodi, le batsebi ba mawatle, ba tlo tšwa makokgweng ba ema lešing. ₃₀Ba hlaba mokgoši ba go llela gabohloko, ba itšhela pilo dihlogong, ba dula moloreng; ₃₁Ba dutolwa hlogo ka baka la gago, ba apara mankgeretla, ba go llela wa masetlapelo, wa mahlobogo. ₃₂Ba le mahlobogong a gago ba tlo hlatloša sello ba re: Go kae felo mawatleng go itšego “tuu” boka Tiro! ₃₃Mola diphahlo tša gago di sa go boela di etšwa mawatleng, o be o horiša tšhaba tše dintši. Ka boati bja mahumo le diphahlo tšago o be o humiša le dikgoši tša lefase. ₃₄Bjale ge o robagantšwe, o širogile mawatleng, o sobetše bodibeng, le diphahlo tšago, le lešaba lago ge le senyegile nago.

₃₅Baagi ba dihlakehlake bohle ba eme ba tšhogile ka wena; dikgoši tša bona di gakanegile kudu, di galogile difahlogo. ₃₆Babapatši ba ditšhaba tše dingwe ba a go kwera; o fetogile setšhošetšo; o ile go ya go ile.