HESEKIELE 2

₁A bolela le nna a re wene ngwana motho! Ema ka maoto ke bolele nago. ₂Ge a realo, ka tlelwa ke moya; wa nkemiša ka maoto, ka kwa e a bolelago le nna a re: ₃Ngwana motho! Nna ke go roma go Baisiraele, go setšhaba se sa bahlanogi ba go ntlhanogela, ba go ntahla gotee le botatabo go fihla tšatši la lehono le. ₄Ke bana ba difahlogo tše thata le ba dipelo tše di reteletšego. Ke go roma go bona gore o bolele nabo ka go re: Mong wa bohle o re! ₅Gore bona, le ge ba ka kwa, le ge ba ka gana e le ba moloko wa dinganga, ba fele ba tsebe gobane ba be ba na le moporofeta.

₆Mme wene ngwana motho, o se ke wa ba boifa; o se boife se ba se bolelago; ge o ba hwetša ba etša ditshehlo le meetlwa, eke o dutše gare ga diphepheng, o se boife dipolelo tša bona, o se tšhoge difahlogo tša bona; gobane ke moloko wa dinganga. ₇O fele o ba botša dipolelo tša ka, le ge ba ka kwa, le ge ba ka gana e le ba moloko wa dinganga.

₈Mme wene ngwana motho, o kwe se ke go botšago sona; o se ke wa nganga bjalo ka moloko wo wa dinganga. Bjale ahlama o je se ke go neago sona. ₉Ge ke lebelela ka bona go fihla seatla go nna se swere lengwalo le le mennwego. ₁₀Sa le menolla ke lebeletše, ka hwetša le ngwadilwe ka teng le ka ntle, le ngwadilwe tša dillo le tša diphegelo le tša mahlomola.