Molato wa baporofeta ba maaka
1Lentšu la Morena la ntlela la re: 2Ngwana motho goelela baporofeta ba Isiraele ba ba porofetago, o botše bona baporofeta bao ba ba goelelago tše di tšwago dipelong tša bona, o re: Kwang lentšu la Morena!
3Morena Mong a bohle o re: Kotsi e tlo wela baporofeta bao ba mašilo, ba ba latelago dipelo tša bona, ba se na tše ba di bonego. 4Joo Isiraele! Baporofeta ba gago ba etša diphukubje lešokeng. 5Ga la ka la tšwela go thiba difata, ga la ka la agelela setšhaba sa Isiraele ka morako gore se kgone go ema tlhabanong ka tšatši la Morena. 6Ba ba bego ba re: Morena o re! Ba bone dipono tša lefela, ba porofeta maaka, mola ba sa rongwa ke Morena, mme ba holofela gore lentšu la bona le tlo tšwelela. 7A ga la bona pono tša lefela? A ga la porofeta maaka ge le re: Morena o re, mola ke sa ka ka le roma?
8Bjale Morena Mong wa bohle o re: Bjale ke nna e! Ke lwa le lena, ka gobane le bolela tša lefela; Le bona pono tša maaka. O realo Morena. 9Seatla sa ka se lwa le baporofeta ba dipono tša lefela, ba ba porofetago maaka; ba ka se be ba phuthego ya setšhaba sa ka, ba ka se ke ba ngwalwa mo pukung ya ba moloko wa Isiraele; ba ka se fihle kua nageng ya Isiraele. Ke mo le tlogo lemoga ge Morena Mong a bohle e le nna.
10Molato ke ge ba timetša setšhaba sa ka, ba re: Go khutšo, mola go se khutšo. Ge setšhaba se aga mmoto, ba o taka ka motako wo o phumogago. 11Botša bona bao ba go taka ka motako wo o phumogago, o re: Mmoto o tlo phušoga; go tlo na pula e kgolo mohla ke roma mabje a sefako a o tula; o tlo wa go tsogile ledimo le legolo. 12Gomme mohla mmoto o wile, ke mo le tlogo thwe: O kae motako wola wo le takilego ka wona?
13Ke tšona tše Morena Mong wa bohle a di bolelago ge a re: Ke tlo tšutliša ledimo le le maatla ke befetšwe; ke tlo neša pula e kgolo ke galefile, le maswika a sefako a go thunthanya ka sehlogo. 14E tlo ba go phušola mmoto wo le o takilego ka motako o phumogago ka o ušetša fase, gwa tlo šala go bonala motheo wa wona. O tlo wa, lena la loba le wona; ke mo le tlo go lemoga ge Morena e le nna.
15Ka mokgwa o bjalo ke tlo feletša kgalefo ya ka go mmoto woo le go ba ba o takilego ka motako wo o phumogago, ka tlo le botša ka re: Mmoto wola ga o sa le gona; le ba ba o takilego ga ba sa le gona. 16Ke ra lena baporofeta ba Isiraele ba go porofetela motse wa Jerusalema, ba go o nyakela dipono tša khutšo. O realo Morena Mong wa bohle.
17Bjale wene ngwana motho! Lebella basadi bao ba setšhaba sa geno ba ba porofetago ka la bona. Bona o ba porofetele o re: 18Morena Mong wa bohle o re:
Kotsi e tlo wela basadi bao ba go kgokela ditho tša bona tšohle matsaka, ba go direla dihlogo tša bona dikuane ka tekanyo ya bogolo bja tšona, e le go tanya meoya ya batho. A fa le ka tanya meoya ya setšhaba sa ka, mme ya lena meoya la tloga le e phediša? 19Le senya ina la ka go setšhaba sa ka, le direla go bona mabele a kago tlala legoswi, le nyaka thatana ya bogobe, e le go bolaya meoya ye e sa swanelago go hwa, le phediša meoya ye e sa swanelago go phela. Le dira bjalo ka go aketša setšhaba sa ka se se thaetšago maaka.
20Bjale Morena Mong wa bohle o re: Tsebang gore ke tlo senya matsaka a lena a le tanyago meoya ka ona boka dirionyana; ke tlo a kgakgatholla matsogong a lena, ka tanyolla meoya ye le e tantšego bjalo ka dinonyana. 21Dikuane tša lena ke tlo di gagola, ka namolela setšhaba sa ka diatleng tša lena, gore se se hlwe se dula se tantšwe ke bolena. Ke mo le tlogo lemoga ge Morena e le nna.
22Ke tlo lefetša mo le hlokofaditšego pelo ya moloki ka go mo foraforetša, e le yo nna ke bego ke sa rate go mo hlokofatša. Le tiišitše diatla tša ba babe, ba se sa lahla tsela e mpe ya bona, ke se ba phediše. 23Bjale pono tšela tša lefela le ka se hlwe le di bona; le ka se hlwe le bola tša bonoge. Ke namolela setšhaba sa ka diatleng tša lena, gore le lemoge ge Morena e le nna.
