EKISODO 35

₁Moshe o kgobela phuthego ka moka ya Baisiraele, a ba anegela a re: šedi tše Morena a di boletšego, a re di dirwe: ₂Mediro a e dirwe ka matšatši a selelago; la go šupa le le dire le lekgethwa, la go khutša sa ruri, la Morena. E a dirago modiro ka lona, a a bolawe. ₃Ka la Sabatha le se ke la gotša mollo malapeng a lena ka moka.

₄Moshe a anegela phuthego ka moka ya Baisiraele a re: Tše Morena a di laetšego šedi: ₅O re: Ntšhetšang Morena motšhelo wa dilo tša lena. Mang le mang a tliše motšhelo wa Morena ka mo pelo ya gagwe e ithapago ka gona, e ka ba gauta, le ge e le silifera, le ge e le mphiri, ₆le purapura e tala le e khubedu, le moretele, le leokodi, le boya bja dipudi, ₇le matlalo a hubaditšwego a dikgapa, le a nebiwatle, le mamati a moduhlare, ₈le makhura a sehlomapone, le dihlare tša monko o bose tša makhura a setlolo, le diorelo tša monko o bose, ₉le maswikana a šohama a go thakga nkatanakgethwa le thebjana.

₁₀Gomme bohle ba dipelo tše bohlale mo go lena ba tle, ba dire dilo tšeo Morena a di laetšego. ₁₁Ba dire Ngwako le mašela a go o rulela, le dikobo tša go o rulela, le dingamelo tša tšona, le mamati a magwakgwa, le dipalelo tša ona, le dikokwane tša gona le maoto a tšona, ₁₂le polokelo le diphata tša go e rwala, le sekhurumelo sa yona, le lešira la go e šira, ₁₃le sethalana le diphata tša go se rwala, le dibjana tša sona ka moka, le dinkgwaponwa, ₁₄le sehlomapone sa go bonegela, le dibjana tša sona, le dipone tša sona, le makhura a sehlomapone, ₁₅le aletare ya diorelo le diphata tša go e rwala, le makhura a setlolo le diorelo tša monko o bose, le lešira la mojako wa Ngwako, ₁₆le aletare ya dihlabelo le selogwa sa yona, le dibjana tša yona ka moka, le legopo le leoto la lona. ₁₇Le mašela a go šira lapa, le dikokwane tša lona le maoto a tšona, le lešira la sefero sa lapa, ₁₈le dimapolo tša Ngwako, le dimapolo tša lapa, le dithapo tša tšona, ₁₉le diaparo tše di logilwego setšhepi tša go dira sekgethweng, le diaparo tše kgethwa tša Arone moperisita le tša barwa ba gagwe tša boperisita.

₂₀Gomme phuthego ka moka ya Baisiraele ya tloga gona moo pele ga Moshe, ₂₁gomme mang le mang, wa go tsošwa ke pelo ya gagwe, le wa go gapeletšwa ke moya wa gagwe, a boa a na le motšhelo wa Morena, wa tša go dira Ngwako wa Kgwerano, le tša go dira mo go wona, le tša go dira diaparo tše kgethwa. ₂₂Ba tla, banna le basadi, ka moka ba go ithapa ka pelo, ba tliša maseka, le mangina, le dipalamonwana, le dipheta, le dilo tša mehutahuta tša gauta, ka moka ba ekere seekaro sa gauta, ba se tlišetša Morena. ₂₃Mang le mang e a hweditšego a na le purapura e tala, le ge e le e khubedu, le moretele, le leokodi, le boya bja dipudi, le matlalo a dikgapa a a hubaditšwego, le matlalo a nebiwatle, a di tliša. ₂₄Mang le mang e a hweditšego a na le silifera, le ge e le mphiri, a tlisa motšhelo wa Morena; le e a hweditšego a na le kwata tša moduhlare tše di kago ba le modiro, a di tliša. ₂₅Le basadi bohle ba dipelo tše di hlalefilego ba ohla ka diatla tša bona, mme ba tliša purapura e tala le e khubedu, le moretele, le leokodi, ba di ohlile. ₂₆Le basadi bohle ba go ithapa ka go kgona, ba ohla boya bja dipudi. ₂₇Bagolo ba tlišitše maswikana a šohama, le a go thakga nkatanakgethwa le thebjana, ₂₈le dihlare tša monko o bose, le makhura a go bonega, le makhura a setlolo, le diorelo tša monko o bose. ₂₉Ba dira bjalo, banna ka moka le basadi, ba ithapa ba dira mediro ka moka ye Morena a e laetšego ka Moshe. Baisiraele ba ntšhitše ka go ithapa ba nea Morena.

₃₀Moshe a botša Baisiraele a re: Le tsebe gore Morena o biditše Betsaliele ka leina; ke morwa wa Uri morwa wa Huri wa moloko wa Juda. ₃₁O mo humišitše moya wa Modimo, ka bohlale le ka tlhaologanyo le ka tsebo medirong ka moka, ₃₂gore a eleletše mediro e dirwago ka bohlale, ka gauta le ka silifera, le ka mphiri, ₃₃le go seta maswikana a bothakga, le go betla dikwata, le go dira mediro ya mehutahuta ka keleletšo. ₃₄Mo pelong ya gagwe Morena o mo kgoniša go ruta, yena le Oholiaba morwa wa Ahisama wa moloko wa Dani. ₃₅O ba humišitše bohlale bja pelo, ba kgone go dira mediro ka moka ya go seta, le ya balogasetšhepi le ya go loga tša mabalabala ka purapura e tala le e khubedu, le moretele, le leokodi, le go loga mašela. Ke bona ba tlogo dira mediro ya mehutahuta, ba eleletša tša go dirwa ka bohlale.