EKISODO 11

₁Bjale Morena a bolela le Moshe a re: Ke sa na le kotlo e engwe, ye ke tlogo e tlišetša Farao le naga ya Egipita; ke mo a tlogo le lesa la tloga fa. Gomme e tlo re ge a le fa tsela, e tlo ba go le raka ka maatla. ₂Bjale botša ba geno, ba di kwišiše, o re: Monna a kgopele go moagišani, le mosadi a kgopele go e a agilego nae, mme a fiwe dilo tša silifera le tša gauta. ₃Gomme Morena a thuša setšhaba, ba hwetša Baegipita e le ba botho. Ga e le Moshe, yena bahlanka ba Farao le ba setšhaba ba mo lebeletše ba re ke monna e mogolo ka kudu mo nageng ya Egipita.

₄Gomme Moshe a re: Morena o re: Mašegogare ke tlo putlaganya naga ya Egipita; ₅Gomme maitšibulo ka moka a nageng ya Egipita a tlo hwa; go tlo thoma ka morwa wa pele wa Farao wa go tlo dula sedulong sa gagwe, gwa iša go wa leitšibulo wa mosadi wa molata e a khunamego lwaleng, le maitšibulo ka moka a diruiwa. ₆Ke mo go tlogo ba le sello se segolo nageng ka moka ya Egipita; e tlo ba se se fetago dillo ka moka tše di kilego tša ba gona, le tše di tlo ba gona. ₇Eupša mo go Baisiraele ka moka go ka se ke gwa kwala le mpša e bopelago motho le ge e le seruiwa. Ke mo le tlogo lemoga gore Morena o hlaola Baisiraele mo go Baegipita. ₈Ke mo bahlanka ba gago ka moka ba tlogo tšwela go nna ba lotšha ba re: A ko tšwe, wena le setšhaba ka moka se se go šalago morago! Ke gona ge ke tlo tšwa. A realo a tšwa go Farao, a tloga a tuka bogale.

₉Ke tšona tše Morena a di boditšego Moshe a re: Farao a ka se ke a kwa se le se bolelago, gore ke dire mehlolo e mentši mo nageng ya Egipita. ₁₀Gomme mehlolo yeo ka moka e dirilwe ke Moshe le Arone ba lebane le Farao. Mme Morena a thatafatša pelo ya Farao gore a gane go lesa Baisiraele ba tloge nageng ya gagwe.