ESITERE 1

₁Ke tša mehla ya Ahasiwerosi. Ahasiwerosi o be a buša dinaga tše lekgolo le masome a mabedi a metšo e šupago tše di bego di goma ka la India le ka naga ya Kushe. ₂Ke tša mehla yeo ge kgoši Ahasiwerosi a dutše sedulong sa bogoši kua Susani motseng wa mošate.

₃Ka ngwaga wa boraro wa mmušo wa gagwe o kile a direla bakgoma ba gagwe le bahlanka ba gagwe ka moka monyanya; gwa tla ba madira a Peresia le a Meda, le balaodi le balaki ba dinaga, ba kgobokana pele ga gagwe. ₄Gwa fela matšatši a mantši, a lekgolo le masome a seswai, a ba bontšha bogolo bja mahumo a bogoši bja gagwe, le botšhephi le letago la borena bja gagwe.

₅Ya re ge go fetile matšatši ao, kgoši ya direla setšhaba sa motse wa mošate wa Susani monyanya; ba bagolo le ba banyenyane ba fetša matšatši a šupago ba le kgorong ya meriti ya mošate. ₆Go be go bapilwe mašela a metwatwa a moretele le a matala, a ngangilwe ka dithapo tša mebalabala a purapura, di kgokilwe ka dimanego tša silifera mo dikokwaneng tša mantšwemašwana. Go be go beilwe didulo tša mesamelo ya mašela a a logilwego ka hlale tša gauta le tša silifere; lebato e be e le maswika a magakabje le a bohlokwa le a mebala e mentši. ₇Go be go nwewa ka dinwelo tša mehutahuta tša gauta; beine e be e le e ntši ya kgoši, beineserena. ₈Go be go nwewa go sa gapeletšwe motho, gobane kgoši e be e laetše balaki ba mošate ya re mang le mang a dire ka mo go mo kgahlago.

₉Le basadi ba be ba diretšwe monyanya wa bona ke mohumagadi Wasithi ka mo lapeng la ngwako wa kgoši.

₁₀Ka tšatši la go šupa, ge pelo ya kgoši e thabile ka beine, kgoši ya bitša Mehumani, le Bisitha, le Haribona, le Abakatha, le Sethara, le Karikasi, ona matona a magolo a bego a hlankela kgoši Ahasiwerosi, ₁₁ya re ba tliše Wasithi go kgoši a rwele mofapahlogo wa bohumagadi, gore batho le bakgoma ba bone botse bja gagwe, gobane e be e le wa sebopego se sebotse. ₁₂Mohumagadi Wasithi a gana go tla ge kgoši e mmitša ka bahlanka. Ke mo kgoši e befetšwego gagolo ya tuka bogale.

₁₃Ya bolela le ba bohlale, batsebi ba mabaka; gobane ditaba tša kgoši di be di išwa go bona bomaitse a melao le mekgwa. ₁₄Ba ba bego ba le kgauswi le yena e be e le Karasena, le Sethara, le Adimatha, le Tharasisi, le Merese, le Marasena, le Menukani, bakgoma ba ba šupago ba Baperesia le Bameda; ke bona ba ba bego ba bona sefahlogo sa kgoši, ba le madulong a pele mmušong. ₁₅A ba botšiša a re: Ge go iwa ka molao, mohumagadi Wasithi a ka dirwa bjang ge a ganne go dira se se boletšwego ke kgoši mola e mmitša ka bahlanka ba yona?

₁₆Menukani a fetola a le pele ga kgoši le bakgoma a re: Mohumagadi Wasithi ga a ka a senya kgoši fela, o sentše le bakgoma ka moka, le ditšhaba ka moka tše dinageng tšohle tša kgoši Ahasiwerosi. ₁₇Gobane taba ye ya mohumagadi e tlo kwala go basadi ka moka; mme ba tlo nyatša banna ba bona, ba re: Kgoši Ahasiwerosi o kile a laela a re mohumagadi Wasithi a bitšwe a tle pele ga gagwe, mme a gana go tla. ₁₈Gomme go tloga la lehono bahumagadi ba Baperesia le ba Bameda ge ba ekwa taba ye ya mohumagadi, ba tlo di sebela bakgoma bohle ba kgoši, ya tlo ba lenyatšo le lehloyo fela. ₁₉Ge kgoši e ka dumela, gona a go tšwe molao wa kgoši, o ngwalwe pukung ya melao ya Baperesia le Bameda, gore o sa tlo hlanošwa; mme molao wo o re: Wasithi a se ke a hlwa a etla pele ga kgoši Ahasiwerosi; gomme kgoši e tšee bohumagadi e bo nee e mongwe e a mo phalago. ₂₀Molao wo wa kgoši ge o ka kwala mmušong wa yona ka moka, gona ba bagolo le ba banyenyane ba tlo godiša banna ba bona.

₂₁Lentšu le la kgahla kgoši le bakgoma; mme kgoši ya dira sona seo se boletšwego ke Menukani. ₂₂Mangwalo a romelwa dinageng ka moka tša kgoši, naga ya ngwalelwa ka mongwalo wa yona, setšhaba sa ngwalelwa ka leleme la sona, gore monna a buše ba ngwakong wa gagwe, mme a bolele ka mmolelo wa setšhaba sa gabo.