BAEFESO 6

₁Lena bana! Kwang batswadi ba lena Moreneng, gobane ke gona go loka. ₂Godiša tatago le mmago, ke wona molao wa pele o nago le kholofedišo ya go re: ₃O tle o be le mahlatse, o phele galelele lefaseng.

₄Le lena botatagobana! Le se ke la befediša bana ba lena; sa lena a e be go ba etetša ka go ba ruta le go ba eletša tša Morena.

₅Lena bahlanka! Ba e lego beng ba lena ka thoko ya mmele le ba kweng ka poifo le ka tšhogo le ka pelo-thereši bjalo ka ge le ekwa Kriste. ₆E se be go ba hlankela mahlong ka mokgwa wa bakgahlabatho; a e be ka mokgwa wa bahlanka ba Kriste ba ba dirago thato ya Modimo ka pelo e ratago. ₇Le ba hlankele ka go ithapa, eke le direla Morena, e sego batho. ₈Le tsebe gore se botse se motho a kago se dira, se tlo mmoela se etšwa go Modimo, le ge e le mohlanka, le ge e le mohunologi.

₉Le lena beng ba bona, le ba dire ka mokgwa woo: Le lese go kgalema; le fele le tseba gore mong wa lena le wa bona o kua legodimong; gomme Yena ga a bebe motho.

₁₀Bjale bana bešo! Nke ke fetše ka go re: Tiang Moreneng le thateng ya maatla a gagwe. ₁₁Aparang ditlhamo tšohle tša Modimo, gore le kgone go fenya dipogo tša Diabolo. ₁₂Gobane tlhabano ya rena ga se ya go lwa le madi le nama; re lwa le mebušo le ba maatla le balaolamafase ba leswiswi; re lwa le meoya ya bobe e lego sebakeng sa godimo. ₁₃Ke gona itlhameng ka marumo ohle a Modimo, gore ka mohlamobe le kgone go phema, le šale le eme le fentše tšohle.

₁₄Emang ge le itlemile matheka ka therešo, le apere sephemasefega sa toko, ₁₅dinaong le dule le itlemeletše go phafogela Ebangedi ya khutšo. ₁₆Gagologolo le sware kotse ya tumelo, ye le kgonago go tima mesebe e tšhumago ya yena e mobe ka yona. ₁₇Le rwale kefa ya phologo, le sware tšhoša ya Moya e lego lentšu la Modimo. ₁₈Le be barapedi ba go tliša dithapelo tšohle le kgopelo tšohle ka mabaka ohle ka Moya; modiro woo le o phakgamele ka go kgotlelela ruri, le ka go rapelela bakgethwa ka moka. ₁₉Le nna le nthapelele, gore ge ke ahlama molomo ke fiwe lentšu, gore phihlo ya Ebangedi ke e kwalakwatše ka mafolofolo, ₂₀ke le motseta wa yona ke tlemilwe, gore ke e hlatsele ka mafolofolo, ka mo go ntshwanetšego ge ke bolela.

₂₁Tša bophelo bja ka, le tše ke di dirago, go rata gore le di tsebe. Le tlo di tsebišwa ke Tigiko ngwana borena morategi, modiredi e a botegago Moreneng. ₂₂Ke mo rometše go lena ka baka lona leo gore le tsebe tša bophelo bja rena, a homotše dipelo tša lena.

₂₃Khutšo a e be le lena bana bešo, le lerato le nago le tumelo, le le tšwago go Modimo Tata wešo le go Morena Jesu Kriste. ₂₄Kgaugelo a e tlele bohle ba ba ratago Mong wa rena Jesu Kriste ba sa thiše. Amene.