BAEFESO 4

₁Ke a le rapela ge nna mogolegwa Moreneng, ke re swarang ka tsela ye e swanetšego se le bileditšwego sona, ₂le ye ka go ikokobetšamoka, le ka boleta, le ka go se fele pelo, le kwana ka lerato. ₃Le phegelele go tielela boteeng bja moya, setlemo e le kagišo. ₄Mmele ke o tee, bjalo ka ge go bitšwa ga lena e le go biletšwa kholofelo e tee. ₅Mong wa rena ke o tee, tumelo ke e tee, kolobetšo ke e tee. ₆Modimo ke o tee, yena Ragobohle, Kokamabohle, Modirakabohle mo go bohle.

₇E mongwe le e mongwe wa rena o seditšwe ka kgaugelo, ka tekanyo ya ba mo Kriste a re neilego ka gona. ₈Gobane go itšwe: O rotogetše kua godimo, a thopolla mathopša, a nea batho dineo. ₉Ge go thwe: O rotogile, ke go reng? A ga se go re o be a fologetše dibakeng tša tlasetlase tša lefase? ₁₀Mofologi yo ke yena a rotogetšego godimo ga magodimo ohle, a ba Motlalagohle. ₁₁Gomme ke yena a neilego dineo, ba bangwe ya ba baapostola, ba bangwe ya ba baporofeta, ba bangwe ya ba bagoeledi, ba bangwe ya ba badiši le baruti, ₁₂ya ba go hlamiša bakgethwa gore ba kgone go direla phuthego, gore mmele wa Kriste o agišwe, ₁₃gore rena ka moka re be re fihlele botee bja tumelo le bja tsebo ya go tseba Morwa wa Modimo, re fihlele senna ka botlalo, le bogolwane bja go lekanela botlalo bja Kriste. ₁₄Re se ke ra hlwa re le bana, batho ba go fo gapagapiwa le go tšewatšewa ke phefo e ngwe le e ngwe ya thuto ka go foraforetšwa ke batho, re gokwa ke maano a go re aroša. ₁₅Re be ba therešo leratong, mme re fele re tielela dilong tšohle, re le ditho tša Kriste, e lego yena hlogo, ₁₆Hlogo e bušago mmele wohle, e kopanyago ditho tšohle tša holana, setho sa dira modiro wa sona wo o se lebanego, sa phediša mmele sa o bopa, sa o agiša ka lerato.

₁₇Bjale, se ke se bolelago, se ke se tiišago Moreneng ke go re: Le se ke la etša bantle ba ba swerego tsela ba šilofetše dipelong tša bona. ₁₈Ba fifetše tlhaologanyo, ba tlogelane le bophelo bja Modimo, e le ba go se tsebe, dipelo tša bona di thatafetše. ₁₉Ba reteletše ba ineela bohlotlolo, ba dira tša ditšhila ba ile le dikganyogo.

₂₀Gomme lena ga le bjalo; le ithutile go tseba Kriste. ₂₁Mme le ithutile ruri, la rutega ka yena, la bona ge therešo e le mo go Jesu. ₂₂Ke gona apolang tše e lego tša tsela ya kgale, tša motho e motala, e a senyegago a forilwe ke dikganyogo. ₂₃Sa lena a e be go mpshafatšwa moyeng wa dipelo tša lena. ₂₄Le apare motho e mofsa, e a bopetšwego go etša Modimo go lokeng le kgethegong ya makgonthe.

₂₅Ke gona apolang maaka; ge le boledišana le bolele therešo, gobane re ditho seng sa rena. ₂₆Ge le galefa le se ke la senya; a letšatši le se dikele le sa galefile. ₂₇Mme le se ke la šuthela Diabolo sebaka. ₂₈E a utswitšego a se ke a hlwa a utswa; a a kgothale a dire tše botse ka diatla tša gagwe, a tle a be le tše a kago abela mohloki. ₂₉Melomong ya lena go se ke gwa tšwa lentšu le lebe; a go tšwe le bolo la go iša kagišo mo e hlaelago, le iše tšhegofatšo go ba ba le kwago. ₃₀Le se ke la nyamiša Moya o mokgethwa wa Modimo, wo le swailwego ka wona la swaelwa tšatši la topollo. ₃₁Tše e kego ke sekgoro, le bonaba, le mašata, le maroga, a di be kgole le lena, le bobe bjohle. ₃₂Sa lena a e be go dirana ka botho le ka bonolo, le go gaguelana bjalo ka ge Modimo le yena a le gaugetše ka Kriste.