BAEFESO 1

₁Paulo Moapostola wa Jesu Kriste ka mo Modimo a ratilego, ke ngwalela bakgethwa ba motseng wa Efeso, ba ba dumetšego Jesu Kriste.

₂Kgaugelo a e le tlele le khutšo ye e tšwago go Modimo Tata wešo le go Morena Jesu Kriste.

₃A go tumišwe Modimo Tatago Mong wa rena Jesu Kriste, e a re šegoafaditšego ka ditšhegofatšo tšohle tša Moya ka tša magodimong ka Kriste, ₄ka mo a re kgethilego ka yena Kriste mola lefase le sešo la thewa, gore re be ba bakgethwa, ba ba se nago bosodi pele ga gagwe.

₅Ka lerato o re hlaoletše go ba bana ba gagwe ka Jesu Kriste, a ikgahletše go rata fao, ₆gore go retwe letago la kgaugelo ya gagwe, ye a re gaugetšego ka yona ka yena Morategi, ₇yo re bonego ka yena topollo ka madi a gagwe, yona tebalelo ya dikarogo ka lehumo la kgaugelo ya gagwe, ₈ye a re humišitšego ka yona ka bohlale ka moka le ka tlhaologanyo ka moka, ₉Ka go re tsebiša sephiri sa thato ya gagwe. Ke tšona tše a bego a di rata, a dula a di beile pelong ya gagwe, ₁₀gore a tšweletše phethego ya mabaka, gore dilo tšohle tša legodimong le tša lefaseng a di hlatlaganye gore di bušwe ke yena Kriste, ₁₁yena yo re lego bahlaolelwa go ja bohwa ka yena ka go ithatela ga yena Modiratšohle, Mophethamorero wa thato ya gagwe ₁₂gore ka yena go tumišwe letago la gagwe, ka rena re bego re holofetše go tla ga Kriste, ₁₃yo le lena le mo dumetšego le kwele lentšu la therešo, yona Ebangedi ya go phološwa ga lena, la swaiwa ka Moya o mokgethwa, wo le bego le o holofedišitšwe, ₁₄wo e lego yona peeletšo ya bohwa ya go re rena setšhaba sa gagwe re tlo lopollwa, gwa tlo retwa letago la gagwe.

₁₅Ke gona le nna, ge ke kwele ka mo le dumelago Morena Jesu, le ka mo le ratago bakgethwa ka moka, ₁₆ga ke kgaotše go le lebogela, ge ke le gopola dithapelong tša ka, ₁₇gore yena Modimo wa Mong wa rena Jesu Kriste, yena Raletago, a le fe Moya wa bohlale le wa go le utollela tsebo ya go mo tseba; ₁₈a le fe mahlo a pelo e edišitšwego, gore le tsebe kholofelo ya bao a ba biditšego, le tsebe lehumo la letago la bohwa bja ba gagwe, la ba bakgethwa, ₁₉le tsebe bogologolo bja maatla a gagwe a a dirago mo go rena ba re dumelago. ₂₀Ke ona maatla ao a tšweleditšego tiro ye a e kgonnego, maatla ao a bonetšego ge a tsoša Kriste bahung, a mo dudiša ka letsogong le letona la gagwe kua magodimong, ₂₁a mo phagamiša godimo ga babuši bohle le ba maatla bohle le maina ohle a kago bolwa, e sego a lebakeng leno fela, le a lebakeng le le tlogo tla. ₂₂Gomme dilo tšohle o di beile ka tlase ga maoto a gagwe, a mmea a ba hlogo ya phuthego tšohle dilong tšohle. ₂₃Phuthego ya ba mmele wa gagwe mo go tlalago yena Motlalatšohle go bohle.