Bophelo bja moloki le bja e mobe bo tsebja ke Modimo
1Gobane tšeo ka moka ke di etše hloko, ka re ke di lemoge, ge bahlale le baloki ba le diatleng tša Modimo, le tiro tša bona. Le setee sa tše di tlogo mo tlela, ge e tlo ba go ratana goba go hloyana, motho ga a di tsebe. 2Bohle ba tlelwa ke tšohle; moloki le yo kgopo ba tlelwa ke ditee, yo bolo le yo tsoro le yo tšhila, ba go iša didimo le ba ba sa išego. Tša yo bolo le tša sesenyi di a swana; le tša e a enago le tša e a šiago keno ke ditee. 3Ke tšona tše di befilego mo go tšohle di dirwago fa tlase ga letšatši, ge tše di tlelago bohle di swana, le gobane pelo tša bana ba batho di tletše bobe, mme dipelong tša bona go na le bošilo ge ba sa phela, mme boyo bja bona e le kua bahung. 4Gobane motho a sa balwa le ba phelago, o na le kholofelo; hleng mpša e phelago e phala tau e hwilego. 5Gobane ba ba phelago ba tseba gore ba tlo hwa; mme go bahu ga go se se tsebjago, ga ba sa newa selo, gobane ba lebetšwe. 6Gobane lerato la bona, lehloyo la bona, lehufa la bona, di fedile kgale; ga ba sa na kabelo neng le neng ya se se kago dirwa fa tlase ga letšatši.
7Eriye ge, o je bogobe bja gago o thabile, o nwe morara wa gago o rotše pelo; gobane ke kgale Modimo a kgahlwa ke tiro tša gago. 8Aparo tša gago a e be tše tšhweu ka mehla; mme hlogo ya gago a e se hloke makhura. 9Thabišana le mosadi wago yo o mo ratago mehla yohle ya bophelo bjago bja lefela; ke yona kabelo ya gago ye Modimo a go fago yona bophelong le tapišong tša gago tše o itapišago ka tšona fa tlase ga letšatši. 10Tšohle tše atla sa gago se di kgonago, di dire ka maatla a gago gobane kua bodulabahu mo o yago gona, ga go na modiro, ga go na kgopolo, ga go tsebo le bohlale.
11Ka boela ka bona, ge fa tlase ga letšatši tšhii e se mokitimi, mofenyi e se mogale, bogobe e se bja yo bohlale, lehumo e se la wa tlhaloganyo, go ratwa e se ga wa tsebo. Tšohle di fo ba tlela bohle ka lebaka la tšona. 12Gobane motho le yena ga a tsebe lebaka la gagwe, boka hlapi ge e tanywa wa go se phonyokge, le nonyana ge e tanywa ke molaba, le bana ba batho ba swarwa boka tšona ka mohla o mobe, ba tšhoga di ba wetše.
13Sebo bohlale bjo bongwe bjo ke bo bonego fa tlase ga letšatši, ka hwetša e le bjo bogolo. 14Go be go na le motse o monyane wa banna ba sego nene; wa tšwelwa dira ke kgoši e kgolo, ya o rakelela, ya o dikanetša ka dibo tše kgolo. 15Gona moo motseng gwa hwetšwa monna wa modiidi yo bohlale; a o phološa ka bohlale bja gagwe. Gomme mo motseng woo gwa se be le motho wa go leboga monna eo wa modiidi. 16Ke mo ke itšego: Bohlale bo phala maatla. Fela, bohlale bja modiidi bo a nyatšwa, le mantšu a gagwe ga a kwewe. 17Mantšu a ba bohlale a kwewago go iketlilwe, a phala mokgoši wa mmuši wa mašilo. 18Bohlale bo phala marumo; fela, sesenyi setee se senya botse bjo bontši.
