MMOLEDI 7

₁Ina le botse le phala makhura a mabotse; tšatši la go hwa le phala la go tswalwa.

₂Go ya lapeng la monyanya, go phalwa ke go ya lapeng la dillo; le šupa boyo bja batho ka moka; mme e a phelago o a eleletša.

₃Nyamo e phala lešego; mahlo ge a lla, pelo e ba e botse.

₄Ngwakong wa dillo ke mo go lego pelo tše bohlale; dipelo tša ditlatla di ngwakong wa mathabo.

₅Go kwa tsholo ya mohlale go phala go kwa koša ya mašilo.

₆Go sega ga lešilo go etša go rathaša ga meetlwa ge e bešetšwa; le gona ke lefela.

₇Ruri tšhego, le mohlale e ka šilofatša; tsogolekobong le senya pelo.

₈Phethego ya taba e phala mathomo a yona; mokgotleledi o phala moipoti.

₉Se phake go selekega ka pelong; tshelekego e agile mo pelong ya setlatla.

₁₀Se re: Mehla ya bjalo e reng e phalwa ke ya kgale? Yo bohlale ga latiše tšeo.

₁₁Bohlale ke bolo, bo etša bohwa; ba ba bonago letšatši ba re ke lehumo. ₁₂Moriting wa bohlale ke moriting wa lehumo; se segolo mo tsebong ke ge bohlale bo phediša mong wa bjona.

₁₃Setša tiro tša Modimo; ge a obamiša go ka obamolla mang? ₁₄Mohla wa mahlatse o thabe; ka mohla o mobe o lebelele; mehla ka moka e dirwa ke Modimo, gore motho a se tsebe tše di tlago. ₁₅Tše tšohle ke di bone phelong bja ka bja lefela. Go na le moloki molobatokong; go na le yo kgopo molalamabokgopong. ₁₆O se ke wa itira moloki wa paala; o se ke wa itira mohlalefi wa bopadi. O tlo ba o itshenyetšang? ₁₇O se ke wa itira yo mobe ka go fetiša, o se be lešilo; o tlo ba o hwelang e sešo ya ba letšatši la gago? ₁₈Ke mo gobotse ge o swara se, mme o se lese sela; e a tlogo tšwa go tšohle ke mošia-Modimo.

₁₉Bohlale bo fa motho maatla go phala bagolo ba lesome mo motseng.

₂₀Ruri mo faseng ga go mothomoloki modiratšebolo e a sa dirego sebe.

₂₁Le gona o se ke wa ya le mantšu ka moka a batho ba a bolelago, o se tlo kwa ge mohlanka wago a go roga; ₂₂Gobane pelo ya gago e tseba gobane ke gantši le wena o roga ba bangwe.

₂₃Tšeo ka moka ke di fenyekile ka bohlale, ka re ke hlalefe; fela, ka hwetša bo le kgole le nna. ₂₄Tše di lego gona di kgole, di kua fasefase; di ka hwetšwa ke mang? ₂₅Ka lebaleba, ke na le pelo ya ka, ka re ke tsebe, ke nyake bohlale le temogo. Ka re ke tsebe ge bobe e le botlatla, ge bošilo e le boota.

₂₆Ka hwetša se se fetišago lehu go galaka e le mosadi wa pelo e lego moreo le moutlo Yo atla tša gagwe e lego ditlemo, go tlo phonyokga mokgahla-Modimo; modiradibe o tlo tanywa ke yena. ₂₇Mmoledi o re: Phakgama! Nna ke di bone ka setee ka setee ka hlalefa. ₂₈Se pelo e se nyakilego ya se hloka sese: Mo go batho ba sekete monna ke bone o tee; ge e le mosadi, mo go bao bohle ka mo hloka. ₂₉Se ke se hweditšego ke setee; sese: Batho, Modimo o ba dirile baloki; ke bona ba ba nyakago mahlale a mantši.