MMOLEDI 3

₁Tšohle di na le mohla wa tšona, le tirwa tša ka tlase ga letšatši di na le mabaka a tšona. ₂Go tswalwa go na le mohla wa gona, le go hwa go na le mohla wa gona. Go bjala go na le mohla wa gona, le go tomola go na le mohla wa gona. ₃Go bolaya go na le mohla wa gona, le go alafa go na le mohla wa gona. Go phušola go na le mohla wa gona, le go aga go na le mohla wa gona. ₄Go lla go na le mohla wa gona, le go sega go na le mohla wa gona. Go golola go na le mohla wa gona, le go bina go na le mohla wa gona. ₅Go šwalalanya maswika go na le mohla wa gona, le go kgobela maswika go na le mohla wa gona. Go atlana go na le mohla wa gona, le go gerulana go na le mohla wa gona. ₆Go nyaka go na le mohla wa gona, le go tšitlanya go na le mohla wa gona. Go boloka go na le mohla wa gona, le go lahla go na le mohla wa gona. ₇Go kgaola go na le mohla wa gona, le go hlomeletša go na le mohla wa gona. Go homola go na le mohla wa gona, le go bolela go na le mohla wa gona. ₈Go rata go na le mohla wa gona, le go hloya go na le mohla wa gona. Go lwa go na le mohla wa gona, le go boelana go na le mohla wa gona.

₉Modiri o holegang ka go itapiša? ₁₀Ke bone mediro ye Modimo a e neetšego bana ba batho, gore ba itapiše ka yona. ₁₁Tšohle o di dirile gore di kgahle ka mohla wa tšona; le tša neng le neng o di beile dipelong tša bona. Fela, tiro ye yena Modimo a e dirago, mathomo le mafelo a yona, motho ga a e lemoge. ₁₂Se ke se tsebago ke gore ga go se se botse mo go bona, ge e se go thaba le go dira tše botse ge ba sa phela. ₁₃Le gona, ke neo ya Modimo, ge motho a eja, a enwa, mme a bona tše dibotse ka tapišo tšagwe tšohle.

₁₄Ke tseba gore tšohle tše Modimo a di dirilego, e tla ba tša neng le neng; ga go na se se eketšwago le se se fokotšwago. Modimo o dirile fao gore ba boife yena. ₁₅Tše di lego gona ke tša kgale; le tše di tlogo ba gona ke tša kgale. Modimo o fela a tsoša tše di bego di lebetšwe.

₁₆Le gona ke bone ge fa tlase ga letšatši bakeng sa molao go le bokgopo, bokgopo bo tšere baka sa toko. ₁₇Mo pelong ya ka ka re: Modimo o tlo ba a ahlola moloki le yo kgopo. Gobane o beetše taba tšohle le ditiro tšohle lebaka la tšona. ₁₈Nna pelong ya ka ka re: Go bjalo, gore bana ba batho Modimo a ba leke, ba tle ba ipone gore ba etša diphoofolo. ₁₉Gobane tše di tlelago bana ba batho, di tlela le diphoofolo; go hwa go a swana, go buša moya go a swana; ga go na se motho a fetago phoofolo ka sona, gobane tšohle ke lefela. ₂₀Tšohle di leba felo gotee; tšohle di tšwa leroleng; mme tšohle di boela leroleng. ₂₁Ke mang a tsebago ge moya wa bana ba batho o rotogela kua godimo, ge moya wa phoofolo o fologela tlase lefaseng? ₂₂Ke mo ke bonego go se se kaone, ge e se ge motho a thabela tiro tša gagwe; gobane ke yona kabelo ya gagwe; gobane ke mang a tlogo mo iša mo a tlogo bona tše di tlogo hlaga ge a fulere?