MMOLEDI 10

₁Ntši tše hwilego di senya sehlare sa ngaka, sa bola, sa nkga. Le bošilo bjo bonyane bo roba bohlale le bokwala.

₂Pelo ya mohlale e mo letsogong la gagwe le letona; ya setlatla e mo go la ntšogošo. ₃Lešilo, le mo le yago, ga le tsebe selo; mme batho bohle le re ke mašilo.

₄Ge pelo ya kgoši e ka go tsogela, o se tloge bodulong bja gago; go ikhomolela go alafa dibe tše dikgolo.

₅Go sa na le bobe bjo ke bo bonego fa tlase ga letšatši, ke bošaedi, ge bo hlaga go bagolo. ₆Bošilo bo dudišwa tletlolo le bagolo; bahumi ba dula kua tlase. ₇Ke bone balata ba nametše pitsi, bakgoma ba akga dinao wa bahlanka.

₈Moepamoreo, go tlo wela yena; kgatlollamorako o longwa ke noga. ₉Mokgolamaswika o kgatlwa ke ona; mophaphi o kutlega ka legong. ₁₀Wa rethefatša lepe wa lesa go lootša, se tlo go feletša maatla; bokaone go kgoneng bo tla ka bohlale. ₁₁Ge noga e ka loma e sešo ya upiwa, moupi ga sa kgona selo. ₁₂Mantšu a molomo wa mohlale a a tsefa; melomo ya lešilo e senya mong wa yona. ₁₃Le thomile ka tša bošilo, la fetša polelo ka bogafa bjo bošoro. ₁₄Lešilo le atiša dipolelo, mme motho a se tsebe se se tlogo dirwa.

Ke mang a kago mmotša se se tlogo dirwa ge a ile?

₁₅Modiro wa mašilo o wela beng ba wona, ka ge ba sa tsebe go tla motseng.

₁₆Joo naga! O bušwa ke ngwana; bakgoma ba nyanya e sa le ka moswana. ₁₇O wa lehlogonolo, naga! O bušwa ke morwa wa kgoši; bakgoma ba ja ka lebake; ke dinatla, ga se banwi.

₁₈Tlhaka e pobela ka bobodu, e netha ka botšwa bja matsogo.

₁₉Menyanya e dirwa gore go thabje; morara o thabiša ba phelago; mme lehumo le kgoniša tšohle.

₂₀Kgoši se e roge le pelong ya gago; le lehumagadi se le roge le ge o le mo phapošing ya go robala; gobane ntšu la gago le ka tloga le nonyana ya godimo, radiphofa a go bega.