MMOLEDI 1

₁Šedi dipolelo tša Mmoledi morwa wa Dafida kgoši ya Jerusalema.

₂Joo lefela la mafela! Joo lefela la mafela! Tšohle ke lefela! O realo Mmoledi. ₃Motho naa o holegang ka ditapišo tšohle, tše a itapišago ka tšona fa tlase ga letšatši. ₄Moloko ge o ile, go tla o mongwe; lefase lona le dula le le gona. ₅Letšatši le a hlaba, la ya la dikela, la boela felo ga lona, la hlaganela mo le tlogo hlaba gona. ₆Phefo e ya borwa, e tla boela leboa; e a ya, e a boa, e boela mo e tšwago -- ₇Tšohle dinoka di ya lewatleng, mme lewatle ga le tlale. Dinoka mo di yago, ke mo di tlogo fela di leba gona. ₈Dilo tšohle di a itapiša; motho o šitwa go di bolela. Leihlo ga le hore go di bona, le tsebe ga e tlale ka go di kwa. ₉Tše di kilego tša ba gona, di tlo buša di eba gona. Se se ilego sa direga se tlo buša se direga. Ga go na selo se sefsa, le setee, fa tlase ga letšatši. ₁₀Le ge go ka thwe: Bonang se sefsa sese! Se kile sa ba gona kgale, re sešo ra ba gona. ₁₁Tša bogologolo di hloka wa go di tseba; le tše di tlago di tlo ba tša hlkoka e a tlogo di gopola mo go bao ba mehla yeo e tlogo tla.

₁₂Nna Mmoledi ke be ke le kgoši ya Isiraeli motseng wa Jerusalema. ₁₃Ka neela pelo ya ka gore tšohle tše di diregago fa tlase ga legodimo ke di latišiše, ke di hlathe ka bohlale.

Ke wona modiro o mothata wo Modimo a o gafetšego bana ba batho gore ba itapiše ka wona. ₁₄Ke bone ditiro tše dirwago fa tlase ga letšatši. Gomme šedio! Ke lefela tšohle; ke go phuthela moya ka kobo. ₁₅Tše kgopo ga di lokišege; tše di sego gona ga di kgone go balwa.

₁₆Ka bolela le pelo ya ka ka re: Ke nna ke godišitšego bohlale, ka bo atiša go fetiša bohle ba kilego ba buša fa Jerusalema pele ga ka; mme pelo ya ka e bone tše ntši tša bohlale le tsebo. ₁₇Mme ya re ge ke neetše pelo ya ka go ka lemoga bohlale le tsebo, le botlatla le bošilo, ka hwetša le gona e le go phuthela phefo ka kobo. ₁₈Gobane mo bohlale bo atago, go ata le masetlapelo; e a kgobelago tsebo o kgobela le dipelaelo.