DOITERONOMIO 5

₁Gomme Moshe a bitša Baisiraele ka moka a bolela le bona a re: Isiraele, theetša melao le mekgwa ye nna ke e bolelago ditsebeng tša lena lehono; le ithuteng yona; le e hlokomeleng gore le dire ka mo e bolelago ka gona. ₂Morena Modimo wa lena o dirile kgwerano le rena kua thabeng ya Horebe. ₃Kgwerano yeo ga a ka a e dira le botatawešo; o e dirile le rena ba re sa lego gona lehono re sa phela ka moka ga rena. ₄Morena o boletše le lena difahlogo di lebane a le thabeng gare ga mollo. ₅Mohla woo nna ke be ke eme gare ga lena le Morena, gore ke le botše se Morena a se bolelago, ka gobane le be le boifa mollo, la se ke la rotogela thabeng.

Morena a re: ₆Ke nna Morena Modimo wa gago, e a go ntšhišego nageng ya Egipita ngwakong wa bohlanka.

₇Ke se ke ka bona o na le medimo e šele.

₈O se ke wa itirela modimo wa go betlwa, le ge e le seswantšho se sengwe sa tše di lego kua legodimong, le ge e le sa tše di lego mono lefaseng, le sa tše di lego meetseng ka tlase ga lefase. ₉O se ke wa di khunamela; o se ke wa di direla; ka gobane nna Morena Modimo wa gago ke Modimo yo bogale, e a latago bokgopo bja botatagobana go bana ba bona go fihla molokong wa boraro le wa bone mo go ba ba ntlhoilego. ₁₀Gomme ge e le ba ba nthatago, ba ba hlokomelago melao ya ka, ke ba dira ka botho go iša melokong e sekete.

₁₁O se ke wa bolela leina le Morena Modimo wa gago ka lefela, ka gobane e a bolelago leina la gagwe ka lefela Morena a ka se ke a mo lesa a sa otlwe.

₁₂O hlokomele letšatši la go khutša, o le kgethe, ka mokgwa wo Morena Modimo wa gago a go laetšego ka gona. ₁₃O sware mediro ka matšatši a selelago, o phethe mešomo ya gago ka moka. ₁₄Ge e le letšatši la go šupa ke la go khutša, ke la Morena Modimo wa gago. Ka lona o se ke wa swara modiro le o tee, le ge e ka ba wena, goba morwa wa gago, goba morwedi wa gago, goba molata wa gago wa monna le ge e le wa mosadi, le pholo ya gago, le diruiwa tša gago ka moka, le modiiledi e a lego dikgorong tša geno, gore molata wa gago wa monna le wa mosadi ba khutše bjalo ka wena. ₁₅O se lebale gobane o be o le mohlanka kua nageng ya Egipita; mme Morena Modimo wa gago a go ntšha ka seatla se maatla le ka letsogo le le emišitšwego. Ke ka baka leo Morena Modimo wa gago a go laetšego go hlokomela letšatši la go khutša.

₁₆Godiša tatago le mmago, bjalo ka ge Morena Modimo wa gago, a go laetše, gore o phele galelele, o be le mahlatse nageng ye Morena Modimo wa gago a go fago yona.

₁₇O se ke wa bolaya.

₁₈O se ke wa otswa.

₁₉O se ke wa utswa.

₂₀O se ke wa bolela bohlatse bja lefela go wa geno.

₂₁O se ke wa duma mosadi wa wa geno. O se ke wa kganyoga ngwako wa wa geno, le ge e le tšhemo ya gagwe, le ge e le molata wa gagwe wa monna goba wa mosadi, le ge e le pholo ya gagwe, le ge e le pokolo ya gagwe, le tšohle tše e lego tša wa geno.

₂₂Ke ona mantšu a Morena a a boletšego le phuthego a le thabeng gare ga mollo, le lerung, le bosong, ka lentšu le legolo, a se ke a eketša ka le lengwe; a a ngwala maatlapeng a mabedi a nneela.

₂₃Gomme lena, ge le ekwa lentšu le legolo le etšwa leswiswing, le bona thaba e tuka mollo, la tla go nna, balaodi ba meloko ya lena le bagolo ba lena, ₂₄la re: Morena Modimo wa rena bjale o re bontšhitše letago la gagwe le bogolo bja gagwe, a re kwiša lentšu la gagwe a le mollong; lehono ke gona ge re bone ge Modimo a bolela le motho mme motho a šala a phela. ₂₅Bjale gomme re sa hwelang, gobane mollo o mogolo woo o ka re fiša; ge rena re hlwa re ekwa lentšu la Morena Modimo wa rena, re ka hwa. ₂₆Ka gobane mo go batho ka moka ga go na motho e a kago phela a kwile lentšu la Modimo e a phelago le bolela le etšwa gare ga mollo, bjalo ka ge rena re le kwile. ₂₇A go batamele wena, o kwe tšohle tše Morena Modimo wa rena a di bolelago; gomme e be wena e a tlogo anegela rena tšohle tše Morena Modimo wa rena a go botšago tšona. Re tlo theetša, ra di dira.

₂₈Ya re ge Morena a ekwa le hlaboša mantšu la realo le bolela le nna, a nthera a re: Mantšu ao setšhaba se bego se go goeletša ona, ke a kwile; tšohle tše ba go boditšego tšona ke tše botse. ₂₉A dipelo tša bona e ka be e le tše bjalo ka mehla, ba mpoifa, ba hlokomela ditaelo tša ka ka moka; ke mo ba ka bego ba dula ba thabile, bona le bana ba bona neng le neng. ₃₀Bjale sepela o ba botše o re ba boele mešašeng ya bona. ₃₁Gomme wena o tlo šala fa o eme hleng ga ka, gore ke go botše ditaelo tša ka ka moka, le melao le mekgwa ye o tlogo ba ruta yona, gore ba dire ka yona kua nageng ye ke tlogo ba fa yona, ya ba ya bona.

₃₂Hlokomelang gee, gore le dire ka mo Morena Modimo wa lena a le laetšego ka gona, gomme le se ke la arogela go le letona le ge e le go la ntsogošo. ₃₃Tsela le sware yona yeò fela ye Morena Modimo wa lena a le laetšego yona; ke mo le tlogo phela, la ba le mahlatse; ke mo matšatši a lena a tlogo ba a mantši le dutše nageng ye le yago go e tšea.