Moshe o a laela; o boloka mangwalo a Molao
1Moshe a iša pele go bolela le Baisiraele ka moka; mantšu a gagwe šea: 2Nna lehono ke na le nywaga e lekgolo le masome a mabedi; ga ke sa kgona go tšwa le go tsena; le gona Morena o mpoditše a re: O ka se ke wa sela noka ye ya Jorodane. 3E a tlogo le eta pele ge le sela, ke Morena Modimo wa lena; o tlo fediša ditšhaba tšeo ge le fihla, mme le tlo di raka. Joshua ke yena e a tlogo le eta pele bjalo ka ge Morena a boletše. 4Morena o tlo ba dira se a se dirilego Sihoni le Ogo dikgoši tšela tša Baamoro le naga ya bona, bao a ba fedisitšego. 5Morena o tlo ba gafela lena, la ba dira tšohle tše ke le laetšego tšona. 6Tiišang, le dire senna; le se boife, le se ba tšhoge, gobane e a sepelago le lena ke yena Morena Modimo wa lena. A ka se ke a go lahletša, a ka se ke a go tlogela.
7Gomme Moshe a bitša Joshua, a bolela le yena, Baisiraele ka moka ba le ntshe, a re: Tiiša, o dire senna; ka gobane ke wena o tlogo goroša setšhaba nageng ye Morena a enetšego botatabo a re o tlo ba nea yona ya ba magae a bona. 8E a tlogo go eta pele ke yena Morena; o tlo ba le wena; a ka se ke a go lahletša; a ka se ke a go tlogela; o se boife, o se ke wa gakanega.
9Molao wo Moshe o o ngwadile, a o neela baperisita barwa ba Lefi, barwadi ba polokelo ya kgwerano ya Morena, le bagolo ka moka ba Baisiraele. 10Bona Moshe a ba laya a re: Ge go fela ngwaga wa go šupa, ka lebaka le le beilwego le ngwaga wa khunologo ka monyanya wa mešaša, 11ge Baisiraele ba tlile ka moka go bonala pele ga Morena Modimo wa bona, ba le felo fao a tlogo go kgetha, gona moo o balele Baisiraele ka moka molao wo, ba o kwe. 12O phuthele setšhaba mmogo, banna le basadi le bana, le ba ba diiletšego dikgorong tša geno, o ba balele ba kwe, ba ithute, gomme ba boife Morena Modimo wa lena, ba hlokomele se se bolelwago ke molao wo, ba dire ka wona. 13Le bana ba bona ba ba sešogo ba o tseba, ba o kwe, ba ithute go boifa Morena Modimo wa lena mehla ka moka ge le phela le le mo nageng ye le yago go e tšea ge le sela noka ya Jorodane.
14Morena a bolela le Moshe a re: Tseba gore tšatši la gago la go hwa le batametše. Bitša Joshua le tle le eme ngwakong wa Kgwerano, ke le laye. Gomme Moshe a ya a na le Joshua, ba ema ngwakong wa Kgwerano. 15Morena a bonala mo Ngwakong wa Kgwerano ka leru; leru le ema godimo ga mojako wa Ngwako wa Kgwerano.
16Morena a bolela le Moshe a re: Bjale o ya go robala le botatago; gomme setšhaba se se tlo tsoga sa dira bootswa sa latela medimo e šele ya naga ye se yago go tsena go yona; se tlo ntahla, se tlo senya kgwerano ya ka ye ke e dirilego le sona. 17Mohla woo bogale bja ka bo tlo ba tukela, ka ba lahla, ka ba utela sefahlogo sa ka. Ke mo se tlo go lewa sa tlelwa ke mabošula a mantši le ditlalelo tše ntši. Mohla woo ba tla re: Ge ke tlelwa ke mabošula a, a ga se ka gobane Modimo wa ka a se na le nna? 18Fela, nna mohla woo ke tlo ba utela sefahlogo sa ka ka baka la tše mpe tšohle tše ba di dirilego ba fapogetše go medimo e šele.
19Bjale ba ngwalele sefela se, o se rute Baisiraele, o se bee melomong ya bona gore sefela se e be hlatse ya Baisiraele. 20Ka gobane ke tlo ba goroša mo nageng ye ke e enetšego botatabo, naga e elago maswi le nose. Fela, e tlo re ba lle ba hoše ba nonne, ba tlo fapogela go medimo e šele, ba direla yona; nna ba tlo nnyatša ba senya kgwerano ya ka. 21Ge ba wetšwe ke bošula le ditlalelo tše ntši, sefela se se tlo ba eletša se le hlatse ya gore, seakanyo sa bona ke se tsebile ke sešo ka ba goroša nageng ye ke ennego ka baka la yona; ka gobane sefela se se tlo phela se le melomong ya bona.
22Moshe a napa a ngwala sefela seo mohla woo, a se ruta Baisiraele.
23A laela Joshua morwa wa Nuni a re: Tiiša, o dire senna; ka gobane ke wena o tlogo goroša Baisiraele mo nageng ye ke le enetšego yona; gomme nna ke tlo ba le wena.
24Moshe ge a feditše go ngwala mantšu a molao o mo pukung, a phethile go o ngwala, 25a laela Balefi barwadi ba polokelo ya Kgwerano ya Morena a re: 26Tšeang puku ye ya molao, le e bolokeng lehlakoreng la polokelo ya kgwerano ya Morena Modimo wa lena, e be hlatse ya lena e le gona moo. 27Ka gobane nna bonganga bja lena ke a bo tseba, le melala ya lena e methata. Hleng ešita le mehleng yeno ke sa phela le šetše le ngangane le Morena; go tlo ba bjang mehleng ke hwile? 28Bitšang bagolo ka moka ba meloko ya geno, le bahlapetši ba lena ba tle fa, ke bolele mantšu a ditsebeng tša bona, ke bee legodimo le lefase e be dihlatse tša ka. 29Ka gobane ke tseba gore ge ke hwile le ka se ke la lesa go senya. Le tlo aroga tseleng ye ke le laetšego yona; gomme le yo hlakana le mabošula mehleng e tlago, ka gobane le tlo senya pele ga Morena, le tlo mmefediša ka mediro ya diatla tša lena.
30Gomme Moshe a bolela mantšu a sefela seo pele ga phuthego ka moka ya Isiraele, a se fetša ba theeditše.
