Moshe o iša pele tša maeto; o ipolela molato
1Ra tšwa ra rotoga ka tsela ya Basani. Ogo kgoši ya Basani a tšwa a re šwahlela a na le madira a gagwe ka moka, ra gahlana Edirei. 2Morena a mpotša a re: Se mmoife. Ke mo gafetše diatleng tša gago, le setšhaba sa gagwe ka moka, le naga ya gagwe. Mo dire se o se dirilego Sihoni kgoši ya Baamoro e bego e dutše Hesiboni.
3Ke mo Morena Modimo wa rena a nago a gafela Ogo kgoši ya Basani diatleng tša rena, le setšhaba sa gagwe ka moka; ra se ke ra mo šiela lešaledi. 4Mehleng yeo ra hula metse ka moka ya gagwe, gwa se ke gwa šala motsana wo re sa kago ra ba amoga wona. E be e le metse e masome a selelago, le naga ka moka ya Arigobo, mmušo wa Ogo wa Basani. 5Metse yeo ka moka e be e le ya dibo, ya merako e megolo, ya dikgoro le mapheko, go sa balwe metse e mentšintši ye e bego e se na merako. 6Ra e dira digafiwamoka, ka mokgwa wo re o dirilego Sihoni kgoši ya Hesiboni. Metse yeo ka moka re e dirile digafiwamoka, banna le basadi le bana. 7Rena ra ithopela dikgomo ka moka le dithebola tša metse.
8Ka mokgwa woo magoši a mabedi ao a Baamori re a amogile naga mehleng yeo, naga ya mošono wa Jorodane, go tloga ka noka ya Arinoni go goma ka thaba ya Herimone. 9Basidoni thaba yeo ya Herimone ba re ke Sirione; Baamoro ba re ke Senire. 10Metse ka moka ya molaleng, le la Gileada ka moka, le la Basani ka moka, go fihla Salika le Edirei, e be e le metse ya mmušo wa Ogo kgoši ya Basani.
11Ge e le Ogo kgoši ya Basani e be e le yena lešaledi la ba megwanggwang a nnoši. Naa dilao tša gagwe ga se dilao tšela tša tshipi motseng wa Rabathe wa Baamoni? Botelele bja tšona ke meelo e senyane, bophara ke meelo e mene, ka tekanyo ya setšu sa monna.
12Ke yona naga ye re e tšerego mehleng yeo. Go tloga ka Aroere, ye e šikago le noka ya Arinoni, le thoko yeo ya dithaba tša Gileada le metse ya gona, ke yona ye ke e neetšego Barubeni le Bagada. 13Ye e šetšego ya Basani ka moka ya mmušo wa Ogo ke e neetše ba leloko la Manase, seripa sa leloko; ke naga ka moka ya Arigobo, le ya Basani ka moka; ke yona naga ye ba rego ke ya megwanggwang.
14Jairi morwa wa Manase o tšere naga ka moka ya Arigobo go fihla mellwaneng ya Bagesuri le ya Bamaakati; a e bitša ka leina la gagwe a re ke la Basani la metsana ya Jairi; le bjale e sa le leina la yona.
15Makiri ka mo neela la Gileada. 16Barubeni le Bagada ka ba neela naga e tlogago moo Gileada ya goma ka noka ya Arinoni, moela wa noka le naga e bataganego le yona, go fihla nageng ya Jakobo mellwaneng ya Baamoni. 17Le molala wa Jorodane le naga e bataganego le yona go tloga Genetsarete go fihla lewatleng la molala, la letswai; patoga ya thaba ya šala bohlabela.
18Mehleng yeo ka le laela ka re: Morena Modimo wa lena o le file naga yeo gore e be ya lena ba le itlhamago la eta bana babolena ba Baisiraele pele, ka moka ba le lego bahlabani. 19Ka re metseng ya lena ye ke le neilego yona go šale basadi le bana ba lena le dikgomo tša lena; ke tseba gobane le na le dikgomo tše ntši. 20Mohla Morena a tlogo ba a gorošitše le bana ba bolena, le bona ba dula nageng ye Morena Modimo wa lena a tlogo ba nea kua mošola wa Jorodane, e tlo ba mo le boelago bohle mo magaeng a lena a ke le filego ona.
21Mohla woo ke laetše Joshua ka re: Mahlo a gago a bone tšohle tše Morena Modimo wa lena a di dirilego magoši a mabedi a; ke tšona tše Morena a tlogo di dira mebušo yohle ye le tlogo fihla go yona kwa mošola. 22Le se ke la ba boifa; ka gobane le hlabanelwa ke yena Morena Modimo wa lena.
23Mehleng yeo nkile ka kgopela kgaugelo go Morena ka re: 24Mong wa ka Morena! Nna mohlanka wa gago, go fihla bjalo o mpontšhitše bogolo bja gago le seatla sa gago se matla. O Modimo yo go sego e mongwe magodimong le lefaseng e a kago dira mediro e etšago ya gago, a dira tše maatla bjalo ka wena. 25Ntese ke sele ke yo bona naga e botse ya mošola wa Jorodane, dithaba tše botse tšela tša Libanoni.
26Fela, Morena ga a ka a ntumelela, ka ge a mpefeletšwe ka baka la lena, a fetola a re: Di go lekane; o se ke wa buša o bolela, le nna taba yeo. 27Rotogela ntlheng ya thaba ya Pisiga, o iše mahlo bodikela, le leboa, le borwa, le bohlabela, o e bone ka mahlo a gago; ka gobane noka ye ya Jorodane o ka se ke wa e sela. 28Laya Joshua o mo fe maatla ka gobane e a tlogo sela a etile setšhaba pele ke yena; ke yena e a tlogo se goroša nageng ye o tlogo e bona.
29Ke moka ra dula molapong mo re lebanego le Bethe-Peoro.
