Maswika a kgopotšo. Barogwa
1Moshe, a na le bagolo ba Isiraele, o laetše setšhaba a re: Le hlokomele ditaelo ka moka tše ke le laelago tšona lehono. 2Mohla le tlogo sela noka ya Jorodane la fihla mo nageng yeo Morena Modimo wa lena a le fago yona, le tseme maswika a magolo, le a tlotše ka phepa. 3Mo go ona le ngwale mantšu ka moka a molao wo, le kgone go tsena mo nageng yeo Morena Modimo wa lena a le fago yona, e lego naga e elago maswi le nose, bjalo ka ge Morena Modimo wa lena a le boditše. 4Ge le setše noka ya Jorodane le emiše maswika ao thabeng ya Ebala, bjalo ka ge ke le laela lehono: Le a tlotše ka phepa. 5Morena Modimo wa lena le mo agele aletare ntshe; e be aletare ya matlapa; mme le se ke la a betla ka tshipi. 6Le age aletare ya Morena Modimo wa lena ka matlapa a kgoretšego; mo go yona le tlišetše Morena Modimo wa lena dihlabelo. 7Le mo tlišetše le dileboga, gomme le je le thabe gona fao pele ga Morena Modimo wa lena. 8Mantšu ka moka a molao wo le a ngwale matlapeng ao, le a tloke gabotse.
9Moshe le baperisita le Balefi ba bolela le Baisiraele ka moka, ba re: Baisiraele, hlwayang ditsebe le kwe! Lehono le le bile setšhaba sa Morena Modimo wa lena. 10Theetšang ge se Morena Modimo wa lena a se bolelago, le dire ka ditaelo tša gagwe le ka melao ya gagwe ye ke le laelago yona lehono.
11Mohla woo Moshe a laela setšhaba a re: 12Ge le setše noka ya Jorodane, ba ba tlogo ema thabeng ya Garisima ba šegofatša setšhaba, ke ba leloko la Simeone, le la Lefi, le la Juda le la Isashara, le la Josefa, le la Benyamini. 13Ba ba tlogo ema thabeng ya Ebala ba bolela dithogo ke ba leloko la Rubeni, le la Gada, le la Asere, le la Sebulone, le la Dani, le la Nafutali. 14Balefi ba tlo thoma go bolela le banna ba Isiraele, ba hlaboša mantšu ba re:
15Morogwa ke e a betlago goba a bopa modimo wa seswantšho, e lego makgapha go Morena, e lego modiro wa diatla tša mmetli, mme a se bea a se uta! Setšhaba ka moka se fetole se re: A go be bjalo!
16Morogwa ke e a nyatšago tatagwe le mmagwe! Setšhaba ka moka se tle se re: A go be bjalo!
17Morogwa ke e a šuthišago mollwane wa wa gabo.
Setšhaba ka moka se tle se re: A go be bjalo!
18Morogwa ke e a arošago sefofu tseleng!
Setšhaba ka moka se tle se re: A go be bjalo.
19Morogwa ke e a kgopamišago taba ya moeng, le ya sešuana le ya mosadi wa mohlologadi!
Setšhaba ka moka se tle se re: A go be bjalo!
20Morogwa ke e a robalago le mosadi, wa tatagwe, gobane o phamola kobo ya tatagwe!
Setšhaba ka moka se tle se re: A go be bjalo!
21Morogwa ke e a robalago le, phoofolo efe le efe!
Setšhaba ka moka se tle se re: A go be bjalo!
22Morogwa ke e a robalago le kgaetšedi ya gagwe, e lego morwedi wa tatagwe le ge e le morwedi wa mmagwe!
Setšhaba ka moka se tle se re: A go be bjalo!
23Morogwa ke e a robalago le mogwegadi wa gagwe!
Setšhaba ka moka se tle se re: A go be bjalo!
24Morogwa ke e a lalelago wa gabo a mmolaya!
Setšhaba ka moka se tle se re: A go be bjalo!
25Morogwa ke e a amogelago tsogolekobong, a bolaiša motho e a se nago molato!
Setšhaba ka moka se tle se re: A go be bjalo!
26Morogwa ke e a sa tiišego go dira se se boletšwego ke molao wo!
Setšhaba ka moka se tle se re: A go be bjalo!
