DOITERONOMIO 19

₁E re ge Morena Modimo wa gago a fedišitše ditšhaba tše a go fago naga ya tšona, wa e tšea wa dula metseng ya tšona le mo nywakong ya tšona, ₂gona o itlhaolele metse e meraro e lego mo gare nageng yeo Morena Modimo wa gago a go fago yona ya ba ya gago. ₃O itirele ditsela, gomme naga ye Morena Modimo wa gago a go fago yona ya ba legae la gago, o e arole diripa tše tharo; e be gore e a bolailego motho a be le mo a kago tšhabela gona. ₄Melao ye e lebanego mmolai e a tlogo tšhabela gona, a phela, še: E a bolaile go wa gabo a sa kago a dira ka boomo, a sa ka a mo hloya maabane le maloba, ₅yo a rego ge a ile sethokgweng go rema dihlare a na le wa gabo, a re go akga mabogo a swere selepe a rema, selepe sa khwamoga sa rema wa gabo a hwa, motho eo a tšhabela go o mongwe wa metse yeo a phele; ₆gore molefetšamadi a se mo hlomarele pelo ya gagwe e sa tuka bogale, gomme a mo swara ka ge tsela e le e telele, a mmolaya, mola a sa swanelwa ke lehu, ka gobane a sa ka a hloya wa gabo maabane le maloba. ₇Ke ka baka leo ke go laelago gore o itlhaolele metse e meraro.

₈Gomme ge Morena Modimo wa gago a tlo ba a katološitše mellwane ya gago bjalo ka ge a enetše botatago, mme a go nea naga ka moka ye a boditšego botatago a re o tlo ba nea yona. ₉A dira bjalo ge o hlokomela ditaelo ka moka tše ke go laelago tšona lehono, ge o dira ka tšona, ge o rata Morena Modimo wa gago, wa swara ditsela tša gagwe, -- gona o hlaole metse e mengwe e meraro gape. ₁₀Gore mo nageng ya geno ye Morena Modimo wa gago a go fago yona ya ba magae a gago, go se tšhollwe madi go se molato wa madi.

₁₁Fela, ge motho a hloile wa gabo, a mo lalela, a mmolaya a hwa, motho e mobjalo ge a ka tšhabela go o mongwe wa metse yeo, ₁₂gona bagolo ba motse wa gabo ba rome motho a mo tšee, gore ba mo gafele seatleng sa molefetšamadi, mme a bolawe. ₁₃Leihlo la gago le se ke la mo hlomogela; madi a e a se nago molato o a tloše mo go Isiraele, gore o be le mahlatse.

₁₄O se ke wa šuthiša mollwane wa wa geno wo o beilwego ke ba bogologolo mo nageng ya geno, ye le tlogo dula go yona lefaseng le Morena Modimo wa lena a le fago lona gore e be la lena.

₁₅Ge go sekišwa motho ka baka la molato goba sebe, go se ke gwa ema hlatse e tee fela ya mmega ka sebe sa gore le sa gore. Taba a e eme ka melomo ya dihlatse tše pedi le ge e le tše tharo. ₁₆Ge go ka tsoga hlatse ya leswenya ya bega motho, ₁₇gona banna ba babedi bao ba ba sekišanago ba tle ba eme pele ga Morena, le pele ga baperisita, le pele ga baahlodi ba mohla woo. ₁₈Baahlodi ba nyakišiše gabotse; gomme ge ba ka hwetša hlatse eo e le hlatse ya maaka, e begile ngwanabo ka maaka, ₁₉gona le mo dire se a gopotšego gore se dirwe ngwanabo. Le tloše sebe ga geno. ₂₀Ba bangwe ba tlo di kwa, ba boifa, gwa se ke gwa boeletšwa taba e mpe ya mohuta woo ga geno. ₂₁Leihlo la gago le se ke la mo hlomogela; bophelo bo lefše ka bophelo, leihlo ka leihlo, leino ka leino, seatla ka seatla, leoto ka leoto.