DANIELE 11

₁Ge e le nna, ka ngwaga wa pele wa Dario wa Meda, ke tsogile ka ema le yena, ka mo tlatša, ka mo fa maatla. ₂Bjale ke tlo go anegela se e lego therešo:

Tseba gore go sa tlo tsoga dikgoši tše tharo tša Peresia. Ya bone e tlo phala tšela tše dingwe ka moka ka mahumo. E tlo re ge e tiile mahumong a yona, ya rapa bohle ya yo lwa le mmušo wa Bagerika.

₃Gwa tlo tsoga kgoši e bogale, e tlogo buša ka maatla, ya dira se e se ratago. ₄Gomme e tlo re e sa re: Ke eme, ke mo mmušo wa yona o tlogo thubega, wa kgaogana wa ya thoko tše nne tša legodimo. Go ka se ke gwa šala mmušo wo e lego wa bana ba yona, le ge e le wa maatla a a lekanago le a mmušo wa yona; gobane wona o tlo fedišwa, wa abelwa ba šele, ba e sego bana ba yona.

₅Kgoši ya thoko ya borwa e tlo tia maatla; e mongwe wa balaodi ba yona o tlo e phala ka maatla, a buša; mme bogoši bja gagwe e tlo ba bjo bogolo. ₆Ge go fetile nywaga, ba tlo gwerana. Morwedi wa kgoši ya borwa o tlo tla go kgoši ya leboa, ba dira kwano. Fela, letsogo la gagwe le ka se ke la tia, a ka se iše kgole. O tlo lahlwa gotee le bao ba mo tlišitšego, le motswadi wa gagwe, le yena yo a tlogo ba a mmotile mehleng yeo. ₇Ge e le e mongwe wa moloko wa gagwe o tlo tšwelela a ema legatong la gagwe, a tšwa dira, a thuba sebo sa kgoši ya leboa, a kgona, a fenya. ₈O tlo thopa le medimo ya bona, le diswantšho tša bona, le dibja tše bohlokwa, le silifera, le gauta, a di iša Egipita; gwa tlo feta nywaga a sa hlwe a tšwela kgoši ya leboa dira. ₉Yona kgoši ya leboa e tlo šwahlela mmušo wa borwa; fela, e tlo boela nageng ya gabo.

₁₀Barwa ba yona, bona ba tlo lwa seng sa bona, ba epa dira tše kgolo; tšona di tlo gogola naga wa mafula; di tlo tšwa, tša boa, tša rapa, tša fihla sebong sa gagwe. ₁₁Gomme kgoši ya borwa e tlo galefa, ya tšwela kgoši ya leboa dira; le yona e tlo epa dira tše kgolo; fela, dira tšeo di tlo fenywa. ₁₂E tlo re ge a fentše dira tšeo, pelo ya gagwe ya ikgogomoša; mme a ka se ke a atlega le ge a fedišitše ba diketekete;

₁₃Gobane kgoši ya leboa e tlo boela e epa dira tše kgolo tše di fetišago tšela tša pele. Gomme ge go fetile mabaka a nywaga, o tlo tla ka dira tše kgolo le marumo a mantši. ₁₄Mehleng yeo kgoši ya leboa e tlo dikwa ke ba bantši; le baferekanyi ba setšhaba sa geno, ba ba rego go phethege pono, ba tlo godišwa; fela, ba tlo wa. ₁₅Kgoši ya leboa e tlo tla ya epa mangope, gore e thope motse wa dibo, mme matsogo a ba borwa a ka se ke a kgona selo, le masogana a bagale a ka se ke a ema. ₁₆E a ba tšwetšego dira, o tlo dira se a se ratago, a ka se ke a šiteletšwa ke motho. O tlo ema le mo nageng e rategago e le wa seatla sa go šwalalanya.

₁₇O tlo phegelela go ka tšea mmušo ka moka, a dira kwano ka go ntšha morwedi wa gagwe, e le gore a senye yola; fela, di ka se mo letlegele. ₁₈Ke mo a tlogo lebišetša sefahlogo dihlakehlakeng, a thopa tše ntši; fela, go tlo tla molaodi wa dira e a tlogo kgaotša lenyatšo la gagwe, a mo lahliša dikwero. ₁₉Ke mo a tlogo lebišetša sefahlogo dibong tša naga ya gagwe; ya tlo ba gona a tlogo kgopša gona a wa, a se hlwe a hwetšwa a le gona.

₂₀E a tlogo tsoga legatong la gagwe e tlo ba Montšhišamakgetho Mokgantšhabogoši; yena yo o tlo senywa ge go fetile matšatši a sego makae, e sego ka bogale le ka ntwa.

₂₁Legatong la gagwe go tlo tsoga e mongwe wa go se tsebalege, wa go hloka bokwala bja bogoši, le ge go le bjalo o tlo tla ka sephu a tšea bogoši ka maano. ₂₂Madira a kago mafula a meetse a tlo gogolwa ge a fihla, mme mmuši wa go lekana nae o tlo pšhatlwa. ₂₃E tlo re a sa tšo kwana nae, a mo logela maanomabe, a mo tšwela dira, a mo fenya ka dira tše di sego kae. ₂₄Dinageng tše di nonnego o tlo tsena ka sephu, o tlo dira tše botatagwe le borakgolo ba sešogo ba di dira. O tlo abaganya dithebola le dithoto; o tlo loga maano a go thuba dibo; fela a ka se iše kgole.

₂₅O tlo rapa a re ke lwe le kgoši ya borwa ka dira tše ntši. Fela, kgoši ya borwa a tlo epa dira tše ntšintši tše maatla. Fela, e ka se eme, gobane ba tlo ba ba e lakane. ₂₆E tlo senywa ke ba ba llego dijo le yona; madira a yona a tlo gogolwa, gwa bolawa ba bantši. ₂₇Magoši a mabedi ao a tlo eleletša go senyana, a forana le ge a dutše mmogo dijong; fela, maano a ona a tlo pala, ka gobane a tlo ba a beetšwe letšatši la ona. ₂₈E tlo boela ga gayo e na le thoto tše ntši; mme pelo ya yona e tlo lwa le kgwerano e kgethwa, ya dira ka mokgwa o bjalo, ya tsebo boela nageng ya gayo.

₂₉Ka lebaka la gona e tlo buša e boela nageng ya borwa; fela bjale go ka se hlwe go etša mola pele. ₃₀E tlo thibelwa ke maselawatle a Khithima, ya tlo fela maatla ya goma.

-- Ke mo e tlogo tla ya feletša sehlogo sa yona go kgweranokgethwa; ya dira ka mokgwa o bjalo, gobane go gomeng ga yona e tlo kwana le ba ba hlanogetšego kgweranokgethwa. ₃₁Madira a a romiwago ke yona a tlo goboša Sekgethwa, sona sebo; a tlo kgaotša sedimo sa ka mehla sa moo, a bea makgapha a tšhwalano gona. ₃₂Ba go senya kgwerano, e tlo ba hlanoša ka maano; fela, ba mohuta wa bao ba tsebago Modimo wa bona, ba tlo tia maatla ba kgona. ₃₃Ba bohlale ba setšhaba ba tlo ruta ba bantši; fela, go tlo feta matšatši e le ba go bolawa ka lerumo le ka mollo, le ka go thopiwa, le ka go hlakolwa. ₃₄Ge ba tlo šiteletšwa, ba tlo fela ba bona thušo ka tše nyenyane; gomme ba bantši ba tlo itsenya mo go bona ka bomenetša. ₃₅Ba bangwe ba bahlalefi ba tlo wa, e le gore ba etše tshipi meubeng ge e tološwa, ba tšwe tšhila ba tage, go be go tle lebaka la bofelo; gobane lebaka la bjona le etla.

₃₆Gomme kgoši eo e tlo dira ka mo e ratago; e tlo ikgodiša, ya itira e mogolo wa go feta le medimo yohle; e tlo bolela tša go kgobotla Modimo wa medimo e sa fela e letlega, gwa tlo ba gwa phethega lebaka la kgalefo; ka gobane tše di rerilwego di tlo phethega. ₃₇E tlo nyatša le medimo ya botatagoyona, le medimo ya basadi ba yona, le ge e le modimo o mongwe; gobane e tlo itira e mogolo e a phalago bohle. ₃₈Bakeng sa medimo yeo o tlo godiša modimo wa dibo, wo botatayo ba bego ba sa o tsebe; e tlo o godiša ka gauta le ka silifera, le ka ditalama, le ka tša bohlokwa. ₃₉E tlo kgatla dibo tša yona ka wona modimo woo o šele; ba e ba hlaolago e tlo ba godiša, ya ba dira ba go buša ba bantši, ya ba abela naga ya ba moputso.

₄₀Lebakeng la bofelo kgoši ya borwa e tlo thulana le yona; kgoši ya leboa ya tlo e kutulogela boka sesedi ka makoloi le ka banamedi le ka maselawatle a mantši, ya tlo hlagela dinaga boka mafula a meetse ya di ribegetša. ₄₁E tlo tla le nageng e rategago, dinaga tše ntši tša tlo phekgolwa; ba ba tlogo phonyokga diatleng tša yona ke Baedomo le Bamoaba le mmuši wa Baamoni. ₄₂Dinaga tše dingwe e tlo di akgela letsogo. Le ya Egipita e ka se ke ya phonyokga. ₄₃E tlo buša mahumo a gauta le a silifera, le tša bohlokwa ka moka tša Egipita; le Balibia le Bakuše ba tlo e latela. ₄₄Fela e tlo tšhošwa ke mataba a a tšwago bohlabela le leboa, ya tlo tšwa dira wa sehlogo ya šwalalanya ba bantši ya ba fediša. ₄₅Mešaša ya yona bogoši e tlo e hloma makgatheng a lewatle le thaba e kgethwa; ke mo e tlo tlelwa ke tše di tlogo e fediša, ya hloka monamoledi.