AMOSI 9

₁Ka bona Morena a eme aletareng a re: Tia hlogo ya kokwane, go šišinyege dijakwana, di robaganele godimo ga dihlogo tša bona ka moka; ba ba tlogo šala ke ba fetše ka lerumo, go se tšhabe le o tee, go se be le a phonyokgago. ₂Le ge ba ka theogela kua bodulabahu, le gona kua atla sa ka se tlo ya sa ba ntšha gona. Le ge ba ka rotogela kua legodimong, ke tlo ba fološa. ₃Le ge ba ka utama thabeng ya Karamele, ke tlo e fenyeka ka ba swara moo; le ge ba ka re ba efoga mahlo a ka ba sobeletše fase mawatleng, ke tlo roma noga ya ba loma gona. ₄Le ge ba ka ya bothopša ba gapiwa ke manaba, le gona kua ke tlo roma rumo la ba fetša. Mahlo a ka a tlo dula a ba etše hloko, gore ke ba šulafatše, e sego go ba setša. ₅Gobane Mong a bohle Morena wa mašaba ke yena yo e rego ge a kgwatha naga, e nape e tologe, gwa hlokofala bohle ba ba agilego mo go yona, ge e tlala boka noka thoko tšohle, e boele e kgwehle boka noka ya Egipita. ₆Ngwako wa gagwe wa tletlolo o o agile kua legodimong, leratadima lagwe a le thekga ka lefase, yena Mmitšameetsealewatle a nošetša naga ka ona; ina la yena yo ke Jehofa.

₇Lena Baisiraele, ge ke le bona, le bjalo ka Bakushe. -- O realo Morena. -- A ga nka ka ntšha Isiraele nageng ya Egipita? Mme Bafilisita ke ba ntšhitše Kafutori; Baarama ke ba ntšhitše Kiri. ₈Tsebang gobane mahlo a Morena Mong a bohle a bona mmušo ge o dira dibe, gore ke o fediše lefaseng. Ge e le moloko wa Jakobo nka se o fedišetše ruri.

₉Le tsebe gore ke laetše, gore mo go baditšhaba ka moka ba moloko wa Isiraele ba feferwe, bjalo ka mabele ge a feferwa ka leselo, thoro go se wele fase le e tee. ₁₀Badiradibe bohle ba setšhaba sa ka ba tlo hwa ka lerumo; ke bona bao ba ba rego: Rena re ka se tlelwe ke dikotsi; di ka se lebane le rena.

₁₁Mehleng yeo ke tlo tsoša mokutwana wa Dafida o wilego; dithubu tša wona ke tlo di thiba; mo go rutlologilego ke tlo buša ka o tsošološa, ka o aga bjalo ka mohlamonene. ₁₂Gore mašalela a batho a tle a nnyake, le bantle bohle bao leina la ka le tlogo goelelwa mo go bona. -- O realo Morena. O tlo di dira. ₁₃Le tsebe gore go tlo tla matšatši, -- o realo Morena, -- ao molemi a tlogo gahlana le mmuni, e a fotlago morara o tlo gahlana le mogašapeu; gomme dithaba di tlo tloroma mananose a morara, meboto yohle ya ba le monola. ₁₄Mathopša a setšhaba sa ka sa Isiraele ke tlo a goroša; ba tlo tla ba tsoša marope ba dula; ba tlo tla ba šema merara, ba nwa mananose a yona; ba tlo tla ba lema mašemo, ba ja dienywa tša ona. ₁₅Mme bona, mo nageng ya gabo ke tlo napa ke ba hloma, ba se sa tlo tomolwa gona fa nageng ya gabo ye ba e neilwego ke nna. -- O realo Morena Modimo wa gago.