AMOSI 3

₁Kwang lentšu la Morena le a le boletšego a era bolena, Baisiraele, lena moloko ka moka wo ke o ntšhitšego Egipita, ka re: ₂Mo go meloko ya lefase ke tsebile lena fela: ke ka baka leo ge ke le sekiša melato ya lena ka moka.

₃A babedi ba ka swara tsela e tee ba sa ka ba kwana?

₄A tau e ka bopa mo sekgweng e sa bolaya selo?

A tawana e ka rora segoleng e sa ka ya swara selo?

₅Afa nonyana e ka tanywa, molaba o sa rewa?

Le molaba a o ka refoga wa se tanye selo?

₆Afa phalafala e ka letšwa mo motseng, batho ba se tšhoge?

A kotsi e ka wela motše, Morena a sa dire selo?

₇Gobane Morena Mong a bohle a ka se ke a dira selo, baboni bahlanka ba gagwe a sešo a ba botša thopa yagwe.

₈Tau ya bopa, go ka se tšhoge mang?

Morena Mong a bohle a bolela, a moporofeta a ka lesa go bolela?

₉Goelelang nywakong ya Asidodo ya mošate, le kua Egipita nywakong ya mošate, le re: Bokanang thabeng tša Samaria, le bone mpherefere wo o befilego moo, le masetlapelo a a lego moo.

₁₀Ga ba tsebe go dira tše bolo. -- O realo Morena. -- Nywakong ya bona ya mošate ba kgobetše thoto ya bohodu le tlhakolo. ₁₁Ke wona molato woo ge Morena Mong a bohle a bolela a re: Lenaba šeleo thoko tšohle tša naga; le tlo thuba dibo tšago, la thopa tša nywakong ya gago ya mošate.

₁₂Morena o re: Boka modiša ge a phonyokga a swere matshwatau, dihlako tše pedi, le ge e le ntlha ya tsebe, le Baisiraele ba Samaria ba tlo phonyokga ba swere mosamelwana wa malao le lešelana le boleta fela. ₁₃Theetšang! Mme le di botše ba moloko wa Jakobo! -- O realo Morena Mong a bohle Modimo wa mašaba. ₁₄Ka kgonthe, mohla ke tlogo otla Isiraele ka baka la karogo tša bona, ke tlo otla aletare ya Bethele, gwa tlo kgolwa dinaka tša yona tša wela fase. ₁₅Ke tlo phušolanya nywako ya marega le ya lehlabula, le nywako ya naka la tlou e tlo senyakwa, le nywako e megolo e tlo thunthwa. -- O realo Morena.