AMOSI 2

₁Morena o boletše a re: Nka se ke ka lesa go otla ba Moaba ka baka la masenyi a mararo le ge e le a mane, ka ge ba fiša mašapo a kgoši ya Edomo ba a dira molora. ₂Gona kua Moaba ke tlo iša mollo wo o tlogo tšhuma nywako ya mošate wa Kiryothe; ba Moaba ba tlo fela mohla wa magoa le mekgoši, wa meletšo ya diphalafala. ₃Mmuši wa bona ke tlo mo fediša, le bakgoma bohle ba bona ke tlo ba bolaya -- O realo Morena.

₄Morena o boletše a re: Nka se ke ka lesa go otla Bajuda, ka ge ba hlala molao wa Morena, ba sa lotole taelo tša gagwe, ba timela ba ile le maaka a bona, a botatabo ba bego ba latela ona. ₅Kua Juda ke tlo iša mollo wo o tlogo tšhuma nywako ya mošate wa Jerusalema.

₆Morena o boletše a re: Nka se ke ka lesa go otla Isiraele, ka ge ba rekiša motho yo bolo ka ditšhelete, mmotlana ba reka dieta ka yena. ₇Ke bona ba rego hlogo ya sešuana a e tšhelwe mmu, ba thatafatša tsela ya bahloki, monna a ya go seotswa a na le tatagwe, ba goboša ina la ka le lekgethwa. ₈Mo ba hwetšago go le aletare ba patlama ba apere kobo tša tshwarelelo, ba nwa sedila sa tefo ba le mo nywakong ya medimo ya bona.

₉Hleng Baamoro, mola ba fihla, ke ba fedišitše, bona bala ba botelele bja merokwana, ba bothata bja motholo, ka senya dikenyo tša bona godimo, le medu ya bona ka fase. ₁₀Ke nna ke le ntšhitšego Egipita, ka le sepediša mašokeng nywaga e masomemane, e le gore le tšee naga ya Baamoro e be magae a lena. ₁₁Mo go bana ba lena ka fela ke tsoša ba bangwe ba baporofeta, mo go masogana ka ntšha ba bakgethwa. Lena Baisiraele! A ga go bjalo? -- O realo Morena. ₁₂Mme lena, bakgethiwa ba ka la ba noša bjalwa, la iletša baporofeta go ka porofeta. ₁₃Ka kgonthe, bogato bja maoto a lena ke tlo bo šišinya bjalo ka koloi e rwelego dingatana ge e šišinyega. ₁₄Wa lebelo o tlo palelwa ke go tšhaba, wa maatla a šitwa go ema ka maatla a gagwe, le wa seoka a se phonyokge a phela. ₁₅Le moswarabora a ka se ke a ema, le wa dinao tša go nakoga a se phologe; le banamedi ba dipitsi ba ka se phonyokge ba phela. ₁₆Le wa pelo e bogale gara banna, mohla woo o tlo tšhaba a hlobotše. -- O realo Morena.