Tša Melite. Paulo o fihla Roma
1Ge re šetše re phologile, ya ba gona re kwago ge ba re sehlakehlake seo ke sa Melite. 2Batho ba gona, ba mohuta o šele, ba re dira ka botho bjo bo fetišago; ba re kgitleletše mollo o mogolo, ba re iša malapeng a bona, gobane go be go ena pula go le maruru. 3Paulo ge a re ke ola mathokgwa, gore a a akgele mollong, noga ya tšwa ka go kwa mollo, ya mo loma seatla ya gomarela. 4Batho ba gona, ge ba bona selo seo se lekeletše seatleng sa gagwe, ba bolela seng sa bona ba re: Motho e, se a lego sona, ke mmolai; ge a sa tšo phologa lewatleng, bogale bja medimo bo se mo gomele. 5Paulo, noga yeo a e hlohlorela mollong, a se ne bohloko bjo a bo kwago. 6Bona ba be ba lebeletše, gore o tlo tloga a ruruga a wela fase a hwa. Bjale, e šetše e le lebaka ba mo lebeletše, ba bona go se bošula bjo bo mo tlelago, ba phekgoga ba re ke modimo.
7Kgauswi le felo fao go be go le mašemo a mokgoma wa sehlakehlake seo; leina la gagwe e be e le Pubulio. Yena a re dira baeng ba gagwe matšatši a mararo. 8Ra hwetša tatago Pubulio a le dilaong a babja ke letadi le teng e khubedu. Paulo a ya go yena, a rapela a mmea diatla, a mo fodiša. 9Gwa napa gwa tla le ba bangwe ba sehlakehlake seo; ba tla ba swerwe ke malwetši; Paulo a ba fodiša. 10Ba tloga ba re godiša ka mekgwa e mentši. Mohla re sepelago ba re thothela mefago.
11Ge go fetile dikgwedi tše tharo, ra namela leselawatle la Alesandria, le le bego le dutše marega sehlakehlakeng seo. Sefoka sa lona e be e le Barwa ba Jupitere. 12Ra tla motseng wa Sirakusa; ra dula matšatši a mararo. 13Ra tloga moo ra šika le naga, ra tla motseng wa Regio. Ka la ka moswana gwa tsoga phefo ya borwa, ra sepela matšatši a mabedi ra fihla Puteoli. 14Moo ra hwetša badumedi; ba re kgopela ra dula le bona matšatši a šupago; ya ba gona re yago Roma. 15Badumedi ba gona ge ba re kwa, ba tšwa ba re gahlanetša re sa tla Apiforo le Teretaberene. Paulo ge a ba bona, a leboga Modimo a tia kholofelo.
16Ge re fihlile Roma, tona ya iša bagolegwa go molaodi e mogolo wa madira. Ge e le Paulo a dumelelwa go dula ga gagwe, a na le mohlapetši wa gagwe wa mohlabani.
17Ge go fetile matšatši a mararo, Paulo a bitša bagolo ba Bajuda. Ba phuthega, a bolela le bona a re: Banna ba gešo! Ga ke na mo ke senyetšego setšhaba sa gešo le Molao wa botatawešo; le ge go le bjalo ke tšwa Jerusalema ke le mogolegwa ke gafetšwe matsogong a Baroma. 18Bona ba ntshekišitše, ba rata go nkhunolla ka gore ga ke na molato o swanelago polao. 19Bajuda ba ganetša; ya ba go nkgapeletša go re: Nna ke sekišwa ke Kesara, e se go re ke na le taba ya go bega setšhaba sa gešo. 20Taba ke yona yeo ye ke le biditšego ka baka la yona, gore ke le bone, ke bolele le lena; ka gobane se se mpofišitšego ke yona kholofelo ya Isiraele.
21Bona ba fetola ba re: Rena ga re ešo ra amogela mangwalo a tšwago Juda a go bolela tša gago; le gona ga go ešo gwa tla e mongwe wa ba gešo a re tsebiša, a go bolela ka taba e mpe. 22Go rata gore re kwe se wena o se bolelago; gobane thuto yeo re tseba gore e ganetšwa mo go fela.
23Ba mmeela letšatši; ba tla ntlong ya baeng e le ba bantšinyana. Paulo a bea bohlatse, a ba hlathollela tša mmušo wa Modimo, a rata go ba kgodiša ka ditaba tša Jesu, a di ntšha Molaong wa Moshe le go Baporofeta; a thoma e sa le bosasa, la ba le dikela. 24Ba bangwe ba bona ba dumela tše a di boletšego; ba bangwe ba se dumele. 25Ge ba šetše ba tšere kgang seng sa bona, ba tloga Paulo a ba boditše a re: Moyamokgethwa o boletše ka Jesaya moporofeta a era botatawešo a re: 26Sepela, o bolele le setšhaba se, o re: Go kwa le tlo kwa, mme le ka se hlaologanye; go bona le tlo bona, mme le ka se lemoge. 27Gobane pelo tša setšhaba se di retetše; tsebe tša bona di thibetše; ba pontše mahlo gore ba se bone ka mahlo a bona, ba se kwe ka ditsebe, ba se hlaologanye ka dipelo, ba se sokologe; mme nna ke sa ba fodiše.
28Tsebang gee, gobane taba ye ya go phološwa ke Modimo e rometšwe bantle. Bona ba tlo kwa. 29Ge a itšalo, Bajuda ba tloga ba na le kgang e kgolo seng sa bona.
30Paulo a fetša nywaga e mebedi a dutše ngwakong wa gagwe wo a o adimilego, a amogela bohle ba ba tlago go yena. 31A kwatša tša mmušo wa Modimo, a ruta tša Morena Jesu Kriste ka mafolofolo a magolo, a sa iletšwe ke motho.
