Paulo o ipolelela pele ga kgoši Agaripa
1Agaripa, a era Paulo, a re: O dumeletšwe go ipolelela. Paulo a emiša letsogo, a ipolelela a re:
2Kgoši Agaripa! Ke hwetša ke le wa mahlatse, ge lehono ke tlo ipolelela pele ga gago ka ditaba tšohle tše Bajuda ba mpegago ka tšona. 3Ka gobane o matsebetsebe wa mekgwa ka moka ya Bajuda le dikgang tša bona. Ke gona ke go rapela gohle, se mphelele pelo o kwe se ke se bolelago.
4Tša bophelo bja ka go tloga bofseng, tše ke di dirilego ke na nabo kua Jerusalema, Bajuda ka moka ba a di tseba. 5Ke bona ba ntsebago go tloga setlogong, ke le wa thuto ya bafarisei ba e lego bona balotodi ba Molao tumelong ya rena; ke bona ba kago kgona go ntlhatsela, ge ba ka be ba rata. 6Bjale ge ke eme fa, ke sekišwa molato e le ge ke holofetše tše Modimo a di holofedišitšego borrawešo. 7Ke tšona tše meloko yešo e lesome le metšo e mebedi e holofetšego go di fihlela ka go direla Modimo bošego le mosegare ba sa lape. Morena! Ke begwa ke Bajuda ka baka la yona kholofelo yeo. 8Ge ke re: Modimo o tsoša bahu, a ke taba ye e sa dumelwego go lena?
9Le nna ke be ke kgodilwe, ke re go ntshwanetše ge leina la Jesu wa Natsaretha ke le loša ke befetšwe. 10Ya ba tšona ke bego ke di dira kua Jerusalema, ge ke ba kgonyeletša kgolegong, ke neilwe maatla ke baperisita ba bagolo; ge ba bolawa, le nna ka dumela fao. 11Diphuthegong ka moka ke gantši ke ba otla, ke ba gapeletša go lahla thuto yeo, ke ba hlomarela le metseng ya ka ntle.
12Ke tšona di nkišitšego Damaseko; ka ya ke neilwe maatla ke baperisita ba bagolo, ba nthomile. 13Gona moo, Morena, ke sa le tseleng, e le mosegare o mogolo, ka bona seetša se etšwa legodimong se feta letšatši ka go phadima; sa mphadimela thoko tšohle le ba ba sepelago le nna. 14Ra wela fase ka moka; nna ka kwa lentšu le bolela le nna le re: Saulo! Saulo! O nthlomaretšeng? Go raga seotledi go tlo go thatafalela. La realo ka Sehebere. 15Nna ka araba ka re: Ke wena mang, Morena? Yena a re: Ke nna Jesu yo o mo hlomerego. 16Fela, tsoga o eme ka dinao; gobane ke go bonagaletše gore ke go dire mohlanka, ke go dire hlatse ya tše o di bonego le ya tše ke sa tlogo iponatša go wena ka tšona. 17Ke tlo go hlakodiša diatleng tša setšhaba se le diatleng tša bantle, ba ke tlogo go roma wa ya go bona. 18Wa tlo ba budulola mahlo, wa tlo ba gomiša ba tšwa leswiswing ba tla seetšeng, ba tšwa maatleng a Sathane ba tla go Modimo; ba tle ba lebalelwe dibe, ba je bohwa le ba ba kgethegilego ka go dumela nna.
19Kgoši Agaripa! Nna ke šitilwe go ba moganyetši wa tše ke di bonego di etšwa legodimong. 20Ka thoma ka go botša ba Damaseko, ka botša le ba Jerusalema, le ba mathoko ohle a naga ya Juda, ka re: Ba itshole ba boele go Modimo, ba dire mediro e swanelago tshokologo. 21Ke wona molato woo, ge Bajuda ba ntshwara Ntlongkgethwa, ba rata go mpolaya. 22Gomme ke go thušwa ke Modimo ge lehono ke sa eme ke hlatsela ba banyane le ba bagolo, ke sa bolele tše dingwe, ge e se tše baporofeta ba di boletšego ba re di tlo ba gona, le Moshe a realo, gwa thwe: 23Kriste e tlo ba wa go tlaišwa, wa go tlo ba moetapele wa bahu ba tsogago, wa go tlo tsebatša seetša setšhabeng sa gešo le go bantle.
24Ge Paulo a realo, Fesito a hlaboša lentšu a re: Paulo, o hlakane hlogo! Ke mangwalo a mantši ao a go hlakanyago hlogo.
25Paulo a fetola a re: Fesito Moretwamogolo! Ga ka hlakana hlogo. Ke bolela ditaba tša therešo le tša tlhaologanyo. 26Gobane kgoši Agaripa, ditaba tše o a di tseba. Ke ka baka leo ke bolelago ditaba tše ka mafolofolo a tletšego, ke sa belaele ge go ka ba se se moširetšego ditabeng tše; gobane ga se tša direga sekhutlong. 27Kgoši Agaripa! Baporofeta a o a ba dumela? Ke a tseba, o a ba dumela.
28Agaripa a fetola a re: O kgauswi le go mphenya, ka ba mokriste.
29Paulo a re: Le ge e ka ba kgauswi, le ge e ka ba kgole, nna ke iša tlhologelo go Modimo, ke re: A e se ke ya ba wena fela a e be bohle ba ba ntheetšago lehono, ba tle ba swane le nna; fela, ba se be le ditlemo tše.
30Ge Paulo a boletše ditaba tšeo kgoši ya tsoga, le mmuši le Berenike, le ba ba bego ba dutše le bona, 31ba ya thopeng ba bolela seng sa bona, ba re: Motho yo ga a na se a se dirilego se se swantešego polao le ge e le kgolego. 32Agaripa a bolela le Fesito a re: Motho yo, ge a ka be a se re: Nna ke sekišwa ke Kesara, a ka be a kgona go hunollwa.
