Paulo o a sekišwa. O tšhabišetšwa Kesarea
1Paulo a takataketša mahlo le lekgotla, a bolela a re: Banna ba gešo! Go fihla lehono ke itshepeletše letswalo laka le sa tsebe molato pele ga Modimo. 2Ge a realo, moperisita e mogolo Anania a laela ba ba emego moo, a re ba mo itie molomo. 3Paulo a re: Modimo o tlo itia wena o etšago leboto le le takilwego. O re o duletše go nkahlola ka Molao, mme wa laela wa re ke itiwe go se molao wo o rego bjalo.
4Ba ba emego moo ba re: A o omanya moperisita e mogolo wa Modimo?
5Paulo a re: Ba gešo! Ke be ke sa tsebe ge e le yena moperisita e mogolo; gobane go ngwadilwe gwa thwe: O se ke wa roga mmuši wa setšhaba sa geno.
6Bjale Paulo, ka go tseba ge ba bangwe e le bafarisei, ba bangwe e le basadutsei, a hlaboša lentšu mo lekgotleng a re: Nna ke mofarisei; ke morwa wa mofarisei. Ke begwa ka ge ke holofetše go tsoga ga bahu.
7Ge a realo, gwa tsoga kgang ya bafarisei le basadutsei; ya ba phapang mo lekgotleng. 8Gobane basadutsei ba re: Bahu ga ba tsoge; ga go morongwa le ge e le moya; bafarisei bona ba ema ka la go re, di gona tšohle ka dipedi. 9Lešata ya ba le legolo. Bamangwalo ba mohuta wa bafarisei ba tsoga ba lwa ba re: Rena ga re bone bobe go motho e. Ge a re moya goba morongwa o boletše le yena, rena re ka se kgone go lwa le Modimo.
10Ge ntwa yeo e šetše e befile, molaodi wa dira a boifela Paulo a re ba tlo ba ba mo gagolanya, a laela a re bahlabani ba tle ba mo ntšhe lekgotleng la bona, ba mmušetše sebong.
11Bošego bjoo Morena a ema pele ga Paulo a re: Paulo! Beta pelo! Gobane le kua Roma o tlo ba hlatse ya ka bjalo ka ge o ntlhatsetše fa Jerusalema.
12Ge go esa Bajuda ba bangwe ba lakana, ba itlema ka dikeno ba re: Re ka se ke ra ja ra nwa re sešo ra bolaya Paulo. 13Ba ba bego ba lakane ba realo e be e le ba ba fetago masome a mane. 14Ba ya go baperisita ba bagolo, le go ba bagolo, ba re: Rena re lakane ra itlema ka dikeno, ra re re ka se ke ra ja ra nwa re sešo ra bolaya Paulo. 15Bjale lena ba lekgotla botšang molaodi wa dira le re, ka moswana a mo tliše go lena; le re: Bjalo ke gona re ratago go kweša tša gagwe ka tlhaologanyo. Rena re tlo ba re le gona, ra mmolaya a sešo a fihla pele ga lena.
16Motlogolo wa Paulo a sebelwa gore ba logile maano ao; a napa a ya sebong a di tsebiša Paulo. 17Paulo a bitša e nngwe ya ditona, a re: Lesogana le le iše go molaodi, le na le taba ye le tlogo mo sebela yona. 18Tona ya tloga nae ya mo iša go molaodi, ya re: Mogolegwa Paulo o mpiditše, a nkgopela a re, lesogana le ke le iše go wena. Le na le taba ye le tlogo go sebela yona.
19Molaodi a mo swara ka seatla, a mo iša thopeng, a mmotšiša a re: O ntshebelang?
20Lesogana la mmotša la re: Bajuda ba lakane ba re ba tlo go kgopela gore o tliše Paulo lekgotleng ka moswana, gore ba kweše tša gagwe ka tlhaologanyo. 21Fela, o se ke wa ba dumela, gobane o lalelwa ke banna ba ba fetago masome a mane, ba ba itlemilego ka dikeno ba re ba ka se ke ba ja ba nwa ba sešo ba mmolaya. Bona bao ba šetše ba itokišitše, ba lebeletše petholo ya gago.
22Molaodi a laela lesogana leo, a re: O se ke wa botša motho gore o ntshebetše taba ye.
23Yena molaodi a bitša ditona tše pedi, a re: Lokišang bahlabani ba makgolo a mabedi ba go ya Kesarea, le banamedi ba dipitsi ba masome a šupago, le babetši ba bora ba makgolo a mabedi: ba kgobokane ka nako ya boraro ya bošego. 24Le peleša ya go nametša Paulo e be gona, ya gore ba kgone go mo iša go mmuši Felikisi, a fihle a phedile. 25Yena a ngwala lengwalo a re: 26Nna Kelaudio Lisia ke ngwalela Felikisi Mmuši moretwamogolo. Ke thoma ka go re: Thabang! 27Monna e o be a swerwe ke Bajuda. Ge ba šetše ba nyako mmolaya, ka fihla le bahlabani ka mo hlakodiša ke kwele ge e le Moroma. 28Ka go rata go kwa molato wo ba mmeago wona, ka mo iša lekgotleng la bona. 29Ka hwetša ba mmega ka dikgang tša Molao wa bona, a se na molato o mongwe o swanetšego polao le ge e le ditlemo. 30Bjale ke sebetšwe gore ba bangwe ba Bajuda ba mo laletše; ka hlaganela go mo romela go wena. Le babegi ke ba laetše ka re, ditaba tše ba mmegago ka tšona ba tle ba di bolele pele ga gago. Thabang!
31Bahlabani ba dira tše ba laetšwego tšona; ba mo iša Antipateri bošego. 32Ka moswana ba lesa ba dipitsi ba tloga nae; bona ba boela sebong. 33Bala ba fihla Kesarea, ba nea Mmuši lengwalo, le Paulo ba mo tliša pele ga gagwe. 34Mmuši a bala lengwalo leo, a botšiša Paulo naga ye a tšwago go yona; a kwa gore ke wa Tsilitsia. 35A re: Ke tlo go kwela ruri, ge babegi ba gago ba tlile le bona. A laela a re Paulo a išwe sebong sa Herode, a hlapetšwe gona.
